_Min Tidanglam Ta_
- Aug 10, 2024
_“Kei, Keimah ngei hi nangmah thlamuantu chu ka ni. Engah nge thi ve mai tûr mihring i hlauh viau ang le? Mihring fa chu hlobet ang lek a la ni dâwn lo vem ni?"_ (Isaia 51:12)
Hnawlh nih hlauhna hneh dan kawng khat chu thlirna dik neih hi a ni. Mi dangte ngaihdan i ngaithla thei - mahse, an thusawite chu ngaihlu uchuak suh.
Isaia 51:12-ah chuan, _"Kei, Keimah ngei hi nangmah thlamuantu chu ka ni. Engah nge thi ve mai tûr mihring i hlauh viau ang le? Mihring fa chu hlobet ang lek a la ni dâwn lo vem ni?"_ tih ziak a ni a. He khawvela i nun hi chu reilote chhung atan mai a ni a, chuvangin, engatinge midang ngaihdan tur che i hlauh tlat ang?
Mi dangte pawh kha Pathian an ni bik lo a, an ngaihdante pawh chatuan daih a ni lo. Hlawhtlinna thuruk chu sawiseltu che aia i tei rei peihna kha a ni - inelna thui tak, chatuan daih a ni tih i hriatchhuah kha a ni.
Miten an tihnual che anih chuan, an endan che kha Pathianin a endan che nen a inang turah ngai suh. Miin sawichhiatna che kha pawm nghal ringawt suh, chu ai chuan a hlutna ngaihtuah hmasa zawk rawh.
Engvangin nge a pawimawh? A chhan chu, midangte pawm dan ringawt kha i thil ngaihpawimawh a nih chuan, hnawl hlauhna nei turin i inbuatsaih tihna a ni.
Bible chuan, _"Hêng thilah hian engnge kan sawi ve tâk ang? Pathian hi kan lama a ṭan chuan tûin nge min do thei ang?"_ (Rom 8:31) a ti. I tana Pathian hlutzia i hriat chuan, midangte hnawlna nasa tak pawh tawk la i tuar thei zel ang.
Mi ṭhenkhat tan chuan larna, hmingthanna leh chawimawina te hi a pawimawh ber an ni a. "Mite'n engtin nge min ngaih ang? Eng angin nge mite mithmuhah ka lan?" tih an ngaihtuah ṭhin.
Hetianga i nun chuan, mite rorelna hnuaia an khawngaihna changtu mai i lo ni ang. Mi hlawhchham ni a an ngaih che chuan, mi hlawhchham i ni ngei ang! Tlin lo ang a an ngaih che chuan, i lo tlin lo reng a ni thei!
Chutianga nun chu i duh takzet em?
Chanchin lawmawm tak chu, chutianga nung tur chuan Pathianin a duang lo che. "Engatinge anni i ngaihthlak? Mihring ve mai an nih hi. Kei hi ngaih chan zawk tur chu ka ni. Hlobet ang lek an nih hi" tiin Pathian chuan a hrilh zawk che a ni.
Tirhkoh Paula chuan a damchhan chu midang ni lovin Pathian tihlawm a ni a ti: _"Mihring tihlâwm nge ka tum Pathian? Mîte zînga tlâktlum tum mai em ni ka nih? Mihring tilâwmtu mai ka nih chuan Krista bâwih ka ni lo vang."_ (Galatia 1:10)
Paula chuan duhthlan tur i nei a ti a. Pathian tihlawm nge mihring tihlawm zawk i thlang thei tiin.
Tunge tihlawm i chak zawk? Pathian leh mihring lawmna chu a rualin i chang thei si lo. Tunge "Hlobet ang chauh" leh tunge "Tichak thei che" hre reng rawh.
Pathian chu i tan a ni, i hlawhtlin lai hmuh a duh a. Nitin atana nun thlang fo rawh.
Ngaihtuah zui atan:
Engnge midang ngaihdanin a nghawng leh mi dang ngaihdanin a hruai danglamna?
Pathian chawimawina nge mihringte chawimawina i ngaihthlak tam zawk? Pathian ngaithla turin eng danglamna nge i siam theih?
Nitin nuna midangte ṭawmpui nun i zawnnaah engtinnge chatuan thleng thlir phaknain i thil thlir dan a tihdanglam?
*Khawiah nge i chatuan hun i hman ang le?*
Bible chuan, Isua Krista, Pathian Fapa i rin chauhvin vanram i thleng thei a ti a. I hlawhchhuah theih a ni lo: _"Khawngaihna avânga rinnaa chhandam in ni a, chû chu nangmahni lama chhuak a ni lo, Pathian thilpêk a ni zâwk e; thiltih avâng pawh a ni hek lo; ni se mi tûpawhin inchhuan phah nân an hmang mai dâwn asin."_ (Ephesi 2:8-9)
Isua hnena inpe tura i inpeih chuan heti hian ṭawngṭai rawh le:
"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.
"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a, ka Lal atan ka thlang e. Ka thinlung hi i hmangaihna leh beiseinain min thlaksak rawh. Min hruai la, i duhzawnga nung turin min pui ang che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]
No comments:
Post a Comment