_Min Tidanglam Ta_
By Rick Warren
— August 09, 2024
“Mihring tihlâwm nge ka tum, Pathian tihlâwm? Mi zinga tlaktlum tum ka ni em ni? Ni ila, Krista bawih ka ni lo vang.” [Galatia 1:10]
Hringnunah, mi pakhat chauh i tihlâwm ngai a awm a: chu chu nangmah Siamtu chu a ni. Lalpa chauh chu i tihlâwm a ngai a, nangmah dintu che leh i dam chhan chu a ni.
Chu chuan nasa takin nun a tiawlsam a ni!
Isua chuan, “Keimahin engmah ka ti thei lo; benga ka hriat ang zelin ro ka rel ṭhin,” [Johana 5: 30]. Chu awmzia chu, “min Thlirtu pakhat ngaihdan chauh ka vengthawng” tihna a ni.
Mite tihlâwm tum chu milem biakna niin i hre ve em? Thusawm pek zinga pakhat chuan hetiang hian a sawi, “Keimah lo chu pathian dang reng reng i nei tur a ni lo,” tiin [Exodus 20: 3]
Pathian hmaa i dah reng reng thilte chu pathian anga ngaih an ni ṭhin. Lawngleng chu pathian a ni thei a. Eizawnna chu Pathian a ni thei bawk. Kan bialnu/ngaihzawngte pawh chu pathian an ni thei. Golf chu pathian a ni thei. Pathian ni si lo Pathian hmaa i dah reng rengte chu pathian an ni zel a ni.
Thupek pahnihna chu hei hi a ni, “milem siam chawp leh thil dang a anpui reng reng… i siam tur a ni.” [Exodus 20: 4]. I nuna Pathian hliahtu reng rengte chu milem-pathian [idol] an ni. Hlawhtlinna chu a pathian theih bawk. Pawisa pawh a pathian theih a. Mipat-hmeichhiatna pawh a pathian theih. I nupui/pasal, hotu emaw thian emaw chu Pathian aia i dah lian a nih chuan milem-pathian an ni.
Mite tihlâwm tumtute chuan mite ngaihtuahna chu an nun hruaitu atana hman an phal tihna a ni. Chung ngaihdan [opinion] te chu Pathian duh dan aia an dah len chuan an pathianah a chang fo. Miten an ngaihnep phah dawn che nia i rin chuan mite zingah Kristian i nihna i hrilh duh lo mai thei. Miten an ngaina dawn lo che nia i rin avang chuan i inkhawm duh loh phah mai thei. Chu dinhmunah chuan, i nunah chuan pathian dang i nei tihna a ni. Mite tihlâwm tum tlatna chu i pathian tihna a ni.
Paula chuan Galatia 1: 10 ah hetiang hian a sawi, “Mihring tihlâwm nge ka tum, Pathian tihlâwm? Mi zinga tlaktlum tum ka ni em ni? Ni ila, Krista bawih ka ni lo vang,” tiin.
Mitinten lawm hlawh nih chu kan duh vek. Mite tihlâwm duhna chu thlemna a ni thei thung. Pathian tihlâwm ai chuan chu chu thlang ngai suh ang che. Krista bawih i nihna angin, Thlirtu pakhat chauh i nei a. Pathian tihlâwm chauh chu i tih tur a ni.
Ngaihtuah zui atan.
Engtik laiin nge mite tihlâwm chakna chu i lo pathian ve tawh? Engnge a rahchhuah chu ni ta?
Pathian chauh tilawm tumin engtik laiin nge i nun lo hman tawh? A taka a rah chhuak chu engnge ni ta?
Tun dinhmunah khan mite tihlâwm engtiang takin nge i lo tum? Engtiang takin nge Pathian tihlâwm i tum? Mi pakhat chauh tilawm tur chuan engnge i khawsak phungah chuan tihdanglam ngai?
Vawiin hian Isua i zui dawn em?
Bible chuan hetiang hian a sawi, “Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân.” [Johana 3: 16]
Pathian chuan a thutiam hlen chhuak turin i ring thei ang em? He ṭawngṭaina tawite hmang hian ṭawngṭai rawh: “Lalpa duhtak, Isua Krista chu i Fapa a ni tih ka pawm a. Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian. Ka nun hi hruaiin i duhzawng tih min zirtir ang che. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu:* Peka]
No comments:
Post a Comment