_Pathian Nena Thawhdun_
- Rick Warren
- March 10, 2024
_"Tupawh tlemte chunga rinawm chu tam tak chungah pawh a rinawm ṭhin . . . Sum lem chungah mah in rinawm loh chuan tuin nge sum tak chu kawltir ang che u? Mi dang ta chungah mah in lo rinawm tawh loh chuan nangmahni ta chu tuin nge pe ang che u?"_ (Luka 16:10-12)
Genesis buah chuan Josefa chanchin kan hmu. Pathianin Josefa kha hruaitu ropui tak anih tur thu a hmuh lawktir a, mahse kum 40 chhung chu sal anga chhawr a ni, chung hun tam zawk chu tan inah a hmang bawk. Chung kum chhung tam tak chy Josefa nungchang fiaha a awm hun lai a ni.
A ni a lo thlen a, a hun dik tak a rawn inher chhuah chuan Pathianin Josefa chu a fiahna hmun aṭang chuan a la chhuak a, a tana a lo ruahman lawk sa Aigupta rama thiltihtheihna lalthutthlengah chuan a ṭhuttir ta a. Khang hun khirh tak chhung khan Pathianin Josefa nungchang kha a siam puitling zel a, roreltu dinhmun thleng thei turin a zirtir a ni.
Hun khirh tak karah hah takin i thawk a ni emaw, thuneihna i kutah awmin nuam sa takin i awm a ni emaw Pathianin i nungchang a thuam puitling zel a ni. Engnge i tih tih aiin tunge i ni tih hi Pathianin a ngai pawimawh zawk; eng eizawnna kawng nge i zawh tih aiin eng nungchang nge i put tih Pathianin a ngai pawimawh zawk. I nungchang siam turin i hnathawhna hmun kha i zirlai ṭha tak a ni.
Tiduhdahtu che hnathawhna lamah hotu i nei em? Pathianin i dawhtheihna fiah turin hotu emaw, hlim taka hna i thawh theih lohna hmun emaw, i nungchang tihpuitlin nan a hmang thei. Hmangaihna, hlimna, muanna leh dawhtheihna chi i thinlungah a tuh a, hna i thawh chhungin chung chi te chu lei ṭhain a chawm ṭhin a ni.
Hna i thawh laiin, "Hei hi engtinnge a thlen theih? Helai hi engvangin nge hmun khirh tak a nih? Engvangin nge heng mite hian min kheuh reng? Engvangin nge ka hnathawhna hmunah hian ka hlim theih loh?" tiin i inzawt mai thei. Thuhriltu 1:3-a Solomonan a zawh ang chiah kha i inzawt a ni, _"Mihringin a hnathawh, ni hnuaia a thawhah chuan hlawkna eng nge a hmuh?"_
A chhanna chu hei hi a ni: nungchang tihpuitlinna. Hringnun hi chatuan atana inbuatsaihna a ni. I eizawnna kha vanah i chhawm dawn lo, mahse i nungchang kha i kaipui dawn. He khawvela i awm lai hian Pathianin i nungchang a siam a, i rinawmna fiahin a awm bawk. I chak miah loh lai pawhin thil ṭha ti turin i rinawm em? Chatuan hmunah eng hna nge i thawh ang tiin tunah khan a thlir reng che a ni.
Luka 16:10-12 ah chuan Isuan heti hian a ti, _"Tupawh tlemte chunga rinawm chu tam tak chungah pawh a rinawm ṭhin . . . Sum lem chungah mah in rinawm loh chuan tuin nge sum tak chu kawltir ang che u? Mi dang ta chungah mah in lo rinawm tawh loh chuan nangmahni ta chu tuin nge pe ang che u?"_
Eng hna pawh i kovah Pathianin a nghat anih chuan rinawm takin thawk rawh. I eizawnna ni lovin i nungchang a pawimawh zawk tih hre reng rawh.
Ngaihtuah zui atan.
I hnathawhna hmunah eng harsatna nge i tawh mek?
Chung harsatna te chu Pathianin engtinnge i nungchang siam nan a hman ang?
Tunkar chhung hian i hnathawhpui pakhat tan engnge i tih theih ang?
[Lettu: Mapuia Fanai]

No comments:
Post a Comment