Monday, November 20, 2023

PATHIANIN RUAHMANNA FEL TAK A SIAM ṬHIN, NANG PAWHIN SIAM VE RAWH

Pathianin Bahlahnate Dinchhuahlehnaa A Chantir Dan

- Rick Warren 
- Nov 20, 2023

"[Pathianin] Kristaah engkim fuankhawm turin ruahmanna a siam a. Tichuan Krista chu engkim, lei leh vana awm zawng zawng chunga lu a ni ang."(Ephesi 1:10, GW)

Tum neiha thiltih hi ruahmanna ṭha a ni satliah ngawt lo. Ṭawngṭai, chaw nghei, thilpek leh Bible chhiar te ang tho a thlarau nun thununna a ni.

A nihna takah chuan tum neia ruahmanna siam chu Pathianin a pek zawng zawng che hmang chhuak turin enkawltu hna i thawk a ni zawk mah.

I nun i khawh ral mai mai thei. Mi tam takin an khawh ral reng bawk! I nun awmze neia hmanga hlawk thei ang bera nung tur chuan tum bik i neih a ngai.

Pathian pawhin tum bik neiin thil a ti ṭhin. Bible chuan heti hian min hrilh, "[Pathianin] Kristaah engkim fuankhawm turin ruahmanna a siam a. Tichuan Krista chu engkim, lei leh vana awm zawng zawng chunga lu a ni ang."_ (Ephesi 1:10, GW). Pathianin ngawi renga ṭhuin a remchang zawng ni a a hriat angin khawvel hi a kal kual satliahtir mai mai lo. Ruahmanna fel tak a siam. Pathianin kohhran tan tum bik neiin ruahmanna a siam. Khawvel leh van thengrenga thil engpawh mai tan hian tum bik neiin ruahmanna a siam vek.

He khawvel hian a hun tawp a hnaih zel. Rorelna ni a lo la thleng anga, chumi hunah chuan khup tinreng an la ṭhingṭhi anga, lei tinrengin Isua Krista hi Lal a ni tih an la puang ang. Chumi lam pan chuan kan thawhthu hi a kal mek a ni- chu chu Pathian ruahmanna a ni tlat.

Pathianin chutianga ruahmanna a siam chuan keini pawhin kan siam tur a ni. Kan nunkawng tinrengah Pathianin amah ang turin min duh, tum neia ruahmanna kawngah pawh. Mi ṭhenkhat, "Ruahmanna ka siam dawn lo. Pathianah rinna ka nghat tawp anga, a duh danin ka kal zel mai ang" ti ka hre fo. 

Chu chu a thlarau viau lo. A âtthlâk zawk mah! Tunkar chhung atan, tun thla chhung atan leh kumin chhung atan hian ruahmanna nei miah lovin ni khat pawh ke pen tawh suh.

Bible-ah hian Pathianin i hnena a thutiam 7,000 aia tam kan hmu - hlawhtlinna, inrin tawkna, hriselna, hausakna, chakna, finna leh thil dang tam tak kan hmu.  Engvangin nge chung chu Pathianin a tiam le?

Amaha rinna nghah i zir a duh a ni.

Tum neia ruahmanna i siamin harsatna thlir lian ber suh; Pathian thutiam kha thlir zawk rawh. Pathian thua a thutiam, i tum i hlen theihna tur zawng zawk rawh.

Pathian i hmuh len danin i thil tum lengzawng a hril. Ruahmanna siam ṭan la, thil engkim, Isuaa i thiltum thlengin i tihhlawhtlin theih nan Pathiana rinna nghah zir rawh. 

Ngaihtuah zui atan.

Engtinnge ruahmanna fel tak siam hian enkawltu ṭha zawka a siam che?

Eng Pathian thu leh thutiamtein nge i tum tihlawhtling turin pui ang che?

Chatuan hmun i thlir dan hian engtinnge ruahmanna siam kawngah a puih che?

[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...