Saturday, July 6, 2024

THLAH MAI RAWH

_I Mamawh Tawpkhawk Pathianin a Pek Dan Che_

- Rick Warren 
- July 06, 2024
_"Mi hauhva a awm laiin a hau ve thung lo va, a tuar laiin a vau lo va; fel taka ngaihtuah ṭhintua hnenah chuan a inpe zawk a."_ (1 Petera 2:23)

Tuin emaw i taksa emaw i rilru emaw a hliam che a ni thei, thutlukna i siam a ngai. I thahrui kha dam nan emaw siamṭhat leh nan emaw i hmang thei.

Mahse a pahnih chuan i thei lo.

Isuan kan natna leh tihduhdah kan nihna te hi a hrethiam khawp mai. Khenbeh anih khan hliam tuar theihna zawng zawngah a tuar vek - a keah, a kutah, leh a luah te. Rom sipaite khan hruihrual 40-in an vua a. A luah hling lukhum an khumtir a. Krawsah an khengbet anih kha.

Isua hliam na berte kha a taksaa hliam a tawrh te kha ni lovin a rilru hliam kha a ni. Phatsan, hnawl leh nuihsawh a tuar a ni.

1 Petera 2:23-ah chuan heti hian kan hmu, _"Mi hauhva a awm laiin a hau ve thung lo va, a tuar laiin a vau lo va; fel taka ngaihtuah ṭhintua hnenah chuan a inpe zawk a."_ Krawsa a tawrh lai khan Isua khan a duh phawt chuan a tana bei let turin vantirhkoh maktaduai chuang pawh a ko thei, mahse a ko lo.

Hemi chungchang hi chu a Pa vana mi kutah a dah tawp mai a ni. _"Ka Pa ngaidam rawh, an thiltih an hre lo a ni"_ tiin a sawi zawk mah. A tawrhna te khan harsatna lian zawk a thlen a duh lo a ni.

He khawvela i natna te leh tihduhdah i tawrhna te paltlang tur chuan hnuaichhiahtu che i zalentir a ngai. I thinlungah huatna i neih chuan ṭhatna kawng i zawh thei lovang. Kawng dik zawh turin i dikna ni a i hriatte i dah bo ngam te pawh a ṭul.

A pawr lai tihfel ringawt khan hahdamna a thlen kher lovang che. Lo ching fel ta pawh ni la i natna a la bo kher lovang.

Tinatu che khan i ngaihdam a phu em? Phu lo. Mahse Pathian ngaihdam i phu bik hauh lo. Midang tan ni lovin nangma tan a ni ngaihdamna i hlan ni.

I chunga thleng zawng zawngte kha Pathianin a hmu vek a ni tih hi a rin ngam a. Rom 12:19-ah chuan heti hian kan hmu, _"Duh takte u, in phuba la suh ula, Pathian thinurna kian zawk rawh u, 'Phuba reng reng keima lak tur a ni, keiman ka thungrul ang,’ Lalpain a ti tih ziak a ni si."_

I nat khan Pathian eng thil nge thleng a hmu vek. A Fapa khenbeh a nih laia a ṭap ang khan a ṭap asin. Thil siamṭhat leh hi i hna ni lovin Pathian hna a ni; tinatu che kha engmah tawng lovin a awm mai mai lo tawp ang.

Mahse i ngaihdam hunin a ni zalen i nih ang- tu emaw tih sual avangin ṭul lo deuhin i tuar tawh lovang.

Hebrai 12:15-ah chuan heti hian a ti, _"Thlarau ṭha lo chu . . . amah chauh ni lovin midangte nunna pawh a tichhe ṭhin"_ (PHILLIPS). Huatna hi sual tur hlauhawm tak i lem ngai kher lo chi a ni. Hlim i duh ang chen zelin a ni i hlim ni.

Anih chuan i duhthlanna chu engnge ni ta le?

Ngaihtuah zui atan.

Engvangin nge natna thlen tawhtu che kha ngaihdam a harsat?

I ngaihdam duh miah loh khan engtinnge huatnain a tihnat che?

Tu emaw i ngaihdam ngai a awm em?  Engin nge i ngaihdamna dal le?

*Pathianin i sualna a ngaidam ang che*

I sualna khan Pathian lakah a ṭhen hrang che a. Pathian khawngaihna chauhin amah nena in inkar a siamṭha thei.

Bible chuan heti hian a ti, _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

Siamtu nena inzawmna nun nei tura i inpeih chuan heti hian ṭawngṭai rawh:

"Isu, ka sualna hian i lak ata min la hrang tawh lo sela ka duh a ni. Nang ka rin phawt che chuan ka sual min ngaidam ang tih min tiam a, min siam chhan ka zir ang a, engtik niah emaw i chatuan van inah min la hruai ang.

"I hmaah ka sual ka puang a, min Chhandamtu i ni tih ka pawm e. Ka sual ka puan a nang ka rin che chuan chhandamin ka awm ang tih min tiam kha. Chhandamna chu thiltih vang ni lovin, rinna avanga khawngaihnaa lo thleng a ni i tih hi ka pawm e. Ka Lal atan ka thlang a che. Ka nun zawng i tan ka hlan e.

"Ka nun zawng hi min siam chhan angin, mahni tan ni lovin i tana hman ka duh e. Ka nun i tan ka hlan a, min chhandam a i chhungkuaa min pawm turin ka dil a che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...