Saturday, April 13, 2024

MIDANGTE ZILH TURIN BIBLE-IN MAWHPHURHNA MIN PE

_I Nun Thiltum Puanchhuahna_

- Rick Warren 
- April 13, 2024
_"Tichuan Jona chu a tho va, LALPA thu ang chuan Ninevi khuaah a kal ta a. Ninevi chu khaw ropui zet, a zau zâwng ni thum kal a ni. Jona chu ni khat kal chin khawpui chhûngah chuan a han lût tan phawt a, 'Tûn a chin ni sawmliah, Ninevi hi tih boral a ni dawn e' tiin a au va."_ (Jona 3:3-4)

Pathianin Ninevi khuaa Jona a tirh khan a tihtur chu an thuawih lohna avanga Pathianin Ninevi khaw mipuite a hrem tur thu tlangaupui kha a ni. Pathian rorelna a hnaih tawh thu hre turin mipuite a duh a, mahse sima Pathian thuawih leh turin hun an la nei a ni.

Pathianin Ninevi khaw mipuite kha hun remchang dang pek leh a duh a ni.

Mahse Jona pawh kha hun remchang pek leh a duh bawk, a chhan chu Pathian tirhna lamah kal lova nghapui kawchhunga a awm phah avang khan. Pathianin a chhanchhuah ve leh khan Bible chuan heti hian a sawi, _"Tichuan Jona chu a tho va, LALPA thu ang chuan Ninevi khuaah a kal ta a. Ninevi chu khaw ropui zet, a zau zâwng ni thum kal a ni. Jona chu ni khat kal chin khawpui chhûngah chuan a han lût tan phawt a, 'Tûn a chin ni sawmliah, Ninevi hi tih boral a ni dawn e' tiin a au va."_ (Jona 3:3-4)

Vau lawkna/zilhna kan tih chuan thil hlauhawm emaw buaina emaw lo thleng tur laka fimkhur tura lo hrilhlawk hi a ni. Pathianin min zilhna kan ngaihthlak loh avangin min vau lawk/zilh turin Pathianin tu emaw a rawn tirh chang a awm ṭhin.

Thuthlung Tharah hian chang 100 aia tam midangte zilh tura min fuihna kan hmu. Isua zuitu kan nihna anga kan mawhphurhna a ni.

Tirhkohte Thiltih 20:31-ah chuan Paulan heti hian a ziak,  _"Chuvangin ngaihven rawh u; kum thum meuh, mittui tla chunga, achhun azana mi tin zilh ka ban loh kha hre reng rawh u."_ 

Paulan Ephesi khaw mite "mittui nen" a zilh tih thu hi lo chhianchhiah la. Engvangin nge mittui nena a zilh? A hmangaih vang a ni!

Pathianin ringtute hi midangte zilh tura rawngbawlna kan koah a nghat. Midangte i zilh khan Pathian i hmangaih a, kha mite pawh kha i hmangaih a ni tih a lantir. Entir nan, tu emaw lei chhe tawh lam pangin chak takin a tlan a, hmangaihna nena i tih theih chu chumi chu lo dintir a, a hmalama lei a zawh mai tur chhiat thu lo hrilh chu a ni.

Midangte i hmangaih anih chuan an thil tih dik loh emaw thutlukna dik lo emaw an siam avanga nghawng ṭha lo a neih theihte i hrilh ngei ang- a chhan chu Pathian duh dana midangte zilh hi hmangaihna lantirna a ni.

Ngaihtuah zui atan.

Miin i nuna thil lo thleng tur laka zilhna/fuihna an pek che avanga thutlukna fuh lo tak i siam tur lak ata an chhanchhuah che i tawng tawh em, han sawi teh.

Midangte zilhna hi awlsam tak leh hahdam takin i dawng ṭhin em? Engvangin?

Midangte zilhna kawngah hian eng lai hi nge har ber?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...