Pathianin Bahlahnate Dinchhuahlehnaa Chantir Dan
By Rick Warren
— Nov 16, 2023
“Kan taksa siam dân hi a hriata,
Vaivut mai kan ni tih
a hriat reng avângin.” [Sam 103: 14]
I hlawhchhamna kha Pathianin mak a ti lo. A lo ring lawk zawk fo. Eng anga siam nge kan nih a hre si a – a chhan chu ama siam kan ni tlat!
Bible chuan, “Kan taksa siam dân hi a hriata, Vaivut mai kan ni tih a hriat reng avângin.” tiin a sawi [Sam 103: 14]
Buaina kan tawh chang pawhin Pathian chuan min hmangaih a ṭhulh chuang lo. Bible thu laimu chu hei hi a ni: I thiltih avang khan Pathian chuan a hmangaih lo che, amaha nihna awm sa leh a thiltih avang zawk chuan a hmangaih che a ni. Pathianin a siam che a. A hmangaih che. Chu chu a ni tawp! Pathian chu i inhmangaih lehzual tir thei tawh chuang lo. I inhmangaih tir lo hlek thei hek lo. I fel deuh ni leh i sual deuh nite chuan a ngai rengin a hmangaih che a. A hmangaihna chu thiltiha innghat a ni ve lo.
Chu chu khawngaihna a ni – mak tak leh ropui tak a ni. Pathian chuan van aṭangin a lo en che a, “Nangmah hmangaih che hi ka thlang mai a ni. Nangmah hmangaih lo turin min ti thei lo vang” a ti mai a ni. Chu chu khawngaihna mak tak zawng a ni e. Pathian khawngaihna i hriat thiam tak zet chuan i hlawhchhamna chu hahdam takin i pawm thei ang a, i hmaa chona inchhawpte chu i hmachhawn leh thei ang.
Pathian hnenah chuan a ngaihdamna changin vawi tam lo kal tawhin i buaina ngai pawh i lo thlen fo tawh a ni thei. A hmangaihna leh khawngaihna chu phu lo ni awm hialin i inngai tawh a ni thei ang. Insiam ṭhat i tumna pelhsawlh leh ṭhin avang chuan Pathian meuh pawh beidawng tawh turah i ngai a ni thei.
Mahse hahdam takin awm rawh. Pathian chuan nangmah nena inkawm chu a ning ve ngai hauh lo. A buai lutuk ngai hek lo. A hnenah chuan vawi engzat pawh a ngaihdamna dilin lo kal tawh mah la, ban pharin a lo dawngsawng thei reng che.
Chhungkua i thiltih mila hmangaihna dawnna hmuna ṭhang lian i lo ni thei. I nu leh pate hmangaihna chu i zirnaa i tih ṭhat dan emaw, infiamna i chak dan emaw, mite nena inkawmna huanga i lar dan emawa innghat a ni thei. A eng emaw bera i hlawhchham a nih palh chuan i chhungte hmangaihna chu i dawn loh phah hial thei.
Chu chu Pathianin a enkawl dan che a ni ve lo.
Bible chuan “Thupêk, kuta ziak, min dâl ṭhîntu, zawm kan bat si chu a thai chhia a, krawsah chuan khêngbetin a tibo ta.” tiin a sawi. [Kolossa 2: 14]
Ringtu nun hi nun famkim, dai sual awm lo a ni lo, mahse nun hahdam, mahni inthiamlohna awm lo erawh a ni thei. Pathian chuan i hlawhchhamna a hria a, i nihna ang ang khan a hmangaih che.
Ngaihtuah zui atan.
Pathian chuan i chak lohna zawng zawng nen a hmangaih che tih i hriatna chuan engnge a hriat chhuahtir che?
Pathianin i tihsual leh hlawhchhamna a dawn sawn dan i hriatfiahna chuan engtin nge midang hlawhchhamna leh tihsual hre thiam tur chuan a ṭanpui che?
Tu hnenah nge Pathian khawngaihna mak Chanchin ṭha chu i puan chhuah ngai le?
[ *Lettu* : Peka]
No comments:
Post a Comment