_Hmuh Theih Loh Indona_
- Rick Warren
- Feb 10, 2024
_"Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u."_ (Heb. 12:1)
Infiamnaah chuan a lo dawltu nihna hian hamṭhatna tam tak a keng tel thei. Midang khelmuala an va inkhelh aiin mahni khelmual ngeia an khelh hian team tam tak chuan record an nei ṭha zawk ṭhin. Infiam miten lo chawk phurtu an neih hian an theihna zawng zawng nen an khel ṭhin.
Bible chuan lo chawk phur ṭhintu che i nei tiin min hrilh. Hebrai 12:1-ah chuan heti hian kan hmu, _"Chutichuan, chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u, tin, Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u."_
I thiltih kha hmutu awm ko pakhatmah a awm lo. Thlirtu che i nei a. Van hian a thlir reng che a ni. Mahse chu aia pawimawh zawk chu lo tiphur ṭhintu che pawl i nei hi a ni. Bible chuan vanrama mite zawng zawngin hlim takin an lo au che a ni a ti.
Pathianin engkim a hria tih chu i hria. Bible chuan, _". . . Khawvel zawng zawngah LALPA mit chu a leng ruai ruai ṭhin a ni"_ (2 Chronicles 16:9) a ti. Pathianin hmuh hmaih a nei miah lo. I chhuk i chho - i engkim a hria. I ngaihtuahna zawng zawngte kha a hre vek a ni.
Mahse "chhumpui anga nasa taka thlirtuten" an hual vel che a ni. Mosian a thlir che a, Abrahma pawhin a thlir che. Ringtute, vanhmuna awm apiangte chuan i rinna i nunpui dan an lo thlir reng che a ni.
Hlim takin an lo au che a. I hlauh hunin huaisenna i neih theih nan an lo vai ṭhin. I beidawn dawnin ke pen zel turin an lo fuih che a. Ngaih pawimawh loh leh theihnghilh ni a i inhriatin i bulah an lo awm ṭhin.
A chang chuan hringnun hi a harsa ṭhin a ni, mahse beidawng mai suh. Lo fuih phur ṭhintu che van mi i nei a ni.
Ngaihtuah zui atan.
Pathianin i ke pen tinreng a hria tih hriatthiamna hian i nunah eng danglamna nge a thlen?
Chhumpui nasa tak ang min thlirtute zingah hian engnge tel ve a i rin? I chhungte emaw ṭhiante emaw zingah kal khalhtu che an awm em?
Pathianin engnge hlen tura a duh che ni a i rin? Van mipui pawlho, lo tiphur ṭhintu che an awm tih hriatna hian engtinnge chumi thiltum hlen tur chuan a puih che?
*Eng thil pawh lo ti tawhin khawiah pawh lo kal tawh mahla . . .*
Pathian chatuan chhungkua zingah hmun i nei. Sawmna zau taka hawn a ni. Ring la dawng mai rawh.
Chutah chuan engtinnge i luh ang? Pathian zia leh a khawngaihnaah chuan innghat la. I sualte puang la Pathian ngaihdamna dil rawh. Isua thutiam, tupawh an sual sima Isua Lal leh Chhandamtu atana pawma amah zui duh apiangte tan chuan chhandamna hi a thlawn a ni a tih hi dil rawh. Tlawm takin Pathian chhungkuaa tel turin dil rawh.
I inpeih em? He ṭawngṭai tlawmte hmang hian bul han ṭan teh le: "Lalpa, ka thih hunah ka chanchin i hmaah ka sawi dawn a ni tih ka hria a. I lakah thil sual tiin i remruat ang ni lovin ka duh danin ka nung a ni tih ka hrua. Tun aṭang hian ka nun dan thlak ka duh. Sual lak ata i hnen lam rawn pan ka duh.
"Ka sual sual man ka tawrh loh nan ka sual zawng zawng ai thi tura Isua i rawn tirh a avangin ka lawm e. I ngaihdam ka phu lo tih ka inhria. Lalpa, i khawngaihna chauhin min chhandam thei tih ka hria. Famkimna hmunah lut turin ka felnain a tlin ngai dawn lo tih pawh ka hria.
"Isu, min hmangaih em avanga ka sual zawng zawng i phurh avangin ka lawm e. Vanram luttlakah min siam a, min chhandam turin ka ngen a che. Tunah hian ka pumin, chatuan atana min chhandam turin ka dil a che. Isua hmingin, Amen."
Isua pawm tura i ṭawngṭai a nih chuan Rick@PastorRick.com ah hian min rawn bia la, Isua nen zinkawng in zawh dunna atana thil ṭulte ka lo thawn dawn che nia.
[Lettu: Mapuia Fanai]
No comments:
Post a Comment