Sunday, February 18, 2024

'AIH' TI TURIN CHAKNA I NEI

_Hmuh Theih Loh Indona_

- Rick Warren 
- Feb 18, 2024
_"I sualnain a thunun lo che a. I nunah Pathian Thlarau i neih chuan chu Thlarau chuan a thunun zawk che a ni."_ (Rom 8:9, NLT)

Tunlai mi ṭhenkhat chuan kan châkzawng ang apiang chu kan ti mai tur alawm an ti. A ṭha anih chuan ti tawp mai rawh! I lung a dum chuan ti zel mai rawh! Midang pawhin an tih chuan engnge i tih loh bik ang? Midang pawi a sawi dawn loh phawt chuan ti mai la!

Chu chu chhiatna thlen theitu rilru puthmang a ni. Cake lian tak mai tui i tih em avanga ei zawh vek mai kha i tan a ṭha kher lo. Thil eng emaw i tihin midang tumah a hliam dawn lo ni a i hriat avang khan a sawhkhawk i tuar dawn lo tihna a ni hek lo.

Rom 8:9-ah chuan heti hian kan hmu, _"I sualnain a thunun lo che a. I nunah Pathian Thlarau i neih chuan chu Thlarau chuan a thunun zawk che a ni."_ (NLT)

I pianthar hma chuan thlemna do let turin do duhna chauh i nei. Mahse chu chu a tawk ngai lo. Thil ṭha lo leh i tana chhiatna thlen theite tih châk tlatna lakah chakna i nei lo ṭhin.

I lo pianthar chinah erawh chuan Thlarau Thianghlim neiin "aih" tih theihna nun i lo nei ta. Isua i neih hmaa thil tih zel duhna, nawrtu, tisa châkna, leh rilru zauthauna i neih ang kha i la nei reng. Mahse tunah chuan nangmahah Pathian thiltihtheihna i nei tawh tlat. "Aih" ti turin chakna i nei tawh a ni.

Bible chuan heti hian a sawi, "_Chutichuan, hei hi ka ti a ni: Thlarauvah awm rawh u, tichuan tisa chakna chu in zawm dawn lo nia."_ (Galatia 5:16). I pianthar hnuin châkna sual i nei lovang a ti hauh lo. Mahse chung châknate chu puitlin lo tura puitu che Thlarau Thianghlim i nei tawh a ni.

"Ringtu ka ni a, mahse ka sim mai thei lo a ni" ti ṭhin i hre ngai em, dawt an sawi a ni. Anmahniin an sim thei! Thlemna an tawh laiin Thlarau Thianghlim thiltihtheihna an dil ngai lo a ni. A kaihhruaina hnuaia awm turin an inpe ngai lo a ni.

Lei leh vana thiltihtheihna ropui ber i nunah a awm. Pathian chawimawi lo leh a duh lohzawng thilte hnawl turin "aih" tih theihna i nei.

Ngaihtuah zui atan.

Thlemna i tawh laiin Thlarau Thianghlim ṭanpuina i hmuh theih nan engnge i tih anga i sawi ang?

Thlemna i tawh laiin eng thilin (ṭhian te, chhung te, hna emaw thildang emaw) nge "aih" ti thei lo turin harsat thlen ṭhin?

Thlemna laka "aih" i tih theih nan tuin nge fuih thei che?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...