Thursday, November 2, 2023

BEIDAWNG MAI SUH

 _Pathianin Bahlahnate Dinchhuahlehnaa A Chantir Dan_ 

By Rick Warren

November 2, 2023


“Chûng zawng zawng chuan an rinna avângin fak lo hlawh tawh mah se, thil tiam chu an chang lo va. Pathian chuan kan tân thil ṭha lehzual a lo buatsaih tawh a, keini leh anni a ruala tihfamkima kan awm theihna tûrin a lo rêl a ni.” [Hebrai 11: 39-40] 

Rinnaa nun hi thil awlsam a ni lo. Khawvel chhe mekah kan khawsa a. Sik leh sa pawh a mumal tawh lo hle. Kan taksa pawh a ṭhuanawp viau a. Mite nena kan inlaichinna pawh a ṭha tawk lo zel. 

Adam-a’n Eden huan a chhuahsan dawn lai khan khawvel chu a harsat tur thu a hriattir a – a harsa ta reng a. Sual leh ṭha indona nasa zet chu i nun chhungah leh pawn lamah khan a awm zui a. I sualna nen pawh khan in indo ngar ngar bawk a. Satana nen pawh in indo hial a, a tum ber chu “ru tur leh tihlum tur leh tichhe turin" a ni si a. [John 10: 10]

Tichuan, a chang chuan i nun pawh a rawn thleng a. Beidawn mai duh rum rum chang i nei ang.  

Hebrai 11-ah chuan, Pathian chuan rinnaah chuan awm hram hram turin a duh che, a chhan chu a la theihnghilh mai lo che a, nangmaha a thutiam chu a la hlen dawn vang a ni. Hmalam hun leh beiseina pek che a tiam bawk [Jeremia 29: 11]. I mittui hruksak che a intiam a [Thupuan 7: 17] a Thu chuan thutiam eng emaw zat a la delhkilh bawk. 

Hebrai 11-ah chuan Bible-a mi huaisen Pathian thutiama rinna lantirtute chanchin kan hmu: Abrahama, Isaka, Jakoba, Mosia, Davida, Rahabi, Gideona, Samsona, leh midangte chanchinah khan. Harsatna an tuar chung khan an rinna kawng zawh lai kha an zawh mawlh mawlh mai a ni. 

Hebrai 11: 39-40 thung chuan hetiang hian a sawi, “Chûng zawng zawng chuan an rinna avângin fak lo hlawh tawh mah se, thil tiam chu an chang lo va. Pathian chuan kan tân thil ṭha lehzual a lo buatsaih tawh a, keini leh anni a ruala tihfamkima kan awm theihna tûrin a lo rêl a ni,” tiin. 

Beidawng mai i duh rum rum chang chuan kal zui ve hram hram angin awm mai suh. Pathianin a thutiam a hlen dawn tih thuah chuan i rinna nghat tlat ang che. I hriat reng tur chu Pathian chu he khawvela a thutiam hlen turin leilung dan hian a phuar ve lo tih hriat a ngai ang. A Thu hlen tura a hun neih rei zawng chu chatuan daih a ni hial. 

Pathianin i nun leh nangmaha hna a thawh zozai avang chuan chung thutiama neih te chuan beiseina pe che rawh se – hun khirh tak i hmachhawn lai pawh ni se. 

Ngaihtuah zui atan. 

Rinnaa nun tih awmzia chuan natna a pai tel. Hringnun a tluan loh changa i beidawng mai a nih chuan Pathian rin tih awmzia chu i zir thiam ngai lo vang. Chu chu eng vang nge nia i hriat?

Hringnun a tluan lai chuan Pathian hmangaih a, a rawngbawl mai chu thil nuam tak a ni. Eng ang ṭanpuina nge hun a harsat hun chuan i lo beisei theih ang? 

Hun harsa tak i paltlang lai chuan Pathian thutiam eng ang te chu nge nangmah fuih phur theitu che chu ni ang? Tun karah hian Bible chang pakhat tal vawng turin bei ang che. 

 *Vawiin hian Isua i zui dawn em?*  

Pathian chuan a thatna chu a Fapa, Isua Kristaah chuan a lantir a. Bible pawhin hetiangin a sawi, “Pathianin khawvel a hmangaih em em a; tichuan, a Fapa mal neih chhun a pe a, amah ring tawh phawt chu an boral lohva, chatuan nun an neih zawk nan." [Johana 3: 16] 

Pathian chatuan thutiam chu a hlawhtlin theihnan amah rin chu i inpeih tawh em? A nih chuan he ṭawngṭaina tawite hian inhlan ang che: “Lalpa duh tak, Isua Krista chu i Fapa a ni tih ka ring e. Ka sual a ni tih ka puang a, i ngaihdamna ka dil a che. Isua chu ka sualte la bo turin a thi tih ka pawm a, i kaitho leh tih pawh ka hria. Isua chu chhandamtu atana pawm a, ka Lal ni a, amah zui turin vawiin aṭang hian ka inpeih e. Ka nun hi hruai la, i duhzawng min zirtir ang che. Isua hmingin ka dil a che. Amen.” 

Isua pawma i ṭawngṭai zo chiah a nih chuan he mail Rick@PastorRick.com -ah hian min lo bia ang che. Isua nen in zinkawng atana thuziak pawimawh tak tak lo thawn che ka duh e. 

[ *Lettu* : Peka]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...