Hmangaihna nen Ni 40
- Rick Warren
Oct 7, 2023
Khawvelah hian mi khirh harsa tak an tamzia hi i ngaihtuah ngai em? A chang chuan, chung mite chu i dawr an ngaiin i hre thin em?
Miten kan laka an tih atana kan duh loh, kan ngeng chhun em em mai thil kan nei theuh a. Chutiang ka neih ve chu : Miten min ko sela, "Hei hi tunge?" min ti leh sela. Traffic Jam laia horn hmet ri vak vak thin te. Dawr a thil man pe tura kan intlar laia mi kara inzeh ching te. I motor dahna lai taka lo dah ching ang te.
Sawi zawm tur a la awm zel mai, i hriatthiam ka ring. Chuti a nih chuan mi harsa tak takte engtin nge hmangaihna nen i chhanlet ang le?
Thufingte 16:21-ah chuan, "Rilrua fing chu mi remhria tih an ni ang a, tawngkam thlumna chuan thiamna a tipung" a ti.
I hlim poh leh i rilru hmin a awl a ni mai. I khirh poh leh i rilru hneh a har thung. Phunchiar hi a sawt lo fo a ni.
I thil sawi dan hmang hian a dawnsawn dan pawh a tilang a. Mi pawi sawi zawnga i tawng chuan, mahni inveng ranin an lo ngaithla ang. Chuvang alawm hmangaihna hian i thu a ngaihchan thin ni. Hmangaihna chu a thutak a, a remhre hle bawk a ni.
Bible chuan heti hian a sawi: "Khakna te, thinurna te, tauhna te, anna te, sawichhiatna te zawng zawng chu bansanin awm rawh se, sualna zawng zawng nen. Tin, inkhawngaih tawna lainatna neiin awm ula, Pathianin Kristaa a ngaidam che u ang bawkin inngaidam tawn rawh u" (Ephesi 4:31-32).
Remhriatna leh aw-ki hi a kal ṭhiang rial a. I thusawi mai ni lo, i sawi dan khan awmzia a nei a. Mi dang tana thu hriat har tak pawh ni se hriat nuam tak, awki dik takin, hmangaihna awki nena i sawi chuan a dawnsawn pawh a nuam zual dawn a ni.
Mi harsate hmangaih taka dawngsawng tur chuan ngainatawm leh remhriat a tul a ni.
Hetiang hian han ngaihtuah la: mi harsate aia hniam nih i duh chuan, bei let la. Amah tlukpui nih i duh chuan, amah nen inrualkhatin awm la. Mahse, Isua tih dan anga chhanlet i duh chuan, i thusawi leh i sawi dan hmangah khan hmangaihna lantir ang che.
Ngaihtuah zui atan...
"Mi dangte hnenah thil tha sawi tur i neih loh chuan, sawi lo mai rawh" an tih hi i hre tawh maithei. Mi harsa deuhte kalsan mai hi chhanna tha berin i hria em? Engvangin?
"Mi fing, mi puitling" ni thei turin i rilru puthmang engnge thlak ngai?
Remhria kan tih hi engnge a awmzia?
(Lettu: Msa)

No comments:
Post a Comment