Monday, March 11, 2024

I AWMNA HMUNAH MISSIONARY NI ANG CHE

Pathian Nena Thawhdun


Rick Warren

March 11, 2024



”Vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwl khâwm zâwk rawh u;“

‭‭Matthaia‬ ‭6‬:‭20‬ ‭


I nunna atan i hnathawh chu eng pawh ni sela, i hnathawhna hmun chu Pathian lalram zauhna atana hmangin, i hnathawhna hmel hriatte kha Chanchin Ṭha thehdarhna atana hmangin, Pathian ropuina thlen ang che.


Ṭum khat chu khawvel huapa sport lama company lian president leh CEO ni bawk hian min rawn bia a. "The Purpose Driven Life' bu kha ka chhiar a, ka nun a thlak danglam vek a ni," a rawn ti a. "He lehkhabu hi ka chhiar a, Kristian ka ni ve ta. Thil pakhat hriat ka duh a: ka hna CEO atang hian ka bang anga, pastor ka ni mai dawn em ni ang?" a rawn ti a.


Kei chuan, "Teuh lo mai! I hna chu Pathian ram zauna tura i hman theih dan tur ka hrilh ang che, hausakna atan chauh ni lo lalram dintu nih dan tur. Executive team i nei em?" ka ti a.


A ni chuan nei e, paruk an awm a. Pahnih phei chu kristian an ni a ti a. Kei chuan, "Chung mi pahnihte nen chuan inhmukhawm ula, mi dang pathum tan chuan tawngtai phawt rawh u. I rawngbawlna hmasa ber tur chu chung mi pathum te chu Krista hnena hruai phawt hi a ni. I company-ah mi engzat nge thawk le?" ka ti a.


A ni chuan 25000 vel an awm thu a sawi a. "Chu chu kohhran lianpui a nih chu. I kohhranah member 25000 an awm tihna a ni. An tan tawngtai tan la, an tan awm la. I sumdawnnaah kristian zirtirna dik vawng ang che" ka ti a.


"CEO dangte hneh i duh em? CEO la nih zel a tul a nih chu. Chutiang a nih chuan pastor emaw missionary nih aiin i thawh hlawk daih ang"


"In hnam nun khawih danglam i duh em? Infiammi milarte i kawmin thutpui la, anmahni suma tanpuitu chauh ni lovin, an thian i ni tih sawi la. I sumdawnna lehkha te pe la, an mamawh hun apiangah biak theih i ni tih i hrilh dawn nia."


Tunlai khawvel sum leh pai chevelah hi chuan, missionary chhuak thar chu sumdawngte hi an ni. Ram tam tak chuan missionary leh pastorte an ramah an luhtir phal lova. Mahse sumdawngte erawh an lawm em em thin.


Pathian lalram - thil dang zawng zawng pel daiha awm tur tana i sumdawnna i hman chuan, lalram dintu i lo niin, sum khawlkhawmtu satliah mai i ni lo a ni.


I sum dehchhuahna atana i sumdawnna hman chu a sual lem lo. Mahse Isua chuan Matthaia 6:20 ah chuan, ”Vânah, sûlrûl leh tuiêkin a ei chhiat lohnaah, rûkruten an reh pawha an rûk hek lohnaah chuan, in tân rote khâwl khâwm zâwk rawh u," a ti. Vana ro khawlkhawm dan chu Vana kal turte vekah khawl hi a ni. I hnain mi dangte Pathian a kawhhmuh chuan, chatuan atan Vanah ro i khawlin Pathian lalram i zauh tihna a ni.


Ngaithuah zui atan...


I hnathawhna hmuna mite tan tawngtai thin la. Pathian hnenah i thawhpuite hnena rawng i bawl theihna tur remchang dilin, Isua chanchin hrilh ang che.


I hnathawh khan i thawhpuite hnenah Chanchin Tha i thlen thei tih i hriat chuan i hnathawh i thlir dan a tidanglam em?


Engti kawngin nge Pathian lalram zauhna turin i sum i hman theih ang?


(Lettu: Msa)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...