Sunday, June 9, 2024

MAWHPHURHNA LA NGAM TURIN I INBUATSAIH EM?

_Hun Rei Daih Thil Ngaihlu Tura Nun Buatsaih_

- Rick Warren 
- June 09, 2024
_"Mi â chuan a rilrû ang ang a tilang mai a, mi fing erawh chu a inbengdâi ṭhîn."_ (Thufingte 29:11)

I puitlinga mawhphurhna i la ngam ta a ni tih tilang chiangtu ṭhenkhatte chu nawr chepna te, harsatna te leh natna te thinrim miah lova i lo dawnsawn theihna kha a ni. Mawhphurhna lak dan ṭha ber chu i rilru sûkthlek lo thunun thuai kha a ni. Miin a tihnat che avanga i thinrimna puah chhuah pui phawng phawng lovin an chunga thil ṭha ti zawk turin Pathianin a duh che a ni.

Kan rilru a awmte kan lanchhuah tir dan tlanglawn ber chu kan ṭawngkamin a ni. Thufingte 29:11 chuan, _"Mi â chuan a rilrû ang ang a tilang mai a, mi fing erawh chu a inbengdâi ṭhîn"_ a ti.

Mawhphurhna la thiam mi nih i duh chuan, i ka i an hmain rilru fim taka ngaihtuah ṭhin turin Pathianin a duh che. I rilrua awm apiang i sawichhuak nghal ringawt tur a ni lo. I ṭawng hmain i ngaihtuah hmasa tur a ni. Chu chu mawhphurhna lak dan chu a ni.

Bible chuan, _"Ka hrilh a che u, miten thu lawi lo mai mai an sawi zawng zawngte chen hian rorelna ni-ah an sawi fiah a la ṭul ang"_ a ti. (Matthaia 12:36). Vanram kan thlen hun chuan, ngaihtuah chiang mang lova thu kan lo sawite zawng zawng avanga rorelsakin kan awm ang. Kan ngaihtuahna chhungril kan thunun reng thei lo. Mahse, kan sawichhuah dan te mil zelin Pathianin ro min relsak ang.

Mawhphurhna kan lantir dan kawng khat chu mi tinatute chunga rilru dik lo put loh hi a ni. Tuin emaw dawtin a puh che emaw, a rûksak che emaw, dik lo takin i chungah a ti emaw, an rilru ang lek puin an chungah ṭuan suh. Chutiang ni lovin - Pathian tihdan zawkin ti la, chu mi chu ngaidam rawh. Pathianin dik takin a ti dawn tih ring rawh. Tichuan hmalam panin i kal zel thei ang.

_"Sual ngam chein awm suh la, ṭhatnain sual chu ngam zawk rawh."_ (Rom 12:21)

Tuin emaw kawngpui tawt laiah rawn tlan pelh ṭalh a tum chein engtinnge i lo dawnsawn? Tuin emaw i chungchang dik lo takin a sawi tih i hriatin engtinnge i chhan? Miin a ṭawngkam emaw, a thiltih emaw, an ngaihsak lohna che hmangin emaw a hliam chein i natzia an hriat theih nan an tihdan ang chiahin an chungah i ti ve em?

Isua hnung zui tura inpe kan tih hian amah chawimawi thei tur thil tih a, mawhphurhna lak hi a entir a ni. Duhthlanna i siam dawnin i ṭawng chhuah hmain ngun takin ngaihtuah rawh. Tichuan khawngaihna leh ngaihdamna thlang ṭhin ang che.

Ngaihtuah zui atan.

I rilru a nat hunin ngaihtuah hmasa miah lova i chet thawt thawt lohna turin eng ruahmanna nge i siam ang?

Engvangin nge thil i lo dawnsawn dan tur thunun zirna hi rinna lam thil a nih?

Thil i dawnsawn dan tur i lo zir lawknaah engtinnge midangin mawhphurhna i chungah an dah ang?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...