Wednesday, November 15, 2023

THILPEK RAWNGBAWLNA

 2 Korinth  8:1-5

 


Korinth mite hnenah Makedonia rama ringtuten Jerusalema ringtute chhawmdawlna thilpek an pek thu leh an pek dan a hrilh a. Harsatna hnuaia kun chung pawhin an ringtu puite tana an thilphalzia a hrilh a. Engvanga thilpek hi pe nge an nih? Kohhran hote hian engvangin nge thilpek kan pek? Engvangin thilpek chu kan pek zel ang?

 

Makedonia rama kohhrante atanga entawn tur –

Grik hmar lam chu Makedoni ram a ni a, chhim lam erawh chu Akaia ram a ni. Makedonia rama kohhrante thilpek hi entawntlak a tih chu a ni, chung kohhrante chu Philippi, Thessalonika leh Beroi te an ni.

 

Makedonia rama kohhrante thilpek dan chu Paulan Korinth kristiante hnenah a sawi a. Makedonia rama kristiante chu hrehawmna leh fiahna nasa tak tuarin rethei hle chungin an thil phal em em tih a sawi a ni. Makedonia rama chengte hi Rom sawrkar pawna hnuaiah an awm a, rethei hle mahse, Jerusalema Kristian rethei takte tanpuina turin sum an thawh a ni.

 

Makedonia rama kohhrante thilpek dan chi thum

1) Anmahni an inpe hmasa: Thilpek tak tak hmain anmahni ngei an inpe hmasa phawt a ni. Heng ringtu duhawm tak takte hian thilpek hl uber – anmahni an inpe/inhlan hmasa tlat. Chumi hnuah chuan sum leh pai pek chhuah kha chu an tan thil awlai tak a ni tawh. Paulan Pathian duhzawngin anmahni ngei Lalpa hnenah leh keini hnenah an inpe hmasa te te a ni a tih hian Krista hnenah an inhlan hmasa a, tichuan Jerusalem mite tan thilpek la khawm turin Paula tan an inpe a ni tih a sawina a ni.

 

2) An khawsak dinhmun azirin an pe: Mahni khawsak dinhmun a zira pek chu a tam thei lo thin.

 

3) Thinlunga thilphalna atangin; Zalen takin an pe a, an tih theih tawk piahlam thlengin an pe a ni. Hetianga thil kan pek chuan mahni inhuam aia tam pawh kan pe thin a ni.

 

Kan Lalpa Isua thilpek: kan entawn tur

Kan Lalpa Isua Krista khawngaihna chu, a retheihna avanga in lo hausak theihna turin, hausa mahsela nangmahni avang ngeiin a lo retheih tak kha in hre si a. (8-9)

“Sihalten kua an nei, chungleng savate pawhin bu an nei, mihring fapa erawh chuan lu nghahna a nei lo (Mat 8:20). Pathian khawngaihna hi thilpek min pek chhan chu a ni a, Lal Isua inpekna chu kan entawn tur ber a ni. Lal Isua chu a hausa a, nimahsela keimahni avangin a van hausakna zawng zawng a kalsan a, a hausakna kan chan theih nan rethei takin khawvelah a lo kal a. A retheihna avangin a hausakna kan chang ta a ni. Chuvangin, kan neih ang zela lawm taka pek chu ringtute mawhphurhna a ni.

Makedonia ram kohhrante hi Paulan thilpek pe tura zirtir pawh ngai lovin, thilpek pek phalsak turin anmahni zawkin an ngen a ni. Pek tur tam tak neilo mahse, thilpek pek an chak a ni. Makedonia rama kohhrante hian thilpek pek danah kohhran dangte entawn tur an lantir a ni. Kristiante thilpek tehna chu a tam lam ni lovin inpekna zawk hi a ni. Hmeithai pakhatin a neih zawng zawng, a intununna tur pawh a pek ang khan (Lk 21:1-4)


Thilpek tobul chu Pathian khawngaihna a ni a, khawngaihna kan phu loh duhsakna leh ngaihdamna Pathian min pek rinna kan lo chan hi a ni, chuvangin, Pathian khawngaihna a thlawna phal taka min pek ang hian pek let beisei lovin kan pe tur a ni.

 

Thilpek hi Pathian rinchhana pek tur a ni a, Pathian tana rinawm taka petu chuan Pathianin malsawmna nasa takin a vur thin a ni.


By Sangpuia

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...