Friday, August 2, 2024

NUPUI/PASAL I NEIH HMAIN I RILRU PHAWRH RAWH

Min Tidanglam Ta

By Rick Warren
August 02, 2024
“Mi zilhtu chuan a hnua fak a hlawh tam lehzual ang.” [Thufingte 28:23]

Ngaihzawng i neih hmain huaisen taka mahni inzirchianna leh i ngaihzawng tur rilru puthmang zirchianna neih hmasak a ṭha ang.  

Saddleback kohhrana nupa tuak pakhat ka inneihtirte kha ka la hre reng ṭhin. Kum nga vel hnuah chuan, ka nupui Kay-i nen zanriah kan kilpui ta a. A hmeichhia zawk chuan hetiang hian min hrilh ta a, “Mo thuam nena biak in ka chhuahsak lai khan ka rilru phurrit zawng zawngte chu ka phur a ni tih reng reng ka hre lo. Ka rilru hahna leh buaina zawng zawng nen chuan pasal ka nei a ni” a ti hlawl. 

Inneihna chuan buaina a siam lo. A tarlang zawk. Nupui pasal i neih hmaa rilru hahna leh buaina chu i hmachhawn thiam ang zelin nupui/pasal i neih hnuah mi hlim zawk, Pathian chawimawi, leh nupa nun hlawhtling zawk i nei thei ang. 

Nangmahah bul ṭan rawh. I rilru natna te chu a dam hma chuan ngaihzawng nei suh – a nih loh pawhin, a lo dam mek a nih loh chuan. Khakna leh thinrimna hneh tum chuan i buai mek em? Ngaihzawng i neih hmain chung buaina chu chingfel hmasa ang che.  

Mi tu emaw i ngaizawng dawn a nih chuan, chu mi chu thlir ngun hle rawh, a bikin an rilru puthmang chu. Heng zawhnate hi zawh hreh suh, “Thinrim insum thei lo ang chi i ni em?” tih te, “Mahni hmasial deuh i ni em?” tih te, “Mi duham i ni em?” tih te, “I nu leh pate i zah em?” tihte chu zawt rawh. 

A rilru leh thinlung chuan buaina chinfel loh a nih chuan an ṭhat hun nghak kher suh. Kalsan nghal rawh. 

In lo inngaizawng tawh chung pawhin amahah chuan rilru hrisel lo leh dik lo i lo hmu palh thei. Amah nen chuan sawi duh rawh u. Mi thiam be rawnin chinfel tum emaw in inlaichinna tihtawp emaw chu a ṭha ang. 

“Ngaihzawn tur reng reng ka nei dawn lo a nih chu,” i ti mai thei. Mahse hei hi thudik chu a ni: “Inneihna hlimawm lo ngaihzawng neih loh aiin a let maktaduai chuangin a tha lo zawk a ni! Chutiang inlaichinna awmze nei loah chuan i awm rei poh leh chhuahleh chu a harsa lehzual zel ang. 

Thufingte 28: 23 chuan hetiang hian thurawn min pe, “Mi zilhtu chuan a hnua fak a hlawh tam lehzual ang,” tiin. 

Eng ang pawhin na mahsela, nangmah leh i kawppui lakah chuan rinawm takin awm rawh. A tawpah chuan in pahnih ve ve tan a ṭha ber ang. 
 
Thil dang pakhat chu hei hi a ni: Inlaichinna nghet tak nei tur chuan nangmah leh i ngaihzawng chuan Isua nena inlaichinna tha tak in neih a ngai. Chutiang tura thutlukna i la siam lo a nih chuan chulaiah chuan bul ṭan rawh. Pathian nena inremna chuan thlarauva in awm dan buatsaih kawngah a ṭanpui che ang a, rilru hrisel tak nei tur leh midangte nena inrem tur chuan a ṭanpui thei ang che. 

Hringnun hi engmah a sawi lawk theih loh, Isua zuitu rilru hrisel tak pahnihte chuan inneihna thlarauva inzawmna thuk tak nei chu an din a ngai – inpawhna mimal inzawmna, inlaichinna, sex leh thlarau thil a ni. 

Ngaihtuah zui atan

Tu emaw i ngaizawng a nih chuan, a rilru puthmang hrisel leh hrisel loh i chhut ngun tawh em? Eng ang zawhna harsa nge i zawh ngai ang? 

Nangma rilru hriselna dinhmun kha han chhut lawk teh. Eng ang rilru phurrit nge i phurh?  

Nupa tuak rilru hrisel tak i hriatte chu han ngaihtuah teh. Anmahni aṭang chuan engnge zir tur i neih? 

[ *Lettu:* Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...