Monday, August 5, 2024

PATHIAN I RING NGAM THEI ANG

_Min Tidanglam Ta_

Rick Warren
August 05, 2024

“Thilpêk ṭha leh thilpêk famkim zawng zawng chu, chung lam aṭangin êngte Pa hnên ata a lo chhuk ṭhîn a ni, amahah chuan danglamna leh herna hlim rêng rêng a awm thei lo.”
‭‭Jakoba ‭1‬:‭17‬ ‭

I chhehvelah thil engkim mai hi lo danglam mah se, hriat renga ṭul chu Pathian hi danglam ngai lo Pa a ni tih hi. A tibeidawng ngai lovang che. Rintlak a ni.

Jakoba 1:17 chuan, “Thilpêk ṭha leh thilpêk famkim zawng zawng chu, chung lam aṭangin êngte Pa hnên ata a lo chhuk ṭhîn a ni, amahah chuan danglamna leh herna hlim rêng rêng a awm thei lo" a ti a. Pa, danglam ngai lo nghet reng mai a ni.

Mihringten pa kan neihte hi chu sawi lawk tlak loh an ni fo. "Ka puitlin zel chuan ka pa hian engtin nge min enkawl zel ang ka hre lo. A ngawi reng ang nge a thinchhe em em ang. Min ngaihthah ang nge min kuah thin ang tih pawh ka hre lo. Min pawm zel ang nge min la thlauhthla ang tih pawh ka hre lo" an tih ka hre tawh a. Nun nghet lo pate chuan fateah hlauhthawnna an thlen thin.

Mahse Pathian erawh rilru te thut ṭhin a ni ve lo. I mizia emaw i laka a rilru emaw a thlak ve mai mai ngai lova. I thiltih engmah hian a hmangaih zualtir thei chuang lova, a hmangaih tlemtir thei chuang hek lo. Vana i Pa khi chu a nghet em em a ni. I rinngam tur thil pakhat chu Pathian chuan i lakah a chetphung ngai rengin a che ang tih hi.

Bible chuan 1 Timothea 2:13 ah chuan, “Keini rinawm lovin awm mah ila, Ani chu rinawmin a awm reng a ni; Amah leh amah a inphat thei si lo va,” a ti a ni.

Khawvel hi a hma ai mah khan a inthlak chak tawh zawk tih kan hre thei a. Kum engemawzat liamtaah khan hmalam hun thlir mi, Alvin Toffler chuan hun thil inthlak zung zung chungchang sawi lawkin, mite chuan 'Nghehna thliarkarte' an mamawh dawn tiin a ziak a. Thil engkim hi a danglam duak hian, i nun tan thirchakai ang maia inthlun nghehna tur i mamawh ta a ni. Nghehna thliarkar i hah em em lai pawha i inenkawl theihna tur i mamawh a ni.

Thil pakhat harsatna a awm a: he khawvelah hi chuan engmah hi a kumhlun lo tih hi. Thil pakhat chauh danglam ve ngai lo, nghehna tluantling pe thei tur che a awm a chu chu, danglam ve ngai lo Vana i Pa khi a ni. Pathian i hriat a, a hmangaihna i daibuak deuh deuh hian, he khawvel nghing ṭhinah hian rah ngam hmun nghet i hmu dawn a ni.

"Min hmangaihna kawngah chuan ka Pathian chu a danglam ngai si lova" (Sam 59:10 TLB).

Chu chu i ringngam thei ang.

Ngaihtuah zui atan...

I nunah i intihnghehna tur atan eng thliarkar nge i hman ṭhin?

Nghehna hian hahna hi engtin nge a tihreh ṭhin?

I nunah Pathian hmangaihna danglam ngai lohzia tifiah turin eng thilpek duhawm tak tak nge sawi tur i neih le?

(Lettu : Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...