Sunday, November 5, 2023

I AWM ANG KHAN LALPA LO PAN MAI RAWH

 _Pathianin Bahlahnate Dinchhuahlehnaa A Chantir Dan_

- Rick Warren

- 5 November, 2023


_"Amaherawhchu, Pathianin a mi hmangaihzia a lantîr dân chu, misual kan la nih laia, Krista kan aia a thi ta hial kha a ni."_ (Rom 5:8)


Isuan thil a tihsak zawng zawng che hi hmangaihnaa a tih a ni. Hmangaih tura Pathian siam kan ni tih Bible-in min hrilh. I la dam ve reng chhan pawh kha Pathianin a hmangaih tura a siam i nih vang a ni. 


Nung tura Pathianin a duh loh che chuan i lung kha vawilehkhatah a ti tawp mai anga, thawk pawh i thaw tawh lovang. Pathian chuan a siam che a, a hmangaih atan leh i hmangaih let ve nan a la damtir che a ni.


Pathian chuan a hmangaih thu che a hrilh ringawt lo che a, a lantir bawk a ni. Bible chuan Rom 5:8-ah,, _"Amaherawhchu, Pathianin a mi hmangaihzia a lantîr dân chu, misual kan la nih laia, Krista kan aia a thi ta hial kha a ni"_ tiin min hrilh.  Ennawn leh rawh. "Misual kan la nih laia" tih a nih khi. Pathian i hriat hma leh i mamawh a ni tih i inhriat hma pawhin Isua chu i tan a thi a ni.


Pathian kan belh hmain kan sualte tihfai phawt a ngai tih thawnthu a awm a. "Ka nuna chinfel ngai te hi ka chingfel phawt anga; tichuan, Pathian  ka pan ang" kan ti fo ṭhin. A ni lo, i harsatna nen Pathian chu i rawn pan thei - a ṭha, ṭha lo leh a chhe ber thleng pawhin.


Ha doctor kan pan hmaa kan ha kan nawt ṭhin leh thleng silna khawla kan thleng sil turte kan lo tleuh ang mai kan ni. Engvanga hei hi ti nge kan nih?


Pathian chuan, "Ni lo, ni lo! I sual te siamṭhat phawt a ngai lo. Chhanna zawng zawng ka nei. I awm angin rawn kal rawh" min ti a ni.


Bible chuan, _"Mi tihboral tumte laka mi chhan tûrin, vân aṭangin mi puitu tûr a rawn tîr ang. Pathianin a ngilneihna leh a thutak chu a rawn lantîr dâwn si a"_ (Sam 57:3) a ti. Chu chu Isuan a nun a, a thih a, a thawhlehna hmanga a tih chu a ni. Min hmangaih avangin kan tan van aṭangin a rawn chhuk a ni.


Heng thute hi i zawm loh chuan i tan chuan Isua Krista thihna leh thawhlehna chu a thlawn mai a ni dawn a ni. Chhandam i nihnaah danglamna engmah a thlen lo tihna a ni. Thilpek i dawn i hmuh ngei mahse, i hawn loh ang mai a ni dawn a ni.


Bible chuan, _"I kâin Isua chu Lalpa a ni tih i ṭan tlat a, mitthi zînga ta Pathianin a kai tho tih i thinlunga i rin chuan chhandam i ni ang. Thinlunga ringtuin thiam a chang a; kâa ṭan tlatna hian chhandamna a thlen bawk ṭhîn."_ (Rom 10:9-10) tih thu hi min tiam a ni.


I hlen leh theih loh tur thu tiam turin Pathianin a ti lo che. Amah chauhin a hlen theih thutiam chu ring turin a duh che a ni.


Ngaihtuah zui atan


Pathian i pan hmain i nunah engnge tihfai hmasak i tum? Vawiin hian chu chu engtinnge i thlah liam ang?


Pathianin a hmangaihna che krawsah a lantir. Eng kawng dangin nge a hmangaihna che a lantir?


Engtinnge i nunin Pathian hmangaihna che nasa tak mai kha a lantir?


[Lettu: Mapuia Fanai]

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...