_Hun Rei Daih Thil Ngaihlu Tura Nun Buatsaih_
By Rick Warren
— June 28, 2024
“Tleirâwlten engtin nge an awm dân an vawn thianghlim ang? I thute zâwmin.” [Sam 119:9]
Kum zabi 21naah hian mipat hmeichhiatnaah thianghlim takin a nun theih ang em? Inneih hmaa inpawlna hmang lo leh nupui pasal neih hnuah invawng thianghlim zui turin?
Aw! Invawng thianghlim chunga bul ṭan chi a ni.
Bible chuan hetiang hian a sawi, “Tleirâwlten engtin nge an awm dân an vawn thianghlim ang? I thute zâwmin” [Sam 119:9]. Kum zabi 21naa mipat hmeichhiatnaa invawng thianghlim tur chuan, tehkhawng mumal tak i mamawh ang. Nangmahin tehkhawng i insiam thei a, Pathian tehkhawng i hmang thei bawk. I nun tana ṭha ber chu nangmahin nge hria a, amah zawkin tih chu i hriat a ngai.
Pathian chuan thil eng emaw zat mite lawm vak loh hi a sawi nual a, mipat hmeichhiatna chungchangah a ni lehzual. A awmzia chu nangmah aiin a hre zawk daih tihna a ni. I thlan fel a ngai a, i hre thiam lo a nih pawhin, i duh lo a nih pawhin, mite zingah a lar lo a nih pawhin, Pathian Thu anga i awm a ngai ang, mite chuan eng ang pawhin lo sawiin lo hnar mahse.
Chutianga invawng tura thu tlukna i siam thei lo a nih chuan he khawvel bawlhlawh takah hian thianghlima nun i la inpeih lo tihna a ni. Pathian tehkhawng chauh hmangin i intithianghlim thei ang.
Pathian chuan mipat hmeichhiatna chu a ngaihtuah a. Ama rilru aṭanga lo chhuak a ni, amah ngei chuan tehkhawng chi hrang hrang pawh a duang bawk. A tehkhawng chu a inthlak ve ngai lo. A chiang kak a, mite chuan ngaihdan hrang hrang pawh lo nei ve mahse a dang chuang lo.
Mipat hmeichhiatna chu taksa thil a ni mai lo. Thlarau thiltih tisa, inlaichinna, dan leh hrai leh rilru thlenga nghawng nei a ni. Mipat hmeichhiatna chu taksa thiltih satliah ni se, inchibai ang lek a ni ang. Mipat hmeichhiatna i hmanpui mihring chu tu pawh ni se a ngai vek. Mahse taksa inzawmna satliah a ni lo.
Chiang taka Bible sawi dan chuan mipat hmeichhiatna chu nupa inneih thuthlunga awm duhte tan bik liau liaua ruat bik a ni. Chu mi pawna mi reng reng chu, inneih hmaa inpawlna emaw inneihna pawn lama mi chuan mihring rilru leh thlarau nunah, taksa thu hlaah pawh a ni ang, a tina ang che.
Pathian tehkhawngte chu i tan an ṭha ber ngar ngar. Chutiang zuia I nung duh a nih chuan – chumi pawn lamah awm theihna chu pumpelh tum ngar ngar ang che – chu chu inpekna leh mahni invawnna [commitment] aṭanga inṭan a ni.
Ngaihtuah zui atan.
Eng vangin nge thlemna i tawh hma ngeia Pathian tehkhawng anga nun thianghlima nung tur chuan i inserh hran tlat ang?
Khawtlang nun hi em ni mipat hmeichhiatna kawnga thlemna hawisan tiharsatu chu?
Mipat hmeichhiatna kawnga sualna chu engnge a nghawng kal zel?
*Isua hnenah chuan i inhlan ve tawh em?*
Bible chuan Pathian, a Fapa Isua Krista kaltlang chauh chuan vanram i kai thei a ni tih a sawi: Nangmah chuan vanram i kai thei lo: “Rinna avânga khawngaihnaa chhandam in ni, chu chu in thawh chhuah a ni lo, Pathian thilpêk a ni,” tiin. [Ephesi 2: 8-9]
“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.
“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamnatu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[ *Lettu* : Peka]
No comments:
Post a Comment