_Rinna Huaisen_
- Rick Warren
- April 21, 2024
_"Amahah chuan zung kaiin, amahah chuan in nunna chu rem chhohin awm rawh se. Tichuan an zirtir che u thutakah chuan in rinna a ṭhang lian ang a, lawmna hlirin in luangliam ang."_ (Kol. 2:7, NLT)
Pathianin rinnaa ṭhan len, chi tuh leh i kal a duh a ni.
A hmasa berah chuan Pathianin rinnaa i ṭhan a duh. Thlarau nuna naute ni reng turin a duh lo che. Kolossa 2:7-ah chuan heti hian kan hmu, _"Amahah chuan zung kaiin, amahah chuan in nunna chu rem chhohin awm rawh se. Tichuan an zirtir che u thutakah chuan in rinna a ṭhang lian ang a, lawmna hlirin in luangliam ang."_ (NLT)
A dawt lehah chuan Pathianin rinna nena chi tuh turin a duh bawk che. Thil phal zir turin a duh che - a chhan chu thil phal loh chuan Isua i ang thei dawn lo. Bible chuan, _"Amaherawhchu chutiang kawngah chuan theh tlem chuan a at tlem bawk ang a, theh tam chuan a at tam bawk ang."_ tiin min hrilh (2 Kor. 9:6)
Hei hi chi tuh leh seng chungchanga dan awm chu a ni a, nunkawng engkimah a dik a ni. Sawiselna chi i tuh chuan sawiselna rah i seng ang. Hmangaihna chi i tuh chuan hmangaihna rah i seng ang. Zawldawhna chi i tuh chuan zawldawhna rah i seng ang. I tuh aia tam i seng ziah bawk ang. Vaimin chi fang khat i tuhin vaimim fang khat a rawn chawr lo. Vaimin kung pakhat a rawn ṭo chhuak ṭhin. I nuna i tuh ang ang, a ṭha lam emaw a chhe lam emaw, chumi ngei chu tam takin a rawn rah chhuak ṭhin.
A pathumnaah chuan Pathianin rinnaa kal turin a duh che.
Hebrai 11:8-ah chuan heti hian kan hmu, _"Rinnain Abrahama chu kohva a awm lai khan a rochun tur hmuna lut turin kal chhuah thu a pawm ta a; tin, a kalna tur lam pawh hre lovin a kal chhuak ta a."_
Chutiang chuan i ti ve thei ang em? Abrahama kha kum upa lam a ni tawh a, a tan chawlh hahdam a hun chho ṭan mek. Pathianin pen chhuak a, a nuna khualzinna ropui ber lam pan turin a ko tlat si. Rinnaa i nun chuan i ruahman lawk hauh loh hmuna kal a ngaih hun a awm ṭhin.
Engvangin nge i rinna ṭhan lentir a pawimawh em em? Bible-in heti hian hmun hran hranah a sawi:
_"Rinna lovin ama lawmzawng mi nih rual a ni lo"_ (Hebrai 11:6).
_"In rin angin in chungah thleng rawh se"_ (Matthaia 9:29).
_"Engpawh rinna lova tih chu sual a ni si a"_ (Rom 14:23)
I nuna Pathian hnathawh reng reng kha i rinna kaltlanga a khawngaihna zara tih a ni.
Ngaihtuah zui atan.
Thla ruk kal ta chhung khan rinna kawngah eng ang takin nge i ṭhan len?
I bul hnaia mite khan i nunah eng chi nge i tuh ni a an sawi ang?
Pathianin rinnain khawiah emaw kal turin a ti tawh che em? A thu chu i awih em? A thu i awih emaw awih loh emaw rah chhuak engnge?
[Lettu: Mapuia Fanai]
No comments:
Post a Comment