_Min Tidanglam Zo Ta_
By Rick Warren
— August 16, 2024
“Amahah chuan zung kaiin inrem chho ula, zirtîrna in dawn ang khân rinnaah chuan ding nghet ula, lâwmthu sawi uar rawh u.” [Kolossa 2:7]
In nupa inlaichinna chu kawng hrang hrangin in ṭhanlentir thei ang. Hmangaihna in inlantir tawn thei a, mahni hmasialna tel lovin in khawsa thei a, in inngaihdam tawn thei bawk. Mahse thutlukna pawimawh ber in kawppuite nena insiam theih tur chu Isua zui tura thutlukna siam dun chu a ni.
Bible chuan hetiang hian a sawi, “Amahah chuan zung kaiin inrem chho ula, zirtîrna in dawn ang khân rinnaah chuan ding nghet ula, lâwmthu sawi uar rawh u,” tiin [Kolossa 2:7] Nangmah leh i nupui/pasal chuan mimal angin Isua kutah engtik emaw lai chuan in lo inhlan tawh mai thei, mahse hei hi in inzawh nawn a ngai ang, “Nupa angin kan rinna hi kan nun chhuahpui em?” tih zawhna chu.
Hengte hi Isua a tak taka zui tura hma in lak dun theih dan turte chu an ni [Heng thu ṭhenkhatte hi chu chhungkaw member dangteah pawh a dik thei tho]:
1. Baptisma chang dun rawh u. In la chang dun lo a nih chuan, vantlang hmuhah ngei Kristian in ni tih tar chhuak rawh u. Isua chu in inneihnaah a laimu taka a awm dawn chuan khawvel hmaa in nihna in tarlan dan tur kawng ṭha ber a ni ang. Nupaa baptisma chang dun te hi hmuhnawm ka ti hle ṭhin. Isua hnenah in nun leh inneihna te chu in hlan tih puan chhuahna ropui tak a ni.
2. Mi tlem zawk [small group] inpawlhona buatsaih. Thlarauva hmasawn turin Kristian nupa dangte nen inlaichinna leh inpawlhona buatsaih rawh u. In nun leh nupa inneihna Pathian Thu hman dun in zir a nih chuan, thlarauvah in ṭhang lian dun thei dawn a ni. Rawngbawlna leh rinnaah pawh in infuih tawnin in intiṭhang tawn bawk ang. Krista zuitu nihna leh ringtu kan nihnaa ṭhang lian zel tur chuan ringtu dangte ṭanpuina kan mamawh ṭhin.
3. In Inneih thutiam chu sawi nawn rawh u. Isua hnenah in nun te in hlan a, in inpeknate in tharthawh [renew] ṭhin a nih chuan nupa inneih thutiam tharthawh pawh thil pawimawh tak a ni ang. Vawiinah chuan chu chu thil thar danglam tak a ni tawh ang.
4. In ṭawngṭaipui tawn rawh u. “Chutichuan, in sualte thupha chawi tawn ula, inṭawngṭaisak rawh u; tichuan, tihdamin in awm dâwn nia. Ṭhahnemngai taka mi dik ṭawngṭaina chuan thil ropui tak a thawk thei a ni” tiin kan hmu [Jakoba 5: 16]. Tuin nge inneihna hlimawm leh hahdamthlak thlahlel lo tehlul ang? Bible-in min hrilh dan chuan tihsual kan ngei changa ngaihdam indil tawn leh inṭawngṭaipui tawnin chutiang chu a theih.
5. Pathian Thu zawm. Nupain Pathuan Thu an chhiar dun a nih chuan an nunah an hmang a, chu chuan an inlaichinna a tidanglam a, hringnunah innghahna nghet tak an nei zui ṭhin.
In nupa inlaichinna chuan hun harsa a paltlang lai pawhin, beisei bo a ni ngai lo. In nupa nun chuan nun thar a tem leh thei. Mahse chutiang thleng tur chuan Isua chu a laia a awm a ngai ang. Pathianin a Thua ti tura a hrilh che chu ti ang che, tichuan in nupa inlaichinna chuan hma a sawn thei ang.
Isua chu nupa inlaichinna zawm nghettu a ni. Thil dang zawng zawng a keh chhiat hnuah leh i beidawn vek hnuah pawh a la phuar nghet zel ang che.
Ngaihtuah zui atan
I nupui/pasal nen chuan thlarauva inzawmna thuk chu engtik laiin nge i neih ber? Thlarauvah chuan eng ang boruakah nge ṭhanlen harsa i tih ber?
Nangmah leh i nupui/pasal chu tute nupain nge thlarau hmasawnna chu neihtir che? Chutiang nupa bulah chuan tun thla chu hun hmang tam ang che. Chutiang nupa chu i hmelhriat zingah an awm lo a nih chuan, kohhran chutiang mite awmnaah chuan lawi ang che.
Thlarauva inzawmna thuk zawk nei thei turin kar thar lo awm turah hian engnge bul ṭan turin i nunah tihdanglam ngai?
[ *Lettu:* Peka]
No comments:
Post a Comment