_Rinna Huaisen_
- Rick Warren
- April 20, 2024
_"Lehlam lehlama neksawrin kan awm a, nimahsela kan thaw a ipik si lo; mangangin kan awm a, nimahsela kan bei a dawng si lo; tihduhdahin kan awm a, nimahsela kalsanin kan awm si lo; vuak thlukin kan awm a, nimahsela tihboralin kan awm si lo."_ (2 Kor. 4:8-9)
Rinna hi thiltihtheihna mak tak mai a ni. Pathian thutiam hawngtu a ni a. Pathian thiltihtheihna min hmuhtirtu a ni. Kan suangtuahnate a tak a chantir a. Hun khirh tak kan tawh lai pawha nghet taka min dintirtu a ni.
Pathianin harsatna hmun ata a la chhuak ziah lo che. Harsatna karah i rinna a pawt fan ṭhin zawk a ni. I natna zawng zawng a lak bosak mai lo che a. I nate i tawrh theihna turin rinnaa thuam theihna a pe zawk che a ni. Pathianin thlipui aṭangin a la chhuak mai lo che, a chhan chu thlipui kara amah rin i zir theih nan a ni.
Indopui laia Nazi-ten Juda tam tak an nghaisak hlumna lak ata chhanchhuaktu Dutch tleirawl, Corrie ten Boom-i chanchin ka chhiar kha ka ngaihtuah nawn fo ṭhin. Indopui 2-na a tawp hnu khan khang tihhlum tura an dahna aṭanga dam chhuakte kha rinna thuk tak neite an ni tiin a sawi. Engvangin maw? A chhan chu hun khirh tak kara chhel taka awmtirtu che chu rinna hi a ni tlat. Rinna chuan beih hram hramna a thlen ṭhin.
Mithiamten an zir an zir hnua thil lang chiang em em chu naupang hnena kan zirtir theih pawimawh ber (nangma tan pawh) chu inpawh fan theihna hi a ni. Beidawng mai lova bul ṭan ṭhat a hmalam pan ngam zelna hi a ni.
Tumah hian hlawhtlinna kawng hi tluang purhin kan zawh thei miah lo. Tute mai pawh hian hlawhchhamna leh tihsual kan nei vek. A ngaihna hre lovin kan awm fo a. Natna kan nei a, harsatna kan nei vek. Nawrtu kan nei vek. Mi hlawhtlingte hi mi inpawt fan thei an ni.
Khawi aṭangin nge hmalam pan zel turin chu inpawh fan theihna/dawhtheihna chu i neih ang? Rinna neihin. Englai pawhin Pathianin i nunkawng a her danglam thei a- chu chu chân duh lovin hmalam i pa zel a, chu chu rinna chu a ni. I nuna Pathian thiltum i tihhlawhtlin theihna tura Pathianin i mamawh hunah i mamawh apiang a pe dawn che tih rinna hi a ni.
Rinna kawnga mi ropui, Paula testimony chu hei hi a ni, _"Lehlam lehlama neksawrin kan awm a, nimahsela kan thaw a ipik si lo; mangangin kan awm a, nimahsela kan bei a dawng si lo; tihduhdahin kan awm a, nimahsela kalsanin kan awm si lo; vuak thlukin kan awm a, nimahsela tihboralin kan awm si lo."_ (2 Kor. 4:8-9)
Paula khan a chhiatna thlen thei thilte aṭangin inpawh fan theihna kha a zir chhuak a. Chau taka tihtluka a awm laiin a rinna khan a kai tho leh a ni - chutiang chiah chuan i rinna khan a pui thei che a ni.
Ngaihtuah zui atan.
Engvangin nge Pathianin i tawrh a phal a, harsatna i paltlang a phal?
Hun khirh karah engtinnge rinnain dawhtheihna a pek che?
Rinna hian harsatna ata a la chhuak mai lo fo che. Rinna chuan harsatna a paltlangtir che a ni. Tuna i harsatna tawh mek kha he thudik hian engtinnge hmachhawn dan a zirtir ang che?
[Lettu: Mapuia Fanai]
No comments:
Post a Comment