_Min Tidam Ta_
- Rick Warren
- August 11, 2024
_"Hmangchâng hriatnain thin a tinel a,
Mî diklohna haidersaktu nih hi ropuina a ni."_ (Thufingte 19:11)
Mi huatthlala tak leh ninawm tak te i tawn laiin an mize phen a an natna i en a ngai.
Kan thiltih reng reng hi engemaw min tiphurtu awm vang a ti kan ni ṭhin. Miin midang an tihnat hian chhungrila an mahniin natna an neih vang a ni fo. Chungril natna neite chuan mi an tina fo ṭhin.
Mi dinhmun i hriat chian poh leh chungah khawngaihna i ngah ang. Mi tawhkhirh emaw ninawm tak i tih te emaw kha han ngaihtuah teh. An chawr chhuahna leh dinhmun i hrechiang lo a, chuvangin lainatna i ngah lo a ni thei.
An naupan laiin an nu leh paten an boralsan a ni tih i hriatpui lo a ni thei. Khawihchhiat an ni em tih pawh i hre lo a ni thei. Kawppui vawihnih lai lo nei tawhin an kawppuiten an kalsan em tih pawh i hre lo a ni thei. An chanchin i hre lova, chuvang chuan an chungah khawngaihna i lantir lo a ni thei.
Bible chuan Thufingte 19:11-ah, _"Hmangchâng hriatnain thin a tinel a, Mî diklohna haidersaktu nih hi ropuina a ni."_ a ti. Mi tihmawhte lakah chuan huatthu tihchhiat a awl em em. Mahse, i fin chuan i huatthu a chhe zung zung lovang. Engvangin? A chhan chu, finna chuan dawhtheihna a pe che a ni.
Dawhthei taka mi chawrchhuahna hriatthiam i tum tlat chuan an ritphurh i hriatthiampui ang a- khawngaihna lantir a awlsam dawn a ni. I hriatthiamna chuan an tihsual te haider turin dawhtheihna a pe dawn che a ni.
Heta ka sawi hi hmangaihna tak tak a ni. Dik tak chuan, Bible chuan mite laka huatthu tihchhiat loh hi hmangaihna tak tak tihlanna a ni a ti. I thinlunga hmangaihna i neih nasat poh leh i huatthu sawi a harsa dawn a ni. I thinlunga hmangaihna i neih tlem chuan him lo ni a inhriatna i nei nasa anga, i huatthu sawi a awlsam dawn hle a ni.
Thufingte 10:12 chuan, _"Hmangaihna erawh chuan sual zawng zawng a hliahkhuh ṭhîn."_ a ti. Hmangaihna a chhunkhah i nih tam poh leh miin an phut san che a, an hmhhsit che a, an huat chein lungngaihna i nei tlem ang.
Mi khirh tak i hmachhawn hunin hei hi hre reng rawh: an nungchang ni lovin an natna en rawh. Tichuan thinur mai lovin hmangaihnain chhang let rawh.
Ngaihtuah zui atan.
Tute nge mi tawh khirh ber ni a i hriat? Engtinnge huatna ni lova hmangaihna nen zawka i chhan let theih ang?
Engtikah nge hmangaihna leh finnain mi dik lohna haider tura a puih che? Chu chuan engtinnge i mimal nun emaw chumi nena in inkar boruak a nghawng?
Finna chuan hmangaiha nena chhang let turin a pui che. Engtinnge finnaah i ṭhan len ang?
*Vawiin hian Isua i zui dawn em?*
Pathian chuan a Fapa Isua Krista kaltlangin a ṭhatna a rawn lantir tawh a. Bible chuan heti hian a ti, _"Pathianin khawvel a hmangaih em em a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zawk nan."_ (Johana 3:16)
Chatuan nun a tiam chang tura Pathiana rinna nghat turin i inpeih em? I inpeih chuan he ṭawngṭai tawi hmang hian ṭawngṭai rawh le: "Lalpa, Isua Krista hi i Fapa a ni tih ka ring a. Ka sual te i hmaah puangin i ngaihdamna ka rawn dil e. Ka sual lak bo anih theih ka ta Isua a thi a, ani chu nangin i kai tho leh a ni tih ka ring. Vawiin aṭang hian Isua ringa a hnung zui ka duh e. Min hruai la i duhzawnga nung turin min pui ang che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]
No comments:
Post a Comment