_I Mamawh Tawpkhawk Pathianin a Pek Dan Che_
- Rick Warren
July 13, 2024
_"He fiahna hi in rinna chu a tak ngei a ni tih a lantir. Mei hi rangkachak fiah nan leh tihthianghlim nan an hmang ang hian."_ (1 Petera 1:7, NLT)
Bible hian Pathianin i mamawh pek a tiam thu hi a sawi nawn fo: _"Tin, ka Pathian chuan Krista Isuaa a ropuina ngahzia ang zelin in tlakchhamna tinreng pawh a phuhruksak ang che u."_ (Philippi 4:19)
Mahse Bible hian thutiam zawng zawngah tihtur a awm thu min hrilh. Pathianin i mamawh pek che a tiamnaa thil pawimawh em em pakhat chu amah i rin hi a ni. Pathiana rinna i nghah tam poh leh Pathianin i mamawh a pe zel ang che.
Anih chuan engtinnge Pathiana rinna nghah leh zual chu i zir ang? Bible zirhona hmuna i ṭhut ve mai emaw in titihona ringawt aṭang khan rinna i neih belh mai lo. Rinna hi tihrawl ang a ni, i hman nasat poh leh a ṭhang lian nasa ang. I rinna i hman nasat poh leh pawn fânin a awm nasa ang. A fân nasat poh leh Pathianin malsawmna a vûr nasa thei che.
A chang chuan Pathianin i rinna pawh fân anih theih nan fiahna a dah fo ṭhin: _"He fiahna hi in rinna chu a tak ngei a ni tih a lantir. Mei hi rangkachak fiah nan leh tihthianghlim nan an hmang ang hian."_ (1 Petera 1:7, NLT)
I rinna fiah nan Pathianin fiahna pali a hman fo ṭhin a awm. Tunah khan heng pali zinga pakhat hmang hian fiah mek i ni. Heng fiahna zinga pakhat i paltlang hian Pathian i rinna a ṭhan zel theih nana hun remchang a ni tih i hre thei ang. Vawiin hian fiahna hmasa pahnih ka sawi anga, a dang pahnih chu naktukah kan zir ang.
*1. Nawrna fiahna.*
Nawrna fiahna chuan, "Engtinnge he rimtawngna hi i hmachhawn ang?" Nangmahah rinna i nghat dawn nge, Pathianah i innghat dawn? Sam 50:50-ah chuan heti hian kan hmu, Psalms 50:15 _"Tin, mangan niah chuan mi ko la; Ka chhanhim ang che, tichuan nangin mi chawimawi dawn nia."_ Harsatna i tawhin Pathian hnenah nge thildangah i intuk luh?
*2. Midangte hmanga fiahna*
Pathian i rinna fiah nan leh pawh fan nan midang a hmang fo ṭhin. He fiahna hian, "Engtinnge lungawi lohna hi i hmachhawn ang?" tiin a zawt a ni. Hringnunah hian lungawi lohna kan tawk fo. Kan eizawnna leh nupui-pasal inneihna te hian kan ruahman angin min hruai lo fo. Mahse hringnuna lungawi lohna thlen fotu chu mite hi an ni. Pathian chauhin min pek theih thil midangte hnen aṭanga dawn kan tum hian lungngaihna kan tawng ṭhin. Ṭawng dangin sawi ta ila, midangte kha i harsatna an ni lo. Midangte i hmachhawn dan kha harsatna chu a ni. Midangte hi i harsatna chhanna an ni bawk hek lo. Pathian hi a chhanna chu a ni. Midangte kha nangmah chhanchhuak tur che a i beisei chuan lungngaihna hmachhawn turin ruahmanna i insiam tihna a ni.
Jeremia 17:7-ah chuan heti hian kan hmu, _"LALPA ringtu, a rinchhan LALPA ni erawh chu a eng a thawl e."_ Pathiana rinna i nghah chuan engnge lo thleng ang? Isaia 49:23-a Pathian thutiam kha en teh: _"Mi nghaktute chu mualphovin an awm lovang."
Ngaihtuah zui atan.
Engtik khan nge nawrna fiahna i tawn? Engtinnge Pathianin i rinna pawh fan nan a hman?
Engtik khan nge midangte hmanga fiahna i tawh? Engtinnge Pathianin i rinna pawh fan nan a hman?
Tunah khan i nun englaiah nge Pathiana beiseina i dah a ṭul?
[Lettu: Mapuia Fanai]
No comments:
Post a Comment