_Rinna Huaisen_
- Rick Warren
- 4 May, 2024
_"Samari khuaa mi tam tak chuan, 'Ka thiltih apiang min hrilh zêl' tia khâ hmeichhiain a hriattîr avâng khân Isua chu an ring ta a."_ (Johana 4:38)
Kum kal ta khan PBS chuan America-a chhungkaw larte chanchin a tichhuak a. Pastor-te telh ve an duh si a, ka tel ve duh leh duh loh min rawn zawt a. Ka kâ aṭangin DNA tihna turte an rawn la a, kum sang tam tak kal ta a ka chhungkaw ṭobul chhui nan an hmang a. Lal thlah ka nih thu an hmuchhuak lo; mahse, thil ngaihnawm tak tak an hrechhuak ṭeuh mai a, TV-a chhuah atan an remkhawm ta a.
An thil hmuhchhuah pakhatah chuan min thlahtute zingah Pathian mi tam tak an lo awm reng mai a lo ni a. Min thlahtuten an thlah kal zel te tana an ṭawngṭaina leh zirtira an siamna rah sengtu ka lo ni reng a. Ka nunah malsawmna ka dawn tam tak ka hmu ṭhin a a chhan chu, ka chhungte zingah an thlah lo la awm zel turte tan a ṭawngṭai tlat ṭhin an awm vang a ni.
Mi ṭhenkhat chuan, "Min thlahtute zingah chutiang an awm lova; mahse, chutiang thawnthu ropui chu neih ve ka duh a ni" in ti mai thei.
Nangmah khan bulṭan rawh! Chutiang thawnthu ropui chu ṭan rawh - chatuan hawlhtlang thei - i chhungkua hmangin. I thlah lo la awm zel turte chu malsawmin an la awm ang; a chhan chu, nangmah khan Pathian ngaihsakna chi i tuh a, i ṭawngṭai a, i beidawng duh ngai lo, i dam hun chhungin a rah seng lo mah lo. Bul i ṭan chuan, i thlah lo la awm zel turten malsawmna an rochun ang.
I hun kal tawh aṭangin rah ṭha leh ṭha lo i seng a. Engvangin? A chhan chu, nangmah chauhvin i tuh lo. I duhthlanna i fimkhurpui a ngai, i nun khan i thlah lo la kal zel turte a nghawng a ni. Hun kal tawh i thunun thei lo, mahse, natna te, tihduhdahna te leh Pathian duh loh zawng zawng zawng te chu i phelh thei. I chhungkaw kal kawng chu i thlak thei a ni. Ṭawngṭaina leh hmangaihna leh thilphalna leh rinna chi te tuh in Pathian ngaihsak chhungkaw thawnthu i ziak thei a ni.
Isua chuan Johana 4:38 ah, _"Samari khuaa mi tam tak chuan, 'K thiltih apiang min hrilh zêl' tia khâ hmeichhiain a hriattîr avâng khân Isua chu an ring ta a."_ a ti.
He khawvelah hian a rah i seng ve ngai lo a ni thei. Mahse, i rinawmna chuan i thlah lo la kal zel turah leh chatuan thlengin nghawng a nei zel ang.
Ngaihtuah zui a tan.
I chhungkaw thawnthuin i nunah eng angin nge nghawmg a neih?
I nuna i tuh teah khan engnge i tu lo la awm turte leh i tuchhuan lo la awm turten seng se i tih?
Fa i neih lo a nih chuan, i rinawmna rah seng thei rinna a i chhungte chu tute nge?
*Isua a i duhthlanna chu engnge?*
Pathian chuan a ṭhatna chu a fapa Isua Krista kaltlangin a tilang a. Bible chuan, _"Pathianin khawvêl a hmangaih êm avângin ama hrin ngei, a Fapa mal neihchhun a pê a; mi tûpawh amah ring apiang chu an boral lo vang a, chatuana nunna an nei zâwk ang."_ (Johana 3:16)
Chatuan nunna a tiam te a tih hlawhtling theih nan Pathian a rinna nghat turin i inpeih em? I inpeih chuan he ṭawngṭaina hmang hian han ṭawngṭai ta che, "Lalpa duhtak, Isua Krista hi i fapa a ni tih ka ring a. Ka sualna te ka rawn puang a, i ngaihdamna ka dil a ni. Ka sualte ti bo turin Isua Krista chu ka aiin a thi a, a tho leh ta a ni tih ka ring a. Vawiin aṭang hian Isua chu min chhandamtu ah ka pawmin zui ka duh a. Ka nun hruai la i duhzawng ti turin min pui ang che. Isua hmingin ka dil e. Amen"
Isua pawm a i ṭawngṭai zawh chuan Rick@PastorRick.com ah hian lo email la min han hriattir ta che. Isua i zuina kawnga pui thei tur che hmanrua ka lo thawn dawn che nia.
Mapuia Fanai lehlin
No comments:
Post a Comment