Saturday, June 8, 2024

SUM LEH PAI REMCHEM TURA RUAHMANNA ṬHA SIAM

 Hun Rei Daih Thil Ngaihlu Tura Nun Buatsaih


- Rick Warren 

- June 08, 2024



"Mi fing chuan sum leh pai renchemin hahdam tak leh nuam takin a awm a, mi â erawh chuan sum an neih ve leh an khawhral zung zung ṭhin." (Thufingte 21:20, GNT)


Kum 42 chhung pastor ka lo ni ta a, nupa tam tak nupa kara harsatna nasa tak tawk, inṭhen ta hial te ka kawm nasa hle. Nupa tam zawk inṭhen chhan chu uirena vang a ni lo tih ka sawi thei. Kut inthlak vang pawh a ni hek lo.


Leibâ hi a ni! Kum 2023-a zirchiannaah chuan an kawm chian zahve aia tam mah hian kawppui leiba nei mi chu inṭhenna tham ni a  an rin thu an sawi. 


Inlaichinnaah hian leiba hian harsatna tam tak a thlen a ni tih hi thil mak a ni lo. Bible chuan sum leh pai remchen thiam loh hi âtna a ni a - chu âtna chuan a tawpah thil ṭha lo a thlen ṭhin a ti a ni. Thufingte 21:20-ah chuan heti hian kan hmu, "Mi fing chuan sum leh pai renchemin hahdam tak leh nuam takin a awm a, mi â erawh chuan sum an neih ve leh an khawhral zung zung ṭhin." (GNT)


Kan khawsak dan hian tuna leia nakina a man pe turin min kaihruai fo ṭhin. Eng emaw lai khan America rama mipui nawlpuite khuan an thawh chhuah $ 1000 zelah $1300 chu an bat theihna card (credit card)-ah an dah an ti. Chu chuan leiba a thlen nghal pang mai, Pathianin chu chu âtna a tih chu a ni.


Ka ṭhian, tumah hi leiba tam takah an tawlh lut thut lova - an chhuak nghal thut lo bawk. Sum leh pai chungchangah awmze nei taka innghahna tlaka din i duh chuan tum ran chunga bul i ṭan a ngai. Chu intiamkamna mumal tak i siam zawh chuan chumi puitlin tur chuan ruahmanna i neih a ṭul.


Ka nu leh paten 10-10-80 tih hi ka naupan lai aṭangin min zirtir. Sum leh pai enkawl chungchanga thil ṭha tak a ni.


• Pathian hnenah 10% kha pe let rawh. Pathianin amah i dah hmasak berna laiah mal a sawm ṭhin che a ni.


• 10% dang chu i hma hun atan dah ṭha rawh. Sum i thawh chhuah apiangin dahkhawl turin inzir rawh.


• 80% la bang zawng chuan khawsak reh rawh. Mi â te chauhin an neih zawng zawng an khawh ral ṭhin.


A dik i ti emaw ti lo emaw, Pathianin sum leh pai hi fiah nan che a hmang ṭhin. I mawhphurhna fiah nan a hmang. Sum leh pai i enkawl dan kha Pathianin vanah a la zawt ang che, "Leia ka thilpekah che khan mawhphurhna dik tak i la em?" tiin.


Chu zawhna i chhan dan tur chu vawiina i thutluknaah hian a innghat dawn. Pathian thilpek che ṭha taka enkawl turin ruahmanna fel tak siam la, a hnenah pe let la, nakin atan khawl la, a ṭulah chauh hmang rawh.


Ngaihtuah zui atan.


Sum leh pai chungchangah hian i tan engnge thlemna lian ber?


I thawh chhuah aṭanga 10% Pathian hnena pek nge khawl harsa i tih zawk? Engvangin?


Engtinnge i fate emaw i chhungte emaw Pathianin sum leh pai chunga kan mawhphurhna hi i zirtir ang?


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...