Saturday, July 27, 2024

THINRIMNA CHUAN THINRIMNA A HRING A, FINNA CHUAN DAWHTHEIHNA A HRING

_Min Tidanglam Ta_

- Rick Warren 
- July 27, 2024

_"A finna chuan mi dawhtheihna a neihtir a; tihsual haider chuan mi a tiropui ṭhin."_ (Thufingte 19:11, NIV)

Hliama awmten midangte an hliam ṭhin.

Mi tu emawin a tihnat che chuan tihnata a lo awm tawh vang a ni. Midangte chunga zawldawhna nun nei lo chu anmahni ngei pawhin zawldawhna an hrethiam lo. Mi hmangaihna nun nei loten hmangaih niin an inhre lo bawk.

Mi nunrawng, khâkna a khat, zawldawhna nei lo, mi tiel ṭhin, rilru ṭha lo, leh mi chaldelh deuhte chuan an nungchang zawng zawngin, "Natna ril tak ka nei! Hmangaih ka ngai a ni! Him lo riauin ka inhria!" tiin an au chhuak a ni.

Mi nghet leh hmangaihna dawngte chu khitiang khian an awm ngai lo. Mi, midangte hmangaihna dawng anga inngai leh nghet taka awm ni a inhria te chu an thil phalin midangte khawngaihna an ngah ṭhin.

Anih chuan miin an hliam chein engtinnge i lo chhan let ang? Mi tam tak tan chuan chawplehchilha an chhanna chu thinrimna a ni.

Hei hi rin dan tlanglawn tak chu a ni: I nunah thinrimna bêl lian vak lo i nei a. Chu bêl chu a khah tawh chuan i leihbuak a ngai- i thinrimna lan chhuahtir nan. Chu bêl chu a lo ruah chuan i thawveng huai ang.

He thu hi i rin chuan i damchhungin thinrimna nen in inbei tluan zak ang. Thudik tak chu hei hi a ni, thinrimna bêl chauh i nei lo. Thinrimna siam chhuahna khawl i nei zawk! Chu khawl chuan thinrimna hlir a siam chhuak ang. I thinrimna pakhat a kiang anga, a dang a siam chhuak zel ang. Thinrimna i paih chhuah tam poh leh a aia tam a siam chhuah belh ang.

Zir chiannain a tarlan dan chuan midangte dona hian midangte dona bawk a siam chhuah belh. Thinrimna puak keh hian thinrimna tam zawk a siam a, rei lo teah chu thinrimna chu chin ṭhanah i nei ta ṭhin a ni.

Chuvang chuan i thinrimna kha i leihbaw mai thei lo, kha thinrimna bêl kha a rawn khat leh thuai tho ang. Chutiang ni lovin thinrimna kha amaha i kiantir a ngai a ni.

Thufingte 19:11-ah chuan heti hian kan hmu, _"A finna chuan mi dawhtheihna a neihtir a; tihsual haider chuan mi a tiropui ṭhin."_ (NIV)

Ngaiawh leh kha i thiltum anih chuan i khingpui aia i ṭhatna a awm bik chuang lo. Fing taka chhang let tur chuan tihsual te haider rawh. Mi ṭawngkam ni lovin an natna en zawk la. Hmangaihna leh dawhtheihna lantir rawh.

American hla phuah thiam Edwin Markham chuan heti hian hla a phuah: "Min nawr chhuahna turin hei hian min bei a- zirtirna dik lo, helna leh hmuhsitnain. Mahse hmangaihna nen hnehna kan chang: kan zinga tel turin kan seng lut ve thung."

Mi tu emawin a tihnat che chuan, duhthlanna i nei. Thinrimnain i chhang let thei, thinrimna nasa zawk a thlen thung ang. Hmangaihna nen, a tihsual te haiderin i chhang let thei, sualna felnaa hnehin.

Ngaihtuah zui atan.

I nunah emaw midangte nunah emaw engtik khan nge thinrimna siamna khawl i hmuh? Engnge a rah chhuak?

Thinrimna ni lova finna leh dawhtheihnaa i chhan let tawh kha han ngaihtuah let teh. Engnge lo thleng?

Engtikah nge tu emawin i chungah thinrimna ni lova dawhtheihnaa a chhan let che? Engtinnge chu chuan a nghawng che?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...