Monday, August 12, 2024

I NATNA CHU LIAMTIR MAI RAWH

_Min Tidanglam Ta_

Rick Warren
Aug 12, 2024
“Tu pawhin tu chungah pawh thupawi nei ang ula, indawh tawnin inngaidam tawn ula; Lalpan a ngaidam che u ang tak khân ngaidam ve rawh u.”
‭‭Kolossa ‭3‬:‭13‬ ‭

I lakah emaw, i hmangaih tu emaw lakah pawh ni se mi dangten thil atthlak, hliam na thei che an ti tawh em? "Kristiante tih tur chu ngaihdam hi a ni, chu vangin ka ngaidam ang. Ngaihdam min dil veleh ka ngaidam nghal ang" tiin i ngaihtuah tawh a ni mai thei.

Mahse chu ngaihdanah chuan buaithlak thil a awm: i natna i la chelh zui zel kha. Thudik tak chu, kha mi khan i ngaihdam a dil kher lo mai thei che. Ka tihpalh a ti ngai lo mai thei. Engah mah a ngai lo mai ni lovin, a tihsual pawh a hre miah lo maithei. A ni pawhin a theihnghilh daih thil kha i chhuang lum zel tihna a ni. Chu chuan chhungril atangin a ei che a.

I natna kha vuan reng suh. Huatna a thlen thin a, huatna chuan nangmah kha a ti keh vek mai ang che. Huatna hi tûr ina, mi dang na daih tura beisei ang a ni a. A thawk ngai lo.

Mahse huatna chuan damdawi tha zet a nei a: ngaihdamna hi a ni.

Isua kha ngaihdamna entirna tur fiah tak, dinhmun harsa tak maiah pawh ngaihdamna entirna a ni a. Krawsa khai kan a nih reng lai khan, amah khengbettute tan khan, "Ka pa ngaidam rawh, an thiltih hi an hre lo a ni" (Luka 23:34) a la ti thei a ni.

Mi dangte ngaidam thei tura harsa i tih em em chuan, Pathian ngaihdamna thilpek hlu tak hi hrechhuak la, ngaihdamna Isuan krawsa min pek kha a ni.

Kolossa 3:13 ah chuan, "Tu pawhin tu chungah pawh thupawi nei ang ula, indawh tawnin inngaidam tawn ula; Lalpan a ngaidam che u ang tak khân ngaidam ve rawh u" a ti. 

Greek tawngah chuan "indawh tawn" tih hian awmze dang "tawrhpui, tuar hram hram, tuar thei" tih lam a kawk a. A awmziaah chuan mi dangte dawhthei rawh tihna a ni.

Isua chuan, “Mi khawngaih thei takte chu an eng a thâwl e; Khawngaih an la hlawh dâwn si a" (Mat 5:7) a ti.

I nunah Pathian malsawmna ka duhsak che a. Chumi i dawn theihna kawng khat chu zahngaihna neih a ni.

Natna i tawrhin, duhthlan tur i nei a: chelh tlatin huatna chu i intihchhiattir thei a; a nih chuan ngaihdamna nun hahdam i chen thei bawk. Vawiin hian mi dangte ngaihdam thlang tlat ang che.

Ngaihtuah zui atan...

Eng natna nge i la vawn reng? Chumi chelh tlat chung chuan i nunah eng thil tha lo nge a thlen?

Natna i chelh tlat chu i thlah duh ang em? Tawngtaiin hun seng la, tinatu che ngaidam la, a nih loh pawhin ngaidam thei turin Pathian pawh tanpuina dil ang che.

Ngaihdamna avanga zalenna hi i tawk tawh em?

(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...