Sunday, November 19, 2023

PATHIAN DUHZAWNG THLEN TUM CHIN NEIHNA HIAN RINNA A ṬHAN LENTIR

_Pathianin Bahlahnate Dinchhuahlehnaa A Chantir Dan_

- Rick Warren 
- Nov 19, 2023

_"In rin angin in chungah lo thleng rawh se."_ (Matthaia 9:29)

Pathian duhzawng tih tumna hi rinna kaltlanga lo thleng ṭhin a ni. _"Rinna lovin amah tihlâwm theih a ni lo."_ (Hebrai 11:6). I thiltih tumte Pathian lawmzawnga ruahman i duh chuan thiltih i tum kha rinna nena tih ngai a ni tur a ni.

Heti hian kan sawifiah thei bawk ang, nagmaha i tihpuitlin theih loh tur thil tum lian tham tak i ruahman tur a ni. Pathian duhzawng tih tumna hian i rinna a tizauvin a tiṭhang ṭhin.

Tihhlawhtlin tum thil lian tak i ruahman a Pathian i rin bawk chuan Pathianin hna ropui tak a thawk anga, i rinna nasa takin a ṭhang lian a ni tih i hmu bawk ang. Kawng leh lamah, thil tê tham tê tih i tum chuan Pathianin a thiltih ropui tak hmu tura a duh che leh a lo ruahmansak che chu i hmu thei lovang.

Pathian duhzawng tih tumna chuan i rinna a tipung a. Pathian i ring a ni tih i nemnghet a, Pathian i rinzia tilangtu pawh a ni bawk. Bible chuan, _"In rin angin in chungah thleng rawh se"_  a ti (Matthaia 9:29).

Tihpuitlin tum ruahmanna i neih loh chuan a ngai renga awm i tum tihna a ni mai. Chutiang anih chuan, i rinna pawh a ngai reng dawn tihna a ni.

Hei hi han en teh:

• "I hriselna chungchangah engnge i ruahmanna?" ti a ka zawh chein, "Engmah ka nei lo" i tih chuan dinhmun ngaia awm reng i tum tihna a ni.

• "Midangte nen in inlaichinnaah engnge thlen tum i neih le?" ti a ka zawh chein, "Engmah ka nei lo" ti a min chhan chuan inlaichinna ṭha zawk siam tumna a awm lo tihna a ni.

• "I leibate rulna kawngah engnge i ruahmanna?" ti a ka zawh chein, "Engmah ka nei lo" i tih chuan leiba neia awm reng i tum tihna a ni.

• "Eizawnna kawngah engnge i ruahmanna?" ti a ka zawh chein, "Engmah ka nei lo" i tih chuan teihawi ve mai mai bak tum i nei lo tihna a ni.

Tum/Ruahman neih hi hi thlarau nuna inthununna kawng a ni. I rinna kawngah chona an pe che a. I nungchang an siam a. I nunah beiseina an siam a ni.

Pathian puihna tel lova i tihhlawhtlin theih loh tur thil i tihchhin hma chu Pathian i la ring tak tak lo tihna a ni. Pathian duhzawng tum neihna chuan Isuaa innghat tlat turin min pui ṭhin. Chu chuan i rinna a tichak ṭhin.

Ngaihtuah zui atan.

Mahnia i tihhlawhtlin theih loh thil kha i tihpuitlin theih nan engtikah nge Pathianin a thawhpui che i hmuh tawh? Chu chuan engtinnge i rinna a ṭhan lentir?

Tuna i tihpuitlin tumte khan engtinnge Pathian i rin dan chen a lantir?

I nunkawng tinrengah i ṭhan len theih nan thlen chin tur vawiin hian engnge i ruahman ang?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...