_Hmuh Theih Loh Indona_
By Rick Warren
— Feb 09, 2024
“Chûng zawng zawng chuan an rinna avângin fak lo hlawh tawh mah se, thil tiam chu an chang lo va. Pathian chuan kan tân thil ṭha lehzual a lo buatsaih tawh a, keini leh anni a ruala tihfamkima kan awm theihna tûrin a lo rêl a ni.” [Hebrai 11:39-40]
Rinnaa nun chu thil awlsam a ni lo. Khawvel keh chhe mekah kan khawsa a. Sik leh sa a mumal lo. Kan taksa pawh mumal taka a awm loh chang a tam hle. Mite nena kan inlaichinna pawh a dik lo fo.
Pathianin Adama Eden huan aṭanga a hnawh chhuah lai khan hringnun a khirh tur thu a hrilh a. Lei leh boruaka indona chu i chhungah leh i pawn lamah a thleng ṭhin. I sualna nen chuan nasa takin in inbuan ṭhin. Setana nen ngei pawh in inbuan chang a awm, “ruk, tihhlum leh tihchhiat” bak ngaihtuah ngai lova kha a ni [Johana 10:10].
A chang chuan min lo nangching mai zel a. Tlawmsan duh mai chang kan nei ṭhin.
Hebrai 11 ah chuan Pathian chuan la bei fan fan turin min duh a, a chhan chu min la theihnghilh mai lova, a thutiam chu engtik ni emaw hlen chhuah a la duh vang a ni. Hmalam hun eng leh beiseina min siamsak a duh a ni [Jeremia 29: 1]. Kan mittui a hru hul duh bawk [Thupuan 7]. Chubakah chuan a Thu hmun tam takah chuan thutiam dang kan la hmu cheu bawk.
Hebrai 11 chuan rinna kawnga mi ropui Pathian thutiam ring tlattute chanchin min kawhhmuh a – Abrahama, Sari, Isaka, Jakoba, Rahabi, Mosia, Davida, Gideona, Samsona leh midangte an ni. Thil harsa tam tak paltlang mahse, an rinna zinkawngah chuan an kal ngar ngar zel a ni.
Hebrai 11: 39-40 chuan hetiang hian a sawi, “Chûng zawng zawng chuan an rinna avângin fak lo hlawh tawh mah se, thil tiam chu an chang lo va. Pathian chuan kan tân thil ṭha lehzual a lo buatsaih tawh a, keini leh anni a ruala tihfamkima kan awm theihna tûrin a lo rêl a ni” tiin.
Pathian thutiam chu in ring thei ang. Beidawng mai suh!
Ngaihtuah zui atan.
Rinnaa nun hman chuan natna a keng tel. Hringnun a awlsam loh laia i beidawng mai a nih chuan Pathian rin dan i zir thei ngai lovang. Chu chu eng vangin nge a dik nia i hriat?
A Thuah chuan Pathian thutiam chu i ring thei ang! Pathian Thu aṭang chuan eng thutiam nge amah rinna atan vawiin hian i mamawh nia i hriat?
Pathian thutiam i mamawh huna i hriat chhuah chat theih nan engtin nge Pathian thu chu i lo vawn theih ang, a bikin, hun harsa i hmachhawn lai chuan?
[ *Lettu* : Peka]
No comments:
Post a Comment