Friday, April 12, 2024

PATHIANIN HUN THA A PEK CHE CHUAN VUAN TLAT RAWH

I Nun Thiltum Puanchhuahna

By Rick Warren
— April 12, 2024
“Pathian khawngaihna in dawn chu ṭangkaipui ngei tûrin, keini amah thawhpuitute hian kan ngên a che u.” [2 Korinth 6:1]

Pathianin i nunah tih tur pawimawh hlen chhuah theihna hun ṭha a pe nawn che a nih chuan vuan tlat ang che. Chu hun ṭha chu khawhral suh. I nun atana Pathian kohna danglam takah chuan hlawhtling turin in sawrbing ngar ngar ang che. 

Paula chuan II Korinth 6: 1 ah chuan hetiang hian a sawi, “Pathian khawngaihna in dawn chu ṭangkaipui ngei tûrin, keini amah thawhpuitute hian kan ngên a che u,” tiin. Pathian chuan thil tam tak a tihsak che. I sualte a ngaidam a. Hun ṭha dang vawi eng emaw zat a pe che. 

A rawngbawl theihna hun ṭha dang a pe ang che. 

Paula nun en rawh. Kristiante khan hruaitu thi tawh leh zahpuiawm tak an nei nia a hriat avangin kal sual angah a ngai a, chuvang chuan tihlum a tum ngar ngar ṭhin. 

Tichuan Isuan Paula chu Damaska daiah chuan an lo chhuahchhal ta a nih kha – tichuan hun ṭha vawi khat dang a pe leh ta a, khawvela a mission hlen chhuah theihna hun ṭha chu. Paula khan a tihtur chu a pawm hmak a, a nun kha a inlet ta thawk bawk – Pathianin hun ṭha dang a pek chu engtik lai mahin a theihnghilh tawh ngai lo. 

A hnu lama a rawngbawlna kal zelah chuan Paula chuan, “Lalpa Isua hnên ata ka hmuh rawngbâwl hna thawh tûr ka hmabâk, Pathian khawngaihna Chanchin Ṭha puan darh tûr hi ka hlen theih phawt chuan, ka nun pawh hi thlâkhlelh tûrah ka ngai lo.” tiin a sawi [Tirhkohte 20: 24] 

Pathianin a hman avang khan Paula chu a lawm hle a, thil eng dang mah hi a ngai hlu tak tak ta lo. 

Eng ang pawhin lo che sual tawh la, Pathian chuan i tih tur atana a ruatsak che chu a la thlak danglam chuang lo. I lo peng kawi ve hlek pawh a ni mai thei e. Pathian chuan i tih tur atana a ruat chu a la thlak danglam chuang lo. 

Chuvangin let leh rawh. Vawiin hian bul ṭan leh rawh. Pathianin hun ṭha dang a pe leh che a nih chuan khawtlai mai suh – a thu awih rawh. 

Pathianin hun tha a vawi hnihna atana a pek che chuan a khawngaihna leh a hmangaihna che a tarlang a ni. 

Ngaihtuah zui atan. 

Thil eng emaw bikah Pathian chu thuawih mai loh ṭhinna lai i nei em? I sawi fiah thei em? 

Pathianin hun ṭha a pek che chu tihhlawhtling mai lo turin engin nge tibuai ṭhin che? 

I nuna Pathian kohna hlen chhuak tura nangmah pui tur chein ṭawngṭainaa i ṭanpui tur leh i thawhpui theih tur che tu nge ni ang? 

I thil lo tih tawh leh i lo kal tawhna chu eng hmun pawh ni se, Pathian chhungte zingah chuan hmun ṭha tak i nei a, nghak ngar ngartu i nei a ni. Sawmna chu zau taka hawn a ni. Ring la chang mai rawh. 

Pathian nihna leh a khawngaihnaah chuan innghat la. I sualte avangin thupha chawi la Pathian ngaihdamna chu chang ang che. Isua thutiam chu chang la, chu chhandamna chu mitin tan a thlawn niin mi zawng zawng tan hawn a ni a, Isua Lal leh Chhandamtua pawm apiangte tan a ni. Tlawm takin Pathian chatuan chhungte zingah chuan tel ve dil mai ang che. 

I inpeih em? Tichuan i zin kawng atan he ṭawngṭaina tawite hi hmangin ṭawngṭai ang che: 

“Lalpa duh tak, i thu chuan i Fapa, Isua Krista, ka rin phawt chuan ka thil lo tihsual tawh zawng zawngte ngaihdam min tiam a, ka nun awmzia ka hre thiam ang a, ka chatuan inah chuan engtik niah emaw min lo la lawm ang.

“Ka sual a ni tih ka pawm a, ka sualte avanga ngaihdamna ka dil e. Isua thihna chuan ka sualte a la kiang tih ka ring a, amah chu i kaitho leh bawk. Isua chu ka Chhandamtu atan ka pawm duh a, ka Lalpa a nihna ang ngeiin vawiin aṭang hian zui ka duh bawk e. Ka kawng hruaiin i duhzawng min zirtir ang che. Isua hmingin ka dil e. Amen.”

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zin kawng atana thuziak pawimawh tak tak lo thawn che ka duh e. 

[Lettu: Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...