Rinna huaisen
By Rick Warren
— May 02, 2024
“Hei vâng hian theihtâwp chhuahin, in rinnaah chuan ṭhatna telh ula, in ṭhatnaah chuan hriatna.” [II Peter 1:5]
Admiral Hyman Rickover-a kha US nuclear Navy pa a ni tiin an sawi ṭhin. Naval Academy zir chhuak pakhat hi inkawmna a neihpui ṭumin zawhna tumtlang zet hetiang hian a zawt ta a: “School-a i zir lai leh i nun hrim hrimah i theihna sang ber i hlan ṭhin em?” tiin. Chu tlangval chuan “aw” a ti zet a, a hnuah chuan dik hlel deuhin a hre leh ta a. “Aih” a ti leh ta zawk a, “Ka theihtawp ka chhuah ziah lem lo” tiin a chhang ta zawk a. Admiral Rickover-a chuan thip zeta melh chungin “Engvangin nge i theihtawp i chhuah loh?” a ti ta khur khur mai a.
Eng vangin? Chu zawhna chu chu tlangval thinlungah chuan a ri ta tluk tluk mai a, a nuna kawng thar zawhtirtu a ni zui ta a ni. Chu sipai ṭang hlim Jimmy Carter-a chu US President 39na a ni ta hial a, a hnu zelah chuan lehkhabu Eng vangin nge a ṭha ber hlan a nih loh ang? (Why not the best ) tih chu a ziak ta hial a ni.
Pathian tan i theihtawp i chhuah duh a nih chuan, sipaiten an thil tih ṭhin pathum ang chu i tih ve a ngai ang.
1. *I thihchilh tur thil i hriat chian a ngai.*
Sipai reng rengte chuan thil eng emaw an nun aia pawimawh zawk a awm tih an hria. Isua pawh khan chutiang chu a sawi: “Miin a ṭhian tân a nun a pêk aliama hmangaihna nasa zâwk tu man an nei lo” [Johana 15: 13]. Hmangaihna reng reng miin an sawi dan angin i chhut ngai lovang, hmangaihna avanga an inpekna leh an inhlan ngamna atanga teh a ni thin.
2. *I nawmna i hlan a ngai.*
Sipaite chuan chu chu eng lai pawhin an nunpui. Hun harsa tak takah an che a, sum tam tak an hlawh kher lo. Thil tam tak an chan thin a ni.
Pathian tan mi ropui tak emaw mi ṭha tak emaw nun nuam taka nung chung chuan i ni ngai lovang. Nangmah leh nangmah i inphat ngam dan ang leh tuar i huam dan angin i ni zawk ang. I tuarna a nasat poh leh i nun chu a ropui deuh deuh ang. ‘Krista sipai rinawm angin hrehawm mi tuarpui ve rawh.” [II Timothea 2: 3]
3. *Tibuaitu i tihbo a ngai*
“Sipai chu a hotu tilâwm tûrin khawvêl thil dangah a inhnamhnawih ngai lo.” [II Timothea 2: 4]. Sipai chuan an hotu thu zawm zat zat tur chuan anmahni tibuaitu a awm a thiang lo tih an hria ang.
Mi ropui nih i duh a, nangmaha theihna sang ber nun chhuahpui i duh a nih chuan, i hun, i sum leh i chakna tam zawk chu chatuan daih turah chuan i hman a ngai tih i hre thei ang a, i hun, i sum leh i chakna chu thil ral mai turah chuan a tlem zawk zel i hman a ngai bawk ang.
Pathian tan i theihna sang ber i hlan duh a nih chuan heng rahbi pathum hmang hian bul i tan dawn em ni ang?
Ngaihtuah zui atan.
Engnge thihchilh i inhuam? Chu zawhna chu ngaihtuah thiam pawh a harsa mai thei, mahse eng vangin nge chu zawhna chu a pawimawh?
I nuna thil pawimawh zawk nei turin eng thil dang nge hnawl ngai ang?
Pathian hmathlir tiṭhuanawp thei thil chu thil ṭha a awm thei ang em? A entirna chu engte nge ni ang?
*Isua chu engtin nge i thlan?*
Pathian chuan a ṭhatna chu Fapa, Isua Krista kaltlangin a tarlang tawh. Bible chuan, “Pathianin khawvêl a hmangaih êm êm a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zâwk nân” tiin. [Johana 3: 16]
Pathianin chatuan nunna a tiam chu chang turin Pathian ring turin i inpeih tawh em? I inpeih tawh chuan, he ṭawngṭaina tawite hmang hian inhlan ang che:
“Lalpa duhtak, Isua Krista chu i Fapa a ni tih ka pawm a. Ka sualte thupha ka chawi a, i ngaihdamna chu ka dil a ni. Isua chu ka sualte la bo turin a thi a, i kai tho leh a ni tih pawh ka ring e. Isua chu Chhandamtuah ka pawm duh a, vawiin aṭang hian ka Lalpa atana zui turin ka inpeih e. Ka nun hi hruai la, a duhzawng tih min zirtir ang che. Isua hmingin ka dil e. Amen.”
Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e.
[*Lettu*: Peka]
No comments:
Post a Comment