Monday, May 13, 2024

I TAWNGTAINA PHENA HMUH THEIH LOH INDONA

_Rinna Huaisen_

- Rick Warren
- May 13, 2024
“Mihring râl do kan ni lo ve, lalna te leh thuneihna te, he khawvêl thim chunga rorêltute leh vân hmuna thlarau sual awmte kan do a nih zâwk hi.” ‭‭Ephesi ‭6‬:‭12‬ ‭

Kan hriatthiam phak loh khawvelah hian indona nasa tak a awm reng a, he kan hmuh theih khawvel nilo khawvelah hian thlarau indona, sual leh tha, Pathian leh Setana, vantirhkoh leh ramhuaite inkarah a thleng reng a. Chumi karah chuan i tlazep a ni. Pathian fa i nih chuan Setana chuan a hua ang che a. Tih khawloh a tum ang che.

Ephesi 6:12 ah chuan, “Mihring râl do kan ni lo ve, lalna te leh thuneihna te, he khawvêl thim chunga rorêltute leh vân hmuna thlarau sual awmte kan do a nih zâwk hi" a ti.

I tawngtai khan, a hlawhtlinna tur kawngah indonna chu a awm nghal phawt a. Pathian chhanna che i nghah lai khan, Setana chuan fei tein a khawh che a- chung chu rinhlelhna te, beidawnna te, zâmna te, rilru hnualna te a ni. Bible chuan tihchhiat che u a tum tur thu hi a sawi lawk a ni.

I tawngtaina phena thlarau indona hi Bible hian a sawi tam lem lova. Mahse Daniela bu-ah khan a hlimthla chu kan hmu.

Daniela khan inlarnaah Vantirhkoh a hmu a, chu mi chuan, "Daniel, hlau suh, thil hriatthiamna i neih theih nân inngaitlâwm taka i awm ṭan ni aṭang tawh khân i ṭawngṭaina chu Pathianin a ngaithla a. I ṭawngṭaina chhâng tûrin ka lo kal a ni. “Persia ram hotupa chuan ni sawmhnih leh pakhat chhûng chu min dodâl a; mahse, vântirhkoh hotu Mikaela chu mi pui tûrin a lo kal a, keimah chauhva Persia ram hotupa bei ka ni si a"
‭‭(Daniela ‭10‬:‭12‬-‭13) a ti a.

He châng hi Bible châng mak i tih ber zinga mi a ni em? Daniela kha a tawngtai a, mahse chhan a nih lawk loh thu kha a inziak a. A bei a dawng hman a ni. Vantirhkoh kha a rawn inlan ta a, a ni chuan, "A ni hmasa ber atang khan i tawngtaina kha kan hre tawh a, mahse chumi chungchangah chuan kan indo a, indona nasa tak mai Vantirhkoh chungnung Mikaela meuh pawh van atanga a rawn chhuka min rawn puih hial a ngaihna a ni a. Chumi avang chauh chuan i hnenah rawn kalin, a chhanna chu a thleng tep tawh tih hrilh tur chein ka rawn kal a ni" a ti a.

Chutiang chiah chuan Pathian hnenah tawngtaina i hlan hian a thleng thin. I tawngtaina avanga indona thlen nasatzia chu i hre kher lo maithei, mahse hei erawh hre reng la: a khawtlaina hi pawm loh a ni tihna a ni lo. Tawngtaina tih khawtlai a nih khan, chhan a ni dawn lo tihna a ni kher lo. Pathianin a dosak mek che tihna zawk a ni.

Beidawng mai lo la. Tawngtai zel ang che!

Ngaihtuah zui atan...

Hriatthiamna nei tur khan engangin nge Daniela kha a inngaihtlawm kher?

Pathian chhanna i nghah laiin eng tawngtaina nge i hlan theih?

I nghah laiin, a chhanna chu a rawn thleng mai dawn tih hriat hian engtin nge a puih che?

(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...