_Pathian Nena Thawhdun_
*THUTLUKNA I SIAM HMAA I TIHTUR PATHUM*
- Rick Warren
- March 16, 2024
_"LALPA chuan finna a pe ṭhîn a, A kâ aṭang chuan finna leh hriatthiamna a lo chhuak ang; Mi dikte tân finna ṭha a khâwl khâwmsak a, mi nun ngîlte tân amah chu phâw a ni."_ (Thufingte 2:6-7)
I hnaah emaw i eizawnna chungchangah emaw duhthlan tur harsa tak i hmachhawn em? Vanneihthlak takin, dam tawh zinga sumdawng hausa ber chuan Bible-a bu hnih lai mai hi a lo ziak ve a - Thufingte leh Thuhriltute - chutah chuan a hausak dan leh hnathawh dan te a ziak a ni.
Thufingte bu a Solomona thufing chuan duhthlanna siamna kawnga ṭangkai em em tur rahbi pathum a ziak a. Chungte chu engte nge ni le?
*A hmasa berah chuan, Bible-ah en rawh*
I thiltih tura midangte thlir dan i ngaihtuah hmain Pathian thu leh a thlir dan i en hmasa ṭhin tur a ni. Thufingte 2:6-7 chuan hei hi kan hmu, _"LALPA chuan finna a pe ṭhîn a, A kâ aṭang chuan finna leh hriatthiamna a lo chhuak ang; Mi dikte tân finna ṭha a khâwl khâwmsak a, mi nun ngîlte tân amah chu phâw a ni"_ a ti.
*A dawtah chuan, thudik zawng rawh*
Thufingte 18:13 chuan, _"Ngaihthlâka hmâa chhâng lêttu chu a tân âtna leh mualphona a ni"_ a ti. Saddleback Kohhran bul ka ṭan hma hian, thla ruk chhung thudik zawngin hun ka hmang a. Orange County a ka insawn hma khan Kohhran ṭhan theihna tur a thuziak chhiar theih zawng zawng chu ka chhiar vek a. Tichuan, mihring awmzat leh an chawhrualna te ka zirchiang bawk a, Orange County chu America rama county zawng zawngah 1970 leh 1980 a ṭhang chak ber an ni tih ka hmuchhuak ta a ni. Tichuan, Orange County-ah pawh Saddleback Valley chu a ṭhang chak ber an ni leh bawk a. Ka ngaihtuah ta a, "Kohhran thar an mamawh ngei dawn hi!" tiin. Mamawh awmna a rawngbawl kha ka duh a - tichuan, ka zirchianna aṭang chuan an mamawhna leh an mamawh dan te ka hmuchhuak ta a ni.
*Tichuan, thurawn la rawh*
I thutlukna siam tur ang lo siam ve tawh te be tam la; tin, Pathianin a lo hrual tawh dan che hriatpuitu che rawn ṭhin rawh. "Hetiang ti tura duan hi ka ni nge ni em? Hemi kawngah hian Pathianin min hruaiin i hria em?" tiin mi zawt ṭhin rawh.
Thufingte 15:22 chuan, _"Remruat lâwk lova thil tih a hlawhtling duh lo va, remhria an tam chuan a hlawhtling ṭhîn."_ a ti.
Thurawn kan lak duh loh ṭhinna chhan ber chu chhanna zawng zawng kan hre lo tih kan pawm duh loh vang a ni. Mahse, inngaihtlawmna leh finna hi thil kal kawp tlat a ni. I chapo a thil zawng zawng hria a i inngaih chuan, hlawhchham i hlat lo a ni.
Thutlukna fing taka siam leh hlawhtlin i duh chuan, Bible-ah endik a, thudik zawn a, tawnhriat lo nei tawh te leh Pathian hruala lo awm tawh te hnen aṭangin thurawn i la ṭhin tur a ni.
Ngaihtuah zui atan.
I hna chungchanga thutlukna lian tak i siamin engvangin nge Pathianin a hrual dan che hriat a ṭul ni a i hriat?
I hna chungchangah tu hnen aṭangin nge fuihna i beisei theih ang? Engvangin nge chu mi chu i rin ngam ang?
Heng kawng pathum (Bible-a en, thudik zawn, thurawn lak) te hi i nunkawng dang engah nge a taka i hman theih ang?
*Vawiin hian Isua i zui dawn em?*
Bible chuan Pathian Fapa, Isua Krista kaltlang chauhin vanram i lut thei tih min hrilh. Vanram hi thawh chhuah chi a ni lo: _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)
Isua hnena inpe tura i inpeih chuan heti hian ṭawngṭai rawh le:
"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.
"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a, ka Lal atan ka thlang e. Ka thinlung hi i hmangaihna leh beiseinain min thlaksak rawh. Min hruai la, i duhzawnga nung turin min pui ang che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]
No comments:
Post a Comment