Sunday, July 21, 2024

PATHIAN CHU DANGLAM NGAI LO PA A NI

_I Mamawh Tawpkhawk Pathianin a Pek Dan Che_

- Rick Warren 
- July 21, 2024
_"Thilpek tha leh thilpek famkim zawng zawng chu chung lam atangin engte Pa hnen ata, a lo chhuk thin a ni, amahah chuan danglamna leh herna hlim reng reng a awm thei lo."_ (Jakoba 1:17)

Pathianah i innghat thei ang. Innghahnatlak leh mi rinawm a ni a. I rinna nghahna tlaka hlu a ni.

Mi ṭhenkhat chuan chhungkaw pa sawi lawk hleih theih loh, rintlak loh leh ngaihdan thlak zung zung ṭhin kan hre mai thei. An rilru sukthlek a zirin an danglam zung zung ṭhin. Pa rilru nghet lo chuan fate nun an tithlamuang lo ṭhin.

Mahse Bible chuan Pathianin awm nawm loh ni a nei ngai lo tih min hrilh. Thawh fuh loh tuk a nei ngai lo va. A rilru sukthlek a thlak thut thut hek lo. A ngai reng a, a rinawm reng bawk a ni.

2 Timothea 2:13-ah chuan heti hian kan hmu, _"Keini rinawm lovin awm mah ila, Ani chu rinawmin a awm reng a ni; Amah leh amah a inphat thei si lo va. "_ Ka rinawm loh lai pawhin Pathian chu a rinawm reng. Ka rilru ka thlak fo lai pawhin ani chu nghet takin a ding a. Innghahnatlak ka nih loh lai pawhin ani chu innghahntlak a ni reng. He khawvelah hian thil zawng zawng lo danglam mahsela innghahna tur pakhat ka nei: ka chunga Pathian hnathawh dan a ngai reng hi. Ka rilru sukthlek chu lo inthlak fo pawh nise ani erawh chuan min hmangaih a, a rilru a thlak ve ngai lo. Thil ṭha ka chunga a thlen laia min hmangaihna ang khan ka chunga thil ṭha lo a thlen lai pawhin min hmangaih reng.

Malakia 3:6-ah amah Pathian ngeiin heti hian a sawi - _"Kei Lalpa hi ka danglam si lo."_ Chanchin lawmawm a va ni em!

Naupangte leh nu leh pate tana harsatna lian ber - helna, chhiatna, huatna leh rilru natna thlentu chu - thutiam hlen loh hi a ni. Nu leh pa ṭhenkhat chuan, "Engtik niah emaw - hei hi ka tiam a che" an ti a. Mahse "Engtik ni emaw" hi a lo thleng ngai lo.

Mahse Pathian chu a danglam ngai lo. _"Pathian zawng, a kawng chu a tha famkim a; LALPA thu chu fiah a ni tawh; Amaha rinna ngaht zawng zawngte tan chuan ani chu phaw a ni."_ (Sam 18:30)

Pathianin a sawi phawt chuan ring mai rawh! Englai pawhin a rinawm a ni. A danglam ve ngai si lo. 

Ngaihtuah zui atan.

Pa fel tak emaw, pa sual tak emaw, fel leh sual inkar emaw i nei a ni thei. Mahse tuma'n he khawvelah hian pa fel famkim an nei lo. Pathian chu Pa famkim a ni tih hi engtinnge i hriatthiam?

Engtik lai khan nge a chunga i rinawm loh lai pawha i chunga Pathian a rinawm reng?

Pathianah rinna i nghat reng thei. Vawiin hian a chungah eng rinna nge i nghah theih le?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...