_Rinna Huaisen_
- Rick Warren
- May 12, 2024
_“Dîl ula, an pe ang che u; zawng ula, tichuan in hmu ang; kik ula, an hawn sak ang che u."_ (Matthaia 7:7)
Pathian nghak tlat ni a inhriatna i nei ṭhin em? Israel fate, thlalera kum 40 Pathian chhanchhuahna nghak a vak vel te kha i hrethiam lo ṭhin a ni mai thei. Pathian hian nghak turin a ti che niah i inngai bawk si. Chhanna emaw chhanchhuahna emaw i duh ang leh beisei ang a la pe lo che a ni thei.
Pathian hian thlalerah min la vahveltir fo ṭhin a ni. Mahse, kan nghah hian chhan a nei ziah ṭhin.
Pathianin nghak tura a tih lai che khan lo chawl ve ringawt suh. Rinna tichak thei tur kha lo zir zawk rawh.
Bible chuan i nghah laia i tih reng tur thil panga a awm thu min hrilh.
*1. Ṭawngṭai tlat rawh:*
Matthaia 7:7 chuan, _"Dîl ula, an pe ang che u; zawng ula, tichuan in hmu ang; kik ula, an hawn sak ang che u."_ a ti. Ṭawngṭai tlat zel la a chhanna i hmu ang.
*2. Rawngbawl zel rawh:*
Bible chuan Rom 12:11 ah chuan, _"Taihmâkna kawngah chuan inthlahdah lovin, thlarauva ṭhahnemngai chungin Lalpa rawngbâwl ula"_ min ti a. Rawngbawlna ṭha neihah intibuai lo la. I rawngbawlna kha ti ṭha mai rawh.
*3. Kohhran hnuaia pawl tê zawka ṭhiante nena inpawlho bansan suh:*
_"Mi ṭhenkhat tih dân anga inkhâwmte bânsan mai lovin, infuih tawn zâwk ula; chu Nî chu a lo hnai zêl tih in hriat avângin uar lehzualin lo infuihtawn rawh u."_ (Hebrai 10:25)
*4. Chi tuh zel rawh:*
Thuhriltu 11:6 chuan, _"Zîngah i thlai chîng la, tlaiah pawh i kut chawlhtîr suh; a ṭhang duang tûr zâwk i hre si lo, a khawi zâwk hi nge, i ti a. An duah ṭha vê vê thei bawk asin."_ a ti. I nghah chhunga i chi tuh te chungah Pathianin engnge a tih dawn i hre si lo..
*5. Ring tlat zel rawh:*
Bible chuan, _"Nang erawh chu i thil zir leh hriat chian tawhah te khân awm nghet tlat rawh; tû hnêna zir nge i nih i hriat chian êm kha." a ti (2 Tim. 3:14)
I nghah chhungin in ring rengin awm rawh. Muthlu suh. Motor nung lo Pathianin a khalh thei lo.
Pathian chu i nghak tih hrilh suh. A khawl tinung la khalh ṭan tawp rawh. Khawiah maw? Khawiah pawh! Rawngbawlnaah intat lut la. Inkhawmnaah te tel ṭhin rawh. Mi tlemte awmnaah te kal ṭhin la. Isua ang tur a chindan ṭha leh i theihna te tipung thei tur ang apiang ti zel rawh.
Ngaihtuah zui atan:
Pathianin nghak tura a tih lai che in engtinnge i lo awm ṭhin?
Mi tlemte awmna zinga i tel khan eng angin nge Isua ang turin a puih che, a bik takin, i nghah hun chhungin?
I rinna ti nung reng turin eng rahbi te nge vawiinah hian i rah theih?
[Lettu: Mapuia Fanai]
No comments:
Post a Comment