_Pathianin Bahlahnate Dinchhuahlehnaa Chantir Dan_
By Rick Warren
— November 03, 2023
Infiamna chi hrang hrangah mahni mual [home-field] a inkhelh chu a ṭhat bikna a awm zel. Infiammi anmahni muala khel chu khual-muala [away-ground] khelte aiin an chak zing zawk deuh fo bawk ang. Team eng pawh anmahni au phurtu an neih chuan an theihna nasa zawk a lang chhuak fo.
Bible chuan nangmah ngei pawhin au phurtu che i nei tih a sawi. Hebrai 12: 1 chuan hetiang hian kan hmu, “Chutichuan, chhûmpui nasa tak ang thlîrtuten min hual vêl avângin, min tihnawk thei apiang leh sual min tibuai ṭhînte chu hlîpin, kan hmaa intlânsiaknaah hian chhel takin i tlân zêl ang u,” tiin.
I thiltihte kha a ruk a awm tak tak thei lo. Thlirtu i nei zel. Vanramin a thlir che. Mahse chuvang chuan sahawk lutuk tur erawh i ni lo. Chu chuan a fuih phur tur che a ni zawk ang – a chhan chu nangmah au phurtu che i nei tihna a ni. Bible chuan vanrama mite zawng zawng chuan an lo au che a ni tih a sawi nghe nghe.
Pathian chuan engkim a tithei tih chu i hre viau ang. Bible chuan, “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai țhîn a ni,” tiin a sawi bawk. Lalpan engmah hriat hmaih a nei lo. I kawng zawh awlsam lai leh harsa lai chu a hria, ngaihtuahna, vei zawng leh hnehna zawng zawngte – engkim chu a hre vek a ni.
Mahse, “chhûmpui nasa tak ang” hual veltu i nei a. Mosia chuan a thlir reng che. Abrahama pawhin a en che. Ringtu he khawvela lo nung tawh zawng zawngte chuan rinna nun i vawn dan chu an thlir reng che a ni.
An lo au phur che a. I hlauh changte chuan, i huaisen theihnan an lo nawr ngar ngar che. I beidawng mai dawn changte chuan, hmalam pan turin an lo fuih che a. Hlu lo riau nia i inhriat changte leh miten an theihnghilh tawh che emaw i tih changte chuan, i lamah an lo ding e.
Mitinte hian engtik lai emaw chuan tuman an ring lo emaw an inti ṭhin a, chawlhna nei lo leh thil tifuh thei reng reng lo angin an inngai fo. Chutianga i awm chang chuan, nangmah maiin i awm lo a ni tih hria ang che. Vanrama nangmah lo thlir a, lo ṭantute chuan Pathian ṭanpuina chuan thil harsa pawh i tithei dawn a ni tih an hria e.
Ngaihtuah zui atan.
Mipui tam takin an thlir reng che tih hria la eng thil nge i tih ang?
Pathian chuan i chungchang engkim a hria e. Chu chuan a tihlau che nge a fuih thar che. Eng vangin?
I nunah khan tute nge mi rinawm i hmaa lo kal tawh vanrama nangmah lo ṭantu leh lo auphurtute zingah chuan tel ve ang?
[ *Lettu* : Peka]

No comments:
Post a Comment