Sunday, August 18, 2024

NUN HUNBI TIN HIAN CHHAN AN NEI

Min Ti Danglam Ta

- Rick Warren 
- August 18, 2024
_"Engkim hi an hun ṭheuhah chuan mawi takin a siam a."_ (Thuhriltu 3:11)

Hringnun hi thil inkalh hlir hian a khatin a lang. Tlang kan lawn chang a awm a, ruama kan kal chang a awm bawk. A changin hlawhtlinna kawng kan zawh a, a changin hlawhchhamna lamtluang kan zawh bawk. Chakna kan chan chang a awm a, chak lo zawk kan nih chang a awm bawk.

Kum khat chhung hian sik leh sa hunbi pali a awm a. Mahse i nunah erawh hunbi sawm chuang a awm mai thei. Chu i nun hunbi tinah chuan hun ṭha leh hun ṭha lo a awm.

Thuhriltu 3:1-8 ah chuan Solomonan hringnuna kan thil tawn chi hrang hrang a sawi: _"Engkim tan hian hun ruat a awm a, van hnuaia thiltih zawng zawng tan hun remchâng a awm: Pian hun a awm a, thih hun a awm. Phun hun a awm a, thil phun phawi hun a awm; tihhlum hun a awm a, tihdam hun a awm; ṭhiat hun a awm a, siam leh hun a awm; ṭah hun a awm a, nuih hun a awm; sun hun a awm a, lam hun a awm. Lung paih darh hun a awm a, lung lak khâwm hun a awm. Pawm hun a awm a, pawm loh hun a awm; zawn hun a awm a, tihbo hun a awm. Vawn ṭhat hun a awm a, paih bo hun a awm; tihthlêr hun a awm a, ṭhui hun a awm; ngawih hun a awm a, ṭawng hun a awm. Hmangaih hun a awm a, huat hun a awm; Indo hun a awm a, muan hun a awm a ni."_

Biak ina i awm lai emaw fianrial hun i neih lai emaw kha Pathian duhzawng anga i awm hun ang chauhin i ngai a ni mai thei. I thawmhnaw dahna bawm i tihfai lai pawh khan Pathian duhzawng angin i awm thei. I in bul i tihfai lai pawhin Pathian duhzawngin i awm thei bawk. In thar i luahin emaw i awmna ngaia i awm emaw pawh khan Pathian duhzawng angin i awm thei. Engkim tan hun a awm.

Hringnun hi hunbi inkawkalh infin khawm a ni. Ni sa reng leh ruah tui tla ngai lo hian thlaler a siam ṭhin. Pathian duhzawng anga i nun a, Pathianin nung tura a duh che anga i nun i hman chuan chung i tawnhriatte chuan i nunah chhan leh hlutna an nei a ni tih i hmu ang.

Zai thiam Ray Stevens chuan he hla hi a sa ṭhim "Engkim hi an mawi" tih hla hi. Chu hlaah chuan he hla thu hi a awm, "Engkim hi anmahni tawkah an mawi vek" tih hi. Hei hi a dik chiah lo deuh. Engkim hi an mawi vek lo. Cancer natna te hi a mawi miah lo. Naupang tihduhdah te hi a mawi miah lo. Indona te hi a mawi miah lo bawk.

Thuhriltu 3:11-ah chuan Bible-in heti hian danglam deuh hlekin a sawi, "Engkim hi an hun ṭheuhah chuan mawi takin a siam a."_ A chhan chu Bible chuan Pathianin thil ṭha lote la boin, a hunbi teah thil ṭha atan a hmang ṭhin a ti a ni.

Tunah kha hunbi pakhat, mawi lo tak mai i hmang mek a ni thei. I sum dinhmun a ṭha lo a. I hriselna  a ṭha lo a ni thei. I kawppui nen in inkar emaw i ṭhiante nen in inkar emaw a duhawm loh viau thei. I hma hun a êng viau lo a ni thei.

Mahse thil hmel mawi lo takah pawh Pathiana rinna i nghah phawt chuan Pathianin thil ṭha chhuahtir nan a la hmang ang.

Ngaihtuah zui atan.

Vawiin hian eng dinhmun harsa takah nge Pathianah rinna i nghah ang?

Khawvel hian engtinnge hun khirh tak kan hmachhawn dawn tih hi a hrilhfiah ang?

Pathian duhzawgin i awm em tih engtinnge i inhriat ang.

*Isua thlan chungchangah engnge i ngaihdan le?*

Bible chuan Pathian Fapa, Isua Krista i rin chauhin vanramah i lut thei a ti. Vanram hi hlawh chhuah theih a ni lo: _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

Isua hnena inpe tura i inpeih chuan heti hian ṭawngṭai rawh le:
"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Ka thinlung hi i hmangaihna leh beiseinain min thlaksak rawh. Min hruai la, i duhzawnga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...