Pathian Nena Thawhdun
Rick Warren
Mar 12, 2024
"Tin, thilpek hrang hrang a awm a, Thlarau erawh chu hmunkhat a ni. Rawngbawl dan hrang hrang pawh a awm a, nimahsela Lalpa chu hmunkhat a ni. Hnathawh dan hrang hrang pawh a awm a, Pathian erawh chu hmunkhat a ni – mi zawng zawnga engkim thawktu chu." 1 Kor 12: 4-6.
Pathianin engang mi nge ni turin a siam che tih i ngaihtuah buai ve fo ang. Pathianin a duan dan che danglam bika i hriat chuan, chunglam chu i hawiin, i nun tan awmze nei zawkin i chhuah thei ngei ang.
Thlarau lamah ke i pen a, Isua i zui hian, heti hian i ti a, “Pathian kawng ka zawh dawn a, keima kawng ni lo vin. Keima nun ngei ka inhruai tir dawn a ni. Keima thiltum ni lo vin, Pathian thil tum chu ka zui dawn a. Siam ka nih chhan ang takin nun ka tum dawn a ni.”
Chutianga ke i pen meuh chuan, Pathian pawhin thilpek pali a pe che a ni:
Ngaihdamna. Rom 5:15-ah chuan, "Nimahsela thilthlawnpek chu sualna nen a inang lo bawk. Mi pakhat sual avang mah khan mi tam tak chu an thih si chuan, Pathian khawngaihna leh mi pakhat Isua Krista khawngaihna avanga thilpek chu mi tam tak chungah vurin a awm ngei ang". I rinna Isuaah i nghah chuan, a tih hmasak ber chu i tihsual zawng zawng nuaireh sak che hi a ni. Ngaihdam i ni a! I tan thiamloh chantirna a awm tawh lo.
Chatuan nunna. Pathian chuan rei tak daih ruahmanna a siamsak che a. Rom 6:23-ah chuan, "Sual man chu thihna a ni si a; Pathian thilthlawnpek erawh chu, kan Lalpa Krista Isua zarah chuan, chatuana nunna a ni" a ti a. Vanram kawng hi i thawkchhuak emaw i hlawhchhuak ngai dawn lova. Kawng i hmuh theihna awmchhun chu rinna hmanga Pathian thilthlawnpek lo dawn hi a ni.
Thlarau Thianghlim. Rom 5:5-ah chuan, "Thlarau Thianghlim kan hnena min pek khan Pathian hmangaihna chu kan thinlunga a leih tawh avangin beiseina chuan a timualpho lo va" a ti a. I nun kaltlanga Pathian i nuntir leh nuntir loh engtin nge i hriat theih ang? Thlarau rah i inthuam zel khan: hmangaihna, hlimna, remna, dawhtheihna, ngilneihna, thatna, rinawmna, nunnemna, mahni inthunna te hi.
Theihna bik. Bibleah hian, theihna bik riaute hi Thlarau thilpek tiin sawi a ni a. Thilpek emaw taksa nei thilpek dang nen a in ang lova. Pathianin i tih atana a duh i hlen theihna atana theihna te an ni. Ringtu tam takin thilpek an dawng tih pawh an inhre lo fo mai. Engte nge thilpekte chu tih tak ngial pawh an hre lo thin. Mahse Isua zuitu i nih chuan, i neih ngei a ngai a ni.
Bible chuan 1 Kor 12:4-6-ah chuan, "Tin, thilpek hrang hrang a awm a, Thlarau erawh chu hmunkhat a ni. Rawngbawl dan hrang hrang pawh a awm a, nimahsela Lalpa chu hmunkhat a ni. Hnathawh dan hrang hrang pawh a awm a, Pathian erawh chu hmunkhat a ni – mi zawng zawnga engkim thawktu chu" a ti.
Thlarau thilpek chu eng nge ni? I nun tan hian Pathianin tum a nei a, tin Thlarau thilpek chu a duhzawng i tihna tura Pathianin a thuamna che a ni. Pathianin theihna a pek loh che thil tihtir a tum ngai lovang.
Thilpek te chu nangma hlawkna tur an ni lo va. Thllarau thilpek te chu midang tanpuina tur an ni. Midang pawhin an thilpek dawn chu nangmah tanpui nan an hmang ve thei bawk.
Thlarau thilpek zirtirna ka pek hi nangin i hlawkpui a. Thlarau thilpek kohhranah i hman chuan kohhran hoten an hlawkpui ang. Jigsaw puzzle ang hi a ni a, pakhat pawh a bo chuan, eng nge i hriatchhuah hmasak ber? Pakhat a bo a ni tih chu. Thlarau thilpek kan dawnte kan hman chhuah chuan malsawmna kan dawng tlang vek thin a ni.
Ngaihtuah zui atan.
* Pathianin Kristian zawng zawngte min thilpek hlawm li min pek (ngaihdamna, Thlarau Thianghlim, chatuan nunna leh theihna) te chuan i nunah eng nge danglamna a thlen?
* Pathianin thlarau thilpek a pek che chu i chang tih i inhria em? Chung i dawn zawng zawng talent te, theihna te phurna leh tuina a pek che chu han ziak chhuak teh.
* Thilpek i dawn chu engtin nge Pathianin in kohhranah hman a tum zawt ang che?
[Lettu: Sangpuia]

No comments:
Post a Comment