_I Mamawh Tawpkhawk Pathianin a Pek Dan Che_
By Rick Warren
— July 11, 2024
“Thlamuanna ka hnutchhiah a che u; keima thlamuanna ka pe a che u; khawvelin a pek angin ka pek loh che u hi. In thinlung mangang suh se, hlauh pawh hlau suh se.” [John 14:27]
Pathian chuan rilrua thlamuanna a pe a che. Dik tak chuan, Pathian hming pakhat chu Jehovah Shalom a ni a, a awmzia chu “Thlamuanna Pathian” tihna a ni.
Kan thil mamawh em em pakhat chu thlamuanna neih hi a ni. Pathian chuan rilrua thlamuanna min tiam a, i nei lo a nih chuan, eng vangin nge ni ang. Heng kan thil sawi tur pathumte hian i thlamuanna chu an laksak thei che:
*I nunah i thunun theih loh thil a thlen changin thlamuanna chu i hloh ṭhin.* Hringnuna thil thleng tam zawkte hi kan thunun theih loh an ni thung. Kawnga lirthei tawt lutuk [traffic jam] ah an awm avangin thil pawimawhah an tlai phah a. Nupa tuak ṭhenkhat chuan fa neih tum em emin hma an la a mahse an hlawhchham tho. Ṭhenkhat thung chuan an hna an chan thut a, an chhungte engtin nge an chawm ang tiin buai takin an hawihai a. Chutiang thil – lian leh te- a thlen chang chuan, kan beidawng a, rilrua thlamuanna kan neihte kan hloh ta ṭhin a ni.
*Mi ṭhenkhat siamṭhat harsa tak i hmuh changin thlamuanna i hloh bawk.* Lungawi lohna hmuh dan ṭha ber pakhat chu mi tute emaw thlak danglam tum a ni ang. Mi tam berte hi keimahni duh dan chuan kan thlak danglam thei ngai lo vang. A theih dawn loh a ni tih kan hriat reng lai pawhin, tih chhin hram kan tum fo! Chu chuan hahdamna kan neih te a ei chhe zui ṭhin.
*Buaina i neihte hriat thiam a harsat chang chuan i thlamuanna ei chhiat a ni bawk.* Hringnun hi a dik vek lem lo tih kan hria. Thil engkim hi ṭha takin a kal kher lo bawk. A chhan kan hriat loh thil eng emaw avangin kan buai a, kan mangang a, kan hah ṭhin.
Pathian thlamuanna neitu nun chu harsatna hrang hrang lakah a awl ang tihna a ni miah lo. A awmzia zawk chu i khawvel a buai nuai nuai pawhin ngaihtuahna thiang tak hmangin hahdam takin i mu thei ang tihna a ni zawk mah.
Pathian thlamuanna chu i nunah engtin nge i neih theih ang? Pathian thlamuanna chu i thawh chhuah emaw i dil chhuah emaw a ni ngai lovang. Isua chuan hetiang hian thu min tiam, “Thlamuanna ka hnutchhiah a che u, keima thlamuanna ka pe a che u; khawvêlin a pêk ang ni lovin ka pêk che u hi. In thinlung mangang suh se, hlauh pawh hlau suh se,” tiin [Johana 14: 27].
Ṭawngṭaiin Pathian lam hawi rawh. I rilrua thil awmte chu hrilh la. A ṭhatna chu thlir ang che. A thlamuanna chuan i rilru leh ngaihtuahna a fan chhuak ang.
Ngaihtuah zui atan.
Eng buainain nge nangmaha thlamuanna i neih chu laksak che?
Engtin nge Pathian chuan i harsatna chu amah hnaihna hmanrua atan a hman a, thlarauva i ṭhan len theih nan ṭanpui che?
Pathian thlamuanna i chen lai chuan engtin nge i nun chu a inthlak danglam?
Pathian inrem takin in nung em?
I sualna chuan Pathian lak atangin a la hrang che a. Pathian chauhin amah nena inlaichinna dik nei turin a siamrem leh thei ang che.
Bible chuan, “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni.” [Ephesi 2: 8-9]
Nangmah Siamtu che nena inrem taka khawsak i duh chuan hetiang hian ṭawngṭai ang che:
“Isu duhtak, ka sual avanga nangmah hlata awm chu ka duh tawh lo. I thutiamah chuan Isua ka ring a nih chuan, ka thil lo tihsual tawh zawng zawng min ngaidam dawn tih min hrilh a, ka dam chhan chu min hmuhtîr dawn tih min hrilh bawk, tichuan i chhungte zingah chuan min la lawmin eng tik niah emaw chuan chatuan nun nei turin vanramah min la hruai danw tih ka hria.
Ka sual a ni tih hi ka pawm bawk, i ngaihdamna ka rawn dil a ni. Isua chu ka sualte min lakbo sak turin a thi a, i kaitho leh a ni tih ka ring bawk. Isua chu min Chhandamtu a ni tih ka pawm a, ka Lal a nih anga zui ka duh bawk vawiin aṭang hian.
Ka nun hi min siam ang taka hman ka duh a. Min hruaiin i duhzawng tih min zirtir ang che. Isua hmingin ka dil a che. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu* : Peka]
No comments:
Post a Comment