__Nun Hunbi Hrang Hranga Ṭhan Dan_
- Rick Warren
- August 17, 2024
_"Tichuan thil ṭha tih i ning suh ang u; kan inthlahdah loh zawngin a hun takah chuan kan seng dawn si a."_ (Galatia 6:9)
Lo neitu chuan ṭhala thlai chi tuh kha ṭhalah vek ni lo, hun dangah a rah i seng dawn a ni tih chiang takin a hria. Ṭhala i tuh kha furah te i seng ṭhin.
Thil lo thleng i hmachhawn dan emaw tu emaw i chhan dan emaw khan tuna i hriatthiam phak miah lohin i hma hun a hril ang. Mahse tunah hian thil dik tak hmanga i chhan let chuan duh lo viau mahla nakinah rah ṭha tak a la chhuah dawn a ni tih i hre thei ang.
_"Tichuan thil ṭha tih i ning suh ang u; kan inthlahdah loh zawngin a hun takah chuan kan seng dawn si a."_ (Galatia 6:9)
Eng hunbiah pawh awm la hunbi leha Pathian malsawmna i dawn theih nan mahni i inzawh tur zawhna pali a awm.
*1. Tun hunbiah hian engnge i zir theih?*
Thil ṭhenkhat chu kan tawnhriat hnu chauha kan zir chhuah theih chi a awm. Deuteronomy 11:2-ah chuan heti hian kan hmu, _"Vawiin hian in tawnhriat aṭanga Pathian in hriatna kha hre reng rawh u."_ Tun hunbi hi harsa taka i beih hram hram hun anih pawhin zirlai zir tur leh ṭhan lenna tur a awm a ni.
*2. Tun bunbiah hian engnge i hlimpui/chênpui theih?*
Bible chuan heti hian a ti, _"Engkimah lawmthu hril fo rawh u; chu chu nangmahni lam thuah Krista Isuaah chuan Pathian duhzawng a ni si a."_ (1 Thess. 5:18). Ni ṭhaah leh ni ṭha loah te pawh lawmna thinlung pu chunga kan nun kan hman a ṭul, a chhan chu nitin mai hi Pathian thilpek a ni.
*3. Tun hunah hian engnge pawimawh ber?*
Thuhriltu 3:1-ah chuan heti hian kan hmu, _"Engkim tan hian hun ruat a awm a, van hnuaia thiltih zawng zawng tan hun remchâng a awm."_ Hei hi a dik anih chuan ṭum khatah thil zawng zawng i ti thei lo tihna a ni. Tun hunah hian engnge pawimawh ber tih uluk taka i thlan thiam a ṭul dawn a ni.
*4. Tun hunah hian engtinnge midangte i puih theih ang?*
Bible-in chiang taka min hrilh chu he khawvelah hian nangma tan chauha nung tura dah i ni lo tih hi: _"I theih phawt chuan ṭanpui ngaite ṭanpui rawh"_ (Thufingte 3:27, NCV). Midangte ṭanpui turin Pathianin theihna, thiamna leh chakna a pe che a ni.
Pathianin hunbi tinah amah i lo ana midangte tana malsawmna i nih theih nan i nunah hna a thawk a ni. Heng zawhna palite hi ngun takin ngaihtuah rawh, tichuan vawiin atana Pathianin a pek che hi hlawk thei ang berin i hmang thei ang.
Ngaihtuah zui atan.
Eng kawngah leh i nunkawng khawiah nge Pathian malsawmna nakina dawn i duh? Chumi chu a lo thlen theih nan vawiin hian eng chi nge tuh tura i inbuatsaih ang?
Hun harsa tak i tawh hunin engtinnge midangte rawngbawksakna hian thlir dan dik a neihtir che?
Lungawi lohna riau i neih hunin Pathian hnenah engnge i sawi reng reng ang le?
[Lettu: Mapuia Fanai]
No comments:
Post a Comment