Saturday, March 23, 2024

RINAWMNAIN I HNAAH HLAWHTLINNA A PE CHE

_Pathian Nena Thawhdun_

- Rick Warren 
- March 23, 2024
_"Tin, Josefa chu mi tlâwntlai tha tak a ni a, a hmêl pawh a tha hle a. Tin, chûng hnuah chuan heti hi a ni a, a pu nupui chuan Josefa chu a ngaihmêlh a; tin, 'Mi mutpui rawh,' a ti a. Ani erawh chuan a duh lo va, a pu nupui hnênah chuan, 'Ngai teh, ka pu chuan he inah hian ka hnênah eng eng nge awm a hre si lo va, a neih zawng zawng ka kutah hian a dah vek a . . . a nupui i nih avângin nangmah chauh lo chu ka lakah engmah ui a nei hek lo: chutichuan engtin nge he sual lian tak hi tiin Pathian chunga thil ka tihsual theih ang?' a ti a."_ (Gen. 36:6-9)

Kan tunlai khawvela hmuh tur tam tawh lo tak chu rinawmna hi a ni. Tumah hi eng lakah mah an rinawm tawh lo emaw tih tur a ni. Rinawmna nghet tak kan tih ang hi a awm ta meuh lo. Mi tam zawk an hnathawhna company emaw, a chhawrtute emaw an pu te emaw lakah an rinawm lo. Anmahni lakah erawh chuan an rinawm.

Rinawmna hi hmanlai thil ni angin a lang tawh a. Mahse miin rinawmna nun duhawm tak mai a nunpui chuan dinhmun sang zawkah hlankaiin a awm ṭhin. Dinhmun ṭha zawkah a vawrh ang che!

Rinawmna kan tih chuan - hna lama i pu te emaw Pathian chungah emaw pawh nise - harsatnain i inpekna a lo fiah huna rinawm taka i lo dinchanna kha a ni.

Thil anih dan anga a awm thlap reng lai hi chuan rinawm hi a awlsam ṭhin, mahse lawngin tuifianriata thlipui nasa tak a hmachhawn thut anga harsatna a lo thlen lai hian rinawmna fiah a ni ṭhin. I eizawnna aia i nungchang Pathianin a dah pawimawh zawk avangin i hnaah i rinawmna fiah a ni ṭhin ang. Chung harsatna karah chuan vanramah mawhphurhna lian zawk i kova dah ngam a ni em tiin a fiah ṭhin che a ni.

Josefa khan fiahna hautak tak a hmachhawn. Bible chuan heti hian a sawi, _"Tin, Josefa chu mi tlâwntlai tha tak a ni a, a hmêl pawh a tha hle a. Tin, chûng hnuah chuan heti hi a ni a, a pu nupui chuan Josefa chu a ngaihmêlh a; tin, 'Mi mutpui rawh,' a ti a. Ani erawh chuan a duh lo va, a pu nupui hnênah chuan, 'Ngai teh, ka pu chuan he inah hian ka hnênah eng eng nge awm a hre si lo va, a neih zawng zawng ka kutah hian a dah vek a . . . a nupui i nih avângin nangmah chauh lo chu ka lakah engmah ui a nei hek lo: chutichuan engtin nge he sual lian tak hi tiin Pathian chunga thil ka tihsual theih ang?' a ti a."_ (Gen. 36:6-9)

Hei hi rinawmna chu a ni! Josefa khan hmeichhe hmelṭha tak mai, a hnena, "Ka pasal ka hrilh i ring a ni maw? I tifiam a mi? Tuma'n an hre lovang. Chhang tui tak pawh i ei thei ang. I thu ang zelin kan awm anga, a nuam dawn asin. Engmah sual a awm lovang a, harsatna a awm lovang!" tiin a lo thlem a ni.

Potifara kha hotu fel lo tak a nih ka ring, midang reng reng chu mi fel tak an ni ṭhin si a. Josefe khan kawng tam takah a pu ngaihdan kha a ṭawmpui loh fo ka ring, mihring bawk an nih avangin. Tuma'n thil an tidik vek bik ngai si lo.

Mahse Josefa khan a pu laka a rinawm avangin thlemna kha a hnawl tlat. A puin a chunga rinna a nghah kha a zah tlat a ni.

Pathian chutiang ang mi rinawmna nei chu thlirin, "Hetiang mi hi a ni ka chawisan dawn ni" a ti a ni.

Chutiang chiah chuan i chungchang thuah Pathianin sawi ve se i duh dawn lo'm ni?

Ngaihtuah zui la.

Engvangin nge Pathianin i hnathawhnaa i pu chunga rinawm tura a duh che?

Engvangin nge mi rinawm tak rinawm reng a ṭul?

I hnaah emaw i eizawnnaah emaw engnge hlen chhuah i duh? I hnathawhna chunga rinawmnain engtinnge chu chu a thlentir ang?

*Vawiin hian Isua i zui dawn em?*

Bible chuan Pathian Fapa Isua Krista kaltlang chauhin vanram i lut thei a ti. Vanram hi thawh chhuah chi a ni lo: _"Rinna avanga khawngaihnaa chhandam in ni; nangmahni thawh chhuah a ni lo va, Pathian thilpek a ni; thiltih avang a ni lo ve, chutilochuan miin an chhuang dah ang e."_ (Ephesi 2:8-9)

Isua hnena inpe tura i inpeih chuan heti hian ṭawngṭai rawh le:
"Lalpa, i Fapa Isua Krista ka rin phawt chuan ka sualte ngaihdam a ni ang tiin min tiam a, chuvang chuan min siam chhan ka zir anga, nangin i vanramah min lo pawm ang tih ka ring.

"I hmaah ka sual ka puang a, i ngaihdam ka rawn dil e. Ka sual lak bo anih theih nan ka ai Isua a thi a, nangin i kai tho leh a ni tih ka ring e. Vawiin aṭang hian Isua hi min chhandamtuah ka pawm a,  ka Lal atan ka thlang e. Ka thinlung hi i hmangaihna leh beiseinain min thlaksak rawh. Min hruai la, i duhzawnga nung turin min pui ang che. Isua hmingin, Amen."

Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...