I mamawh tawpkhawk Pathianin a pekdan che
- Rick Warren
- July 14, 2024
_"He fiahna hi in rinna chu a tak ngei a ni tih a lantir. Mei hi rangkachak fiah nan leh tihthianghlim nan an hmang ang hian."_ (1 Petera 1:7, NLT)
Pathian chuan _"Krista Isuaa a ropuina ngahzia ang zelin in tlakchhamna tinreng pawh a phuhruksak ang che u."_ tiin min tiam (Philippi 4:19). Mahse thupek apiangah tih ve tur a awm. Pathianin i mamawh a pek che a mal a sawm zel theih nan che a chunga rinna nghah i zir a duh a ni.
Hrehawmna te hmanga i rinna pawh fan anih hmanga Pathiana rinna nghah i zir zel hi a pawimawh hle mai. I rinna pawh fan anih poh leh Pathian malsawmna i dawnna kawng a inhawng zau zel tihna a ni.
Nimin khan Pathianin i rinna ṭhan len nana fiahna a hman ṭhin pahnih - nawrna fiahna leh midangte hmanga fiahna kan sawi tawh a. A dang pahnihte chu hengte hi an ni:
*3. Tumruhna hmanga fiahna*
He fiahna hian: "I intiamkamnaah i ding nghet dawn em?" tih zawhna chhanna a pe ang che. Hringnun hi intiamkamna khawvel a ni a. Tunlai kan harsatna chu mite hian tun hun leh nakin hun atana thil pawimawh em em pahnih emaw pakhat emaw leka nghet taka ding lova thil tam tak chunga rilru zatve chauh pe a kan awm ṭhin hi a ni. Chu chu hun khawhralna mai a ni si!
Mi chak loten chhuanlam an siam mek laiin mifingte chuan ti tura an intiam tawhte ti turin hun leh kawng an zawng ṭhin. Mi chak lo nge mifing nih i duh zawk le? He tumruhna fiahna hian eng ang mizia nge i neih tih a rawn tifiah ang.
*4. Ngaih pawimawh zawng fiahna*
Hei hi fiahna pawimawh ber mai a ni a, "I nunah tunge hmasa ber ang?" tiin a zawt che a ni.
Engtinnge i nunah Pathian a pawimawh ber tak zet a ni tih i hriat ang? Heng zawhna te hi mahni han inzawt teh: Engnge i ngaihtuah nasat ber? Khawiah nge i sum i hman hmasak ber? Engtinnge i hun i hman? I chhanna ten i nuna i dah pawimawh hmasak te an tarlang ang.
He ngaih pawimawh zawng fiahna hi i paltlang chuan Pathianin chatuan lawmman a dah a ni. Bible chuan heti hian min tiam, _"Thlemna tuar hram hramtu chu a eng a thawl e; fiaha a awm hnuin nunna lallukhum, Lalpan amah hmangaihtute hnena a tiam chu a hmu dawn si a."_ (Jakoba 1:12). Nunna lallukhum hi i nuna Pathianin thlentir a duh zawng zawng lantirna a ni - malsawmna pek che a duh zawng zawng, i mamawh pek che a duh zawng zawng, leh vanrama lawmman pek che a duh zawng zawng. Intiamkamna ṭha tak a va ni em!
Ngaihtuah zui atan.
Eng chenin nge i intiamkamna anga awm niin i inhriat? I intiamkam anga i awm thei nan engtinnge i rilru zawng zawng i pek theih ang?
I dah pawimawh zawng lantir thei zawhna pathumte khi mahniin chhang la. (Engnge i dah pawimawh ber ni a i hriat? Khawiah nge i sum i hman hmasak ber? Engtinnge i hun i hman ral?)
I chhan dan a zirin engtinnge i ngaih pawimawh zawng i thlak a ṭul?
[Lettu: Mapuia Fanai]
No comments:
Post a Comment