Min Tidanglam Ta
By Rick Warren
- August 1, 2024
“An inrem chauh loh chuan mi pahnih an kal dun ang em ni?” [Amosa 3:3]
Nupui sawisel bo emaw pasal famkim emaw i nghak a nih chuan i hmu ngai lo vang. A chhan ka hrilh ang che: Tumah famkim kan awm lo. Famkim lo vek kan ni e.
Chu chu thil pawi a ni lem lo. Pathianin a hmangaih che, nangmaha famkimlohna zawng zawng nen khan. Mahse i nupui pasal ngei pawh an famkim bik dawn lo a ni tih i hriat a ṭul thung ang.
Hengte avang hian i fimkhur a ngai. Mi tu pawh mai hian hliam eng emaw lai chu kan nei vek a, mi ṭhenkhat chuan damna atan hun an duh rei deuh. Chutiang mite chu nupui pasal neih chu an phur zui viau tawh lo ṭhin. Chutiang mi chu damchhung kawppui atan chuan pumpelh an ṭha zawk mai thei hmelṭha tak leh kawm nuam tak pawh ni se.
Kawppui nghet tak nei tura i inbuatsaih a nih chuan i kawppui tur rilru put hmang chu i hriat chian a ṭha awm e. Mithiamten an zir bingnaah chuan nupa tuak zaa 80 vel lai inṭhen chhan chu an kawppui tu emaw zawk zawk rilru hrisel tawk loh [emotional instability] vang a ni.
Bible zirtirna behchhanin hetiang hian mite rilru dinhmun, hrisel leh hrisel loh, chu a enfiah theih ang.
Nupui pasal thudik ngei sawi ṭhin tur thlang rawh. Thufingte 20: 7 chuan hetiang hian min chah: “Mi fel, ama remruat thiama awm mi fate chu an nihlawh e,” tiin. Nupui pasal thuhlaah chuan hmangaihna chu inrintawnnaa innghat a ni a, inrintawnna chu thudika innghat a ni. Thudik min hrilh loh chuan ka ring thei lo che ang a. Ka ring lo che a nih chuan engtin nge ka hmangaih theih ang che?
Mi thilphal leh fel ngei kawppui atan zawng rawh. Bible chuan, “Mi thil phal nunna chu tihthauvin a awm a, tui leih thintu chuan mahni pawh a inleih a ni,” tiin a sawi [Thufingte 11: 25]. Hetiang hian a sawi bawk, “Zahngai thei mi chuan ama nunna atana ṭha a ti ṭhin a,” tiin [Thufingte 11: 17].
Kawppui atan chuan thinurna thunun thei mi zawng rawh. Thufingte 22: 24 chuan “Thinrim hmang mi chu ṭhian suh la, mi thinchhia chu kawp suh,” tiin a sawi. Mahni inthunun harsat khawpa thinchhia chu mahni inngaih hlutna nei lo leh mi thlamuang lo an ni fo.
Thil ṭha lo chindawklak [addiction] nei mi chu nei suh. “Uaiin heh mite zingah leh sa heh mite zingah tel suh,” tiin min chah bawk [Thufingte 23: 20]. Thil pahnih zu leh sa chauh tarlan an ni a – mahse khing bak thil ṭha lo chindawklawk theih chu thil za tel an awm.
Kawppui khakna nuna nung lo tur zawng rawh. Khakna hi tur hlauhawm tak ang a ni a. I nun lai rengin a ei ang che. Hebrai 12: 15 ah chuan hetiang hian a sawi, “Fimkhur rawh u: chutilo chuan, Pathian khawngaihna ata in bo dang ang e, khakna zung eng emaw lo chawra tibuai che uin, chu chuan mi tam tak chu tibawlhhlawhin an awm ang a,” tiin a sawi.
Kawppui atan mi vervêk lo zawng rawh. Thufingte 28: 25 chuan “Mi rilru duham chuan inbeihna a chawk chhuak a” tiin a sawi. Kan sawrzim dawn a nih chuan nupa inkara innghirnghona tam ber chu mahni hmasialna mai an ni.
Mi duham lo zawng bawk rawh. Thufingte 15: 27 chuan, “Mi duham chuan ama chhungkua a tibuai thin a” tiin a sawi bawk. Mi duham tak i nei a nih chuan i damchhung hun chu leiba rul reng rengin hun i hmang ang.
“Hei chu a tam hle mai a, Rick. Hetiang mihring hi chu ka hmu thei dawn em ni aw,” i ti hial mai thei. Kei pawhin ka hmu thei a. I hmu thei ngei turah ka ngai.
Kay-i nena kan inneih ni khan, tun kum zabi chhunga thuhriltu ropui leh ziaktu ropui khan card min lo thawn a. A chhunga thu inziak kha ka theihnghilh tawh ngai miah lo, “A finna thurawn zawmtute hnenah chuan Pathian chuan thil ṭha ber a pe ziah ṭhin a ni,” tiin.
A hruaina zuia i nun i hman a, a thu i awih phawt chuan Pathian chuan thil ṭha ber a pe ve zel ang che. Deuteronomy 31: 8 chuan hetiang hian min chah, “Tin, i hmahruaitu chu Lalpa a ni ang a, i hnenah a awm zel ang a, a tithlawn lo vang chia, kal pawh a kalsan tawp lo vang che, hlauh suh la, zam hek suh,” tiin.
Ngaihtuah zui atan
I kawppui tur i thlan lai chuan mi famkim emaw sawisel bo emaw i lo dap ve tawh ṭhin em? Famkim lo vek kan ni tih hriatna chuan engtin nge mite laka i beiseina chu a thlak danglam?
Engtiangin nge Pathian hnathawh mite rilru tihhriselna atana a hnathawhna chu i lo hmuh ve tawh?
Vawiina kan fianrial thuzirah hian i nihna eng emaw ber i hmu ve em? I hmu a nih chuan, Pathian tihdamna chang turin engtiangin nge ke i pen tak ang?
[ Lettu: Peka]

No comments:
Post a Comment