Friday, May 3, 2024

THILPEK PETUTE TANA PATHIAN THUTIAM

Rinna Huaisen

By Rick Warren
— May 03, 2024
“Pe rawh u; tichuan, pêk in ni ang; ṭhahnemngai taka teh chhuaka, beng mukin, sâwi liam zawih zawih khawpin in ângchhûngah pêk in ni ang. Tehna in hman ngei khân tehsak in ni ang,” [Luka 6:38]

Buh tam tak seng khawm tur chuan rinnaa buh chi tam tak miin a tuh a ngai hmasa. 

Ka nupui Kay-i nen hian chutiang chuan vawi zaa vawi za tam kan lo ti tawh. Kum 10 liam taa sawma pakhat kan pek ṭhin chu sawmkuaah kan pakai ta vawiinah chuan. Pathian chu pekah i hneh ban thei lovang tih thu entirna chu ka ni ve thei hial ang. Kum 40 chuang ka lo bei ve ta a, ka la tlawm ngar ngar a ni. 

Rinna pawk tawka phun tur chuan Isua thutiam pahnih chu i vawn ve reng a ngai ang. Pakhatna, Luka 6: 38 ah chuan hetiang hian kan hmu, “Pe rawh u; tichuan, pêk in ni ang; ṭhahnemngai taka teh chhuaka, beng mukin, sâwi liam zawih zawih khawpin in ângchhûngah pêk in ni ang. Tehna in hman ngei khân tehsak in ni ang” tiin. 

Tun dam chhung hunah hian nakina seng tur i ngah theih nan tunah i thil phal a ngai. “Midang te i pek dan milin Pathianin a la pe ve ang che.”

Tichuan, Marka 10: 29-30 ah chuan amah avanga an kalsan zawng zawngte chu an la hmu let leh dawn a ni tiin a sawi. Hetiangin, “Thu dik ka hrilh a che u, tu pawh keimah avâng leh Chanchin Ṭha avâng in emaw, unaute emaw, farnute emaw, nu emaw, pa emaw, fate emaw, ramte emaw kalsan chuan, tûn dam chhûng la la hian in te, unau te, farnu te, nu leh pa te, fa te a lêt za an hmu ngei ang, tihduhdahna te leh hun lo thleng tûra chatuan nun nên,” tiin.

Pathian chuan miin a ram avanga a chan leh a lo hlan tawh te chu a leh za an la neih tur thu a sawi. A leh za awmzia chu i hria em? A punna za zelah 10,000 tihna. Sumdawng chutiang tiam thei chu i hre tawh ngai em? Pathian leh a Fapa chauvin chu chu an ti thei ang. Nangmah ang mihringte nen hian kum 2000 chuang lai an lo thawk ho tawh nghe nghe a ni. 

Chung chu Pathian thutiam chu a ni. I pawm thei a, i pawm lo thei bawk ang. Mahse Pathian thutiam chu i pawm lo a nih chuan he zawhna hi ka zawh che a ngai ang: Eng vangin nge Isua chuan a chhandam che a, vanramah chuan a hruai ang che? Chu chu Isua ngai reng kha a ni. Eng vangin nge mi thenkhatte chuan Pathian chu an chatuan chhandamna atan an rin a, an sum enkawltu atan an rin leh si loh? 

Pathian rin hi thil finthlak tak a ni a, tam tak i seng theih ngei nan buh tuh a hun lai hian ṭhahnemngai takin tuh tlat ang che. 

Ngaihtuah zui atan. 

Pathian chuan engnge pe tur chea i beisei? Chu thilphalna chu midang chungah i lantir ve em? 

Pathian chuan engnge hlan tura a tih che? Engnge amah chu i chhanna? 

Pathian thutiam hauh tih chu engnge a awmzia? 

[*Lettu*: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...