Pathian Thutiam Mak
- Rick Warren
- Jan 07, 2024
"Tuite in dai kai lai pawhin kei in hnênah ka awm ang a; luite in dai kai lai pawhin a chim pil lo vang che u: meia in kal tlâng lai pawhin in kang lo vang a; meialhin a tialh hek lo vang che u. Kei hi LALPA in Pathian, Israel-ho Mi Thianghlim nangmahni chhandamtu ka ni si a."_(Isaia 43:2-3)
Ringtu i lo nih hian nun hi awlsam thut turin i lo beisei em?
Chutianga i lo beisei anih chuan rei lo te chhungin ringtu nun hian harsatna chi hrang hrang - inlaichinna kawngah, sum leh paiah, taksa leh rilruah a hmachhawn a ni tih i hre thuai ang tih ka hrilh a che. Mi ṭhenkhat chuan khawvel hi vanrama a chan an ring mai bawk. Mahse he lei hi vanram a ni tlat lo!
Pathian duhzawng vana an tih anga leia ti turin kan ṭawngṭai ṭhin- a chhan chu thil a fel famkim thlap dawn avangin.
Mahse he leiah chuan Pathian duhzawng tihin a awm khat khawp mai. He leia engkim mai hi kehchhia a ni vek zawk mah. Kan khaw chin, kan ei leh bar, kan taksa leh kan inlaichinna te hi beisei angin an awm lo ṭhin. Sualna avangin thil ṭha lo a lo thleng tih chu kan chiang vek ang.
He khawvela harsatna kan tawh zawng zawngah Lalpan min puih a tiam a ni tih pawh kan chiang thei bawk ang.
"Tuite in dai kai lai pawhin kei in hnênah ka awm ang a; luite in dai kai lai pawhin a chim pil lo vang che u: meia in kal tlâng lai pawhin in kang lo vang a; meialhin a tialh hek lo vang che u. Kei hi LALPA in Pathian, Israel-ho Mi Thianghlim nangmahni chhandamtu ka ni si a." (Isaia 43:2-3)
Tui thûk tak leh harsatna luipui i paltlang laiin Pathianin i huh miah lovang a ti lo che, a chang chuan hringnun hian min hliam ṭhin. Mahse Pathianin chu tuifawnah chuan i tla lovang tiin a tiam che. Meialh i tawntlang laiin a sa viau dawn. Mahse Pathianin i kang chhe vek lovang tiin a tiam che. I paltlang ngei dawn.
Philippi 4:13-ah chuan hei hi kan hmu, "Min tichaktuah chuan engkim ka tithei [Min siam chhan tihlawhtling turin Kristaah ka hausa a ni; ama zarah chuan egkim ka ni]" (AMP). I nihna avangin thil engkim i tithei tihna erawh a ni lo. A awmzia chu, eng harsatna pawh tawk mahla nangmaha Krista thiltihtheihna awm avang khan huaisen takin i hmachhawn thei tihna a ni.
Tunah i chak viau lo mai thei. Mahse i mamawh hunah chakna a lo thleng ang. Bible chuan i kartin mamawh emaw thlatin mamawh emaw ei tur dil turin a ti lo che. Heti hian ṭawngṭai turin a ti che: "Lalpa, ka nitin ei tur min pe rawh. Vawiin atana chakna ka mamawh tawk chiah ka duh e."
Harsatna i tawh hunin Lalpan a pui zel ang che. Ni khata atana i mamawh tawk chakna a pe zel che.
Ngaihtuah zui atan.
Engvangin nge Pathianin vawiin atan chauha i mamawh chakna dil tura a tih che ni a i rin?
Engnge i lungkham ber? Chu lungkham chuan engtinnge Pathian thutiama i rinna i nghah zat a lantir?
Hun kal tawhah engtinnge Pathianin tui thuka i pil bo mai a phal lohzia a lo lantir tawh?
[Lettu: Mapuia Fanai]
No comments:
Post a Comment