Friday, February 2, 2024

PATHIANIN A SIAM ANG MIHRING NI RAWH

I Nundan Thlirlet La

By Rick Warren
— Feb 02, 2024
 
“Fin vervêk thawhin Pathian thu a dik lo zâwnga sawi kan chîng ve hek lo.” [ II Korinth 4:2]
 
I nih loh pui nih tuma buai tluka thil hahthlak a awm awm love.
 
Mi tuten emaw i nihna an hriat i duh loh vang emaw Pathianin a hmangaih loh che i hlauh vang emaw a hmaikawr i vuah a nih chuan i nuna thil ṭha ber berte chu i chan dawn tihna a ni ang.
 
Pathian chuan amah chibai bukna lem emaw dik lo emaw a pawm dawn lo. I nunah Pathian malsawmna i duh a nih chuan mite tihlâwm tumin buai lo la, Pathianin a siam ang chea awm tum mai tawh rawh. Pathian chuan midang ni turin a siam lo che. Vanram i thlen hun chuan, “Eng vangin nge i farnu ang khan i awm loh emaw naupang dang i an loh emaw, i ṭhian hlawhtling tak kha i an loh” a ti dawn lo che. I nuna ti tura a tih che kha i tihhlawhtlin leh tihhlawhtlin loh chauh a chhut ang.
 
Khawvel hian nangmah ang pahnih kha a mamawh lo. Khawvel hian nangmah kha a mamawh che a, Pathian hna he khawvela a pek hlen turin a duh che. A buatsaih che, danglam takin a siam che a, mahse midang zawk nih kan tum chuan kan hlah ṭheuh dawn tihna a ni ang.
 
Paula chuan II Korinth 4: 2 ah chuan hetiang hian a sawi, “Fin vervêk thawhin Pathian thu a dik lo zâwnga sawi kan chîng ve hek lo.” Ṭawngkam danga kan sawi dawn chuan, lem kan chang lova, a derin kan nung hek lo tihna a ni ang. Midang nihna kan inbel hek lo. Pathian Thutak chu kan kailek lo. A nihna takah chuan, thutak chu tluangtlam takin kan hril a, mitin hnenah kan nihna dik tak kan sawi a ni.
 
Midang tihlâwm vek tum tluka thil hahthlak hi a awm ngai lo. Newsweek chanchin bu kawmah vawi hnih ka chuang tawh a, vawi khat chu mite ngaihdan zawngin vawi khat dang chu mite ngaihnep zawngin. Chu chu hringnun a ni mai!
 
Pathian meuh pawhin mi zawng zawng a tilawm thei lo. Ṭhenkhatten vur tla an dil laiin ṭhenkhat thung chuan van dum pawl an dil ve tlat zel.
 
I nihna lo pui nih tuma i phe chiam chiam a nih chuan, rilru hahna leh mualpho hlauhna chuan a zui ngar ngar ang che a, i beidawngin i hnual em em fo bawk ang.
 
Beidawnna hneh tur chuan, Pathianin a siam ang mihring chu ni tawp mai rawh. Pathian malsawmna dawng turin i famkim a ngai lo – mi tak/dik tak ni mai rawh.
 
Ngaihtuah zui atan.
 
I nunah khan Pathian remtihpuina nge i um a, midang remtihpuina zawk? I chhanna chu nangmah hnaih taka khawsate khan an pawmpui ang che nge an pawmpui lo vang che?
 
Midang tihlâwm tumna chuan engtiangin nge i nunah buaina a thlen ṭhin?
 
Eng vangin nge Pathian chuan i dikna leh rinawmna chu malsawm a chak ang?
 
Lettu: Peka

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...