Friday, July 19, 2024

PATHIAN CHU PA THILTITHEI TAK A NI

_I Mamawh Tawpkhawk Pathianin A Pek Dan Che_

By Rick Warren
— July 19, 2024
“Pathian thuchhuak reng rengin tih theih loh a nei lo vang.” [Luka 1:37]

Pathian chuan i buaina tawh apiangte chu a ching fel thei. Eng harsatna mah hi atan an lian lutuk thei lo a. Engmah a theihna piah lam thil a awm hek lo. Mahse i thiltih hmasak ber tur chu ama hnena thlen chu a ni. 

Tun karah hian eng thutlukna siam turin nge hmuak che? Eng tlang nge sawn ngai? Cancer? Suma buaina? Naupangten harsatna an tawk em? Thil i nghei ngai nghei theih loh a ni em? “Pathian thuchhuak reng rengin tih theih loh a nei ngai lo vang” [Luka 1: 37]. 

Jeremia 32: 27 chuan hetiang hian a sawi, “Ngai teh, kei Lalpa hi mi zawng zawng Pathian ka ni a, ka tâna tih harsa lutuk eng nge awm?” Pathian chuan insual puia a cho ang deuh che chu a ni, hetiangin, “Ka cho che. Buaina ka chinfel theih loh chu ngaihtuah rawh le. Ka tan thil harsa lutuk a awm chian em ni?” tiin. 

Naupang tam tak chuan hetiang deuh hian an sawi ṭhin, “Ka pa chuan engkim a ti thei! Ka pa chuan i pa a ngam!” Chu chu ka pa ka ngaihtuah ṭhin dan chiah chu a ni. Ka ṭhang lian ve a, ka mit a lo var ve ta zel a. Ka pa chuan tih theih loh a nei a ni tih ka lo hriat hun pawh a awm ve ngei mai. Thurawn min pek ṭhenkhatte chu a rin dan mai mai a nih changte pawh a awm. Ka thil rin dan chu a rin dan ang thova a ṭhat changte pawh a awm, a chhan chu pa famkim bik lo a ni. 

Ephesi 3: 20 chuan hetiang hian a sawi, “Chutichuan, keimahnia thawk ṭhîn thiltihtheihna hmanga, kan dîl leh kan ngaihtuah phâk aia nasa zâwka ti theitu hnênah ngei chuan” tiin. Ka mitthlaah hian chiang taka chambang a awm a. Suangtuahna ropui tak tak ka lo nei tawh ṭhin a. Thil tum ropui tak tak pawh ka nei. Mahse Pathian Pathian chuan, “Ka fapa, i nun i suangtuah theih zinga ropui ber chu han chhui la, ka tluk thei ang. A chungah ka awm thei ang” a tihna ang deuhin ka hmu. Amah chu Pa thiltithei tak a ni. 

I Pa vana mi hnen aṭang chuan engnge i beisei theih ang? “Ka Pathian chuan Krista Isuaa a hausakna ropui tak aṭangin in mamawh tinrêng a pe ang che u.” [Philipi 4: 19] Ani chuan hausakna ren rual loh, theihna hman sen loh, hriatna tawpintai nei lo, hun tawp thei lo a nei. I mamawh zawng zawng a pe vek thei che. 
 
Lalpa ṭawngṭaina chuan a entirna ang deuh min pe. Pathian chu kan Pa a ni a, thil pathum min petu a ni: vawiin atana kan mamawh [“nitin kan ei khawpa chaw”]; nimin lama thil kan tihsual avanga ngaihdamna [“kan chunga thil tisualtute kan ngaihdam angin, kan thil tihsualah min ngaidam ang che”]; naktuk atana venhimna [“sual tura thlemnaah min hruai lut suh ang che, misual lakah chuan min chhandam zawk ang che”] [Matthaia 6: 11-13] 

Tunlai ṭawngkam ang chuan Pathian chuan hetiang hian a sawi ang, “Thil innghahna zawng zawng – hun kal tawh, tun hun leh hun awm turte chu ka huap zo vek a ni tiin. I tun hun? Ka pe ang che. Hun kal tawh? I tichhe tawh a, mahse a pawi lo, ngaihdam i ni tawh e. I hmalam hun? Lungngai suh, hlau miah suh tiin. 

“Nimin lam hlawhchhamna chu ka lo chingfel ang a, vawiin beidawnna leh naktuk lam hlauhna nen a chhan chu Pa thiltithei tak nei ka ni si a.” 

Ngaihtuah zui atan. 

I hun kal tawha i tihsual avanga Pathian ngaihdamna i dil tur chu a awm em? Tawngṭaina hun hmang ang che – tichuan a ngaidam che a ni tih chu ring ang che!

Pathianin “nitin ei khawp chaw” – tun dinhmuna i mamawh chu engtin nge a pek che? 

Hun lo kal tura hlauhna chu engtin nge vawiin hian Pathian hnenah i pek ang? 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...