_I Mamawh Tawpkhawk Pathianin A Pek Dan Che_
Rick Warren
July 22, 2024
"Pathian an zawn a, an dap an dap a, an hmuh mial theih nan; nimahsela ani chuan min hlat lo theuh si a" Tirhkohte 17:27.
Tirhkohte Thiltih 17-ah chuan Atheni mite hnenah Paula khan sermon a sawi a, "Pathian chu templeah emaw in te takte ah emaw a awm ngai lo. Khung beh chi a ni lo. Khawvel pumpuiah hian a awm vek zawk a. Pathian chu hmun tinah a awm a ni" tih vel kha a sawi a nih a rinawm. Engvangin maw? Tirhkohte 17:27 ah khan, "Pathian an zawn a, an dap an dap a, an hmuh mial theih nan; nimahsela ani chuan min hlat lo theuh si a" a tih vang a ni. Pathian chu a hnai reng a, a remchang reng a, a biak theih reng bawk.
Tunlaiah chuan pa nei lo naupang tam tak an awm. An pate chu inah an awm tlem em em emaw, kal bo reng emaw, ni pawimawhah lang ngai miah lo an ni fo. Inah an awm ve pawhin, an awm tak tak lo. An phone an khawih a, TV an en a, emaw hna an thawk reng mai thin a. Tisa chuan an awm a, an rilru leh thinlung erawh hmun dangah a awm fo thin.
Chu vang tak chuan a ni Pathian hnaih chungchangah thil pathum kan hriat a tul:
*1. Pathian hian ngaihthah tur khawp chein a buai lutuk ngai lo.* Sam 145:18 ah chuan, Lalpa chuan amah ko tute chu a hnaih reng thin" tih a inziak a. Be lo tur khawp chein a buai ngai lova. I tawngtai duha ngaihthlak i inpeih khan i bulah a awm reng tawh thin. Hun thuhmunah mi tin reng mai harsatna hriat hi Pathian hian a harsat lova, a chhan pawh Pathian a nih vang a ni. "Ka rawn call let ang che" a ti ve ngai lo.
*2. Pathian chuan i mamawhnaah puih che a duh.* Ngenna i siamte kha a ning lova. Bible chuan, " Chutichuan, nangni mi sual mahin in fate thil tha pek nachang in hriat chuan, in Pa vana mi chuan a diltute chu thil tha a pe zawk em em dawn lo vem ni?" a ti a (Mat 7:11). He leiah chuan nu leh pa famkim lo te zet pawh hian an fate thil tha tihsak an duh thin. Pathian chu famkim a ni a. Thilpek lamah phei chuan a tha fe a ni. A nihnaah chuan, i mamawh pek che mnuam a ti.
*3. I natna te a tuarpui thin che.* Sam 34:18 chuan, "LALPA chuan thinlung lungchhiate chu a hnaih thin a, Rilrua inchhir apiangte chu a chhandam thin" a ti a. I nat khan, Pathian a bna ve a. I rûm khan, a rûm ve a. I thinlung a nat a, a kehchhiat a, i khum atanga thawh chhuah leh pawh theia i inrin loh khawp a nih lai khan, Lalpa chuan a hrethiam lutuk che a ni. I nat lai ai hian Pathian i hnaih ngai lo ang. A awm a, a ngaihsak reng che a ni.
Pathian chuan a pawisa che a, a rintlak a, a hnaih reng avangin i mamawhah puih che a duh. Chu chu thu lawmawm tak a ni.
Ngaihtuah zui atan...
Khawiah pawh awm la, Pathian chu a hnai reng a ni tih hriatna hian engtin nge nangmahah danglamna a thlen?
Pathian tan a holam lutuka i ngaih avanga a hnena i la thlen loh harsatna i nei em? I inpeih chuan, vawiin ngei hian thlen ta che.
Vawiin hian engin nge ti na che? I natnaah chuan amah i hriat theihna turin a hnenah tawngtai ta che.
(Lettu: Msa)
No comments:
Post a Comment