Saturday, August 3, 2024

ENGVANGIN NGE KA DIL ANG KA HMUH LOH?

_Min Tidanglam Ta_

- Rick Warren 
- August 03, 2024
_"A duhzawng anga kan dil phawt chuan anin min ngaithla a ni tih kan hre si a."_ (1 Johana 5:14, GNT).

Ṭawngṭaina hi a takin a thleng ṭhin ngei em tiin i inzawt ṭhin em? I ṭawngṭai laiin Setanan i bengah heti hian a hrilh ru che a ni thei, "Hun khawh ralna mai a ni. Theihnghilh hmak rawh! Tunge ni a i inhriat? Pathianin a ngaithla lo che."

Pathian thuhnuaia a awm avangin kan ṭawngṭainain hna a thawk ṭhin. Engkim chunga roreltu chu Pathian a ni a, hei hi thilmak innghahna a ni. Engvangin nge mi pakhat dilna chhangin midang dilna a chhan loh? Engkim a thuhnuaia awm anih avangin. A finna leh ṭhatna chu innghah ngamna a ni.

Ephesi 3:20-ah chuan heti hian kan hmu, _"Pathian chuan . . . kan dil leh suangtuah aia nasain a ti thei - kan ṭawngṭaina, duhthusam, ngaihtuahna leh beisei aia sang daih pawhin."_ (TLB)

Pathianin a tih theih ang apiang hi ṭawngṭainain a tithei. A hmanrua in ban phakah a awm. I tih theih loh thilte Pathianin a tithei vek a ni tih hriatna hian min fuih thar ṭhin. Thil i thlak danglam thei lo a ni mai thei, mahse i ṭawngṭai thei a, Pathianin danglamna a thlen thei.

Tunah khan engnge i ngaihtuah ka hre mai thei: "Pathian hnenah ṭawngṭaiin thil tidanglam tura ka dil thei anih a, engkim hi Pathian thuhnuaia awm anih tak zet chuan engvangin nge ka dil apiang ka neih si loh?" Zawhna ṭha tak a ni.

Heng hi a chhan pathumte an ni:

*Pathian hi duh duh lak chhuah theihna bawm a ni lo.* Ṭawngṭai i dil apiang i hmu ngawt lo. I faten an dil apiang che i pe ṭhin em? Ka ring lo. I fate tana ṭha tur zawk i hriat avangin chumi mil chuan i pe ṭhin. Pathianin eng anga nasa zawkin nge kan ṭhatna tur a hmuh thiam tih han ngaihtuah teh.

*A chang chuan kan dil a inkalh ṭhin.* Entirna ho tê han pe ila, inkhel an awm ta a, a lehlam lehlam tan an chakna turin kan dil ve ve a, Pathianin tu zawk nge a chhang ang? A nghawng tur hre vekin Pathianin chak zawk awm lo pawhin a inkhelhtir thei.

Mahse hei hi a chhan dik tak zawk niin ka ngai:

*Pathian chuan a ṭha ber a hria, nang chuan i hre lo.* Bible chuan, "Hei hi Ama laka kan huai ngam ve na chu a ni: ama duh zâwnga eng pawh kan dîl chuan, min ngaihthlâksak ṭhîn, tih hi." a ti. (I Johana 5:14)

I ṭawngṭaina rilru chu hetiang hi a ni tur a ni:
"Lalpa, hei hi ka ngenna chu a ni, mahse, i thu ang zelin ni rawh se". Chu chu Lal Isuan Luka 22:42 a a ṭawngṭai dan a ni: “Ka Pa, rem i tih chuan hê no hi ka hnên ata la sawn rawh; nimahsela, keima thû ni lovin nangma thû ni zâwk rawh se,” a ti a.

Ṭawngṭai zel rawh, i ruahman anga thlen loh pawhin. Hei hi hre reng la, Pathianin a ṭha ber a hria.

Ngaihtuah zui atan:

Engvangin nge Pathian chu a ṭhat ber leh a lal ber a pawimawh?

Eng angin nge Pathian lal berna i ring a ni tih ṭawngṭai danin a tihlan?

Engtiangin nge i duhnate ni lova Pathian i duhna leh i rinna i tihlan?

*Vawiin hian Isua i zui ang em?*

Pathian chuan a ṭhatna chu a fapa Isua Krista hmangin a tilang a. Bible chuan, "Pathianin khawvêl a hmangaih êm avângin ama hrin ngei, a Fapa mal neihchhun a pê a; mi tûpawh amah ring apiang chu an boral lo vang a, chatuana nunna an nei zâwk ang." a ti. (Johana 3:16)

Pathianin Isua kaltlanga chatuan nunna min tiam kha ring turin i inpeih em? A nih chuan hetiang hian han ṭawngṭai ta che : " Lalpa duhtak, ka duh dan anga nungin i lakah ka lo tisual ṭhin a. I ngaihdamna ka dil e. Isua Krista chu i fapa a ni tih ka ring a, ka sula tlannan a thi a, chu thihna aṭang chuan i kai tho leh a. Vawiin aṭang hian Isua chu ka chhandamtu a pawmin zui ka duh a. Ka nun min hruai la i duhzawng ti turin min pui ang che. Isua hmingin ka dil e. Amen" 

Isua pawm tura i ṭawngṭai zawh chuan Rick@PastorRick.com ah hian email in min lo hriattir ta che. Isua nen a i zinkawng bulṭannan hmanrua thawn che ka duh a ni.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...