Friday, October 6, 2023

HMANGAIHNA CHU INLAICHINNAH A NI, THILTIH ZAWH TAWHAH RINGAWT A NI LO VE

 Hmangaihna nen Ni 40

-Rick Warren,

October 6, 2023


"Ka thusawiah emaw, ka rinnaah emaw, ka thiltih emaw lam a ni hauh lo, hmangaihna ka neih si loh chuan a sawt lovin engtihna mah a ni lo ve" (1 Kor. 13:3 MSG)

Niminah khan Bible-in enge ni nunin awmze dik a sawi chungchang kan zirho tawh a: "Isua Krista zuitu dik tak i nih chuan... i rinna chuan midangte hmangaihnaah a hruai lutin a zirtir ngei ang che" (Gal. 5:6 CEV)

Hmangaihna nun i neih a, hmangaihna chu i nun pui ngai si loh chuan, i thusawi leh thiltihte leh rinna (believe) chu engmah a ni lo.

Chu mai a la ni lo, hmangaihna nun i neih loh chuan i thilpek pawh chu a sawt lovin, engtihna mah a ni lo ang a, awmzia a nei hek lo vang.

"Miretheite tan ka thil neih zawng zawngte pe vekin, ka taksa hial pawh hlanin ka chhuang viau a ni thei e. Mahse, midangte ka hmangaih si loh chuan ka tan engmah sawtna leh hlawkna a awm lo vang" (I Kor. 13:13 NLT).

Hmangaihna chu thilpekna tura cho phurtu englai pawhin a ni hran lo. Mi thenkhat chuan pek let beiseiin thilpek an pe a, thenkhatin an rilru inthiamlohna an neih loh nan an pe bawk a, thenkhat lahin midangte thununa hneh nan an pe a, an hming thatna turin leh an hmingthatna hum nan an pe bawk a, mahse, Bible chuan hmangaihna tel lo chuan engtihna mah a ni lova, a sawt lova, i thilpek te pawh chu chhiar an ni lo ve, a ti.

A tawp berah chuan, hmangaihna nena i nun loh chuan i thiltih hlawhtlin te chu an sawt lovin a hlawk lo ang.

I mimalin a tih puitlin thil danglam bik leh ropuite chu i ziak tlar dul thei ang. I thlalakte chu khawvel chanchinbu lar 'Fortune' magazine-ah te leh chanchinbu hrang hrangah a chuang a ni thei e. Khawvel chawimawina sang leh ropui 'Nobel Peace Prize' hial te pawh i dawng thei ang.

Thil tam tak i tipuitlingin tihlawhtling thei ang. Kum khat chhunga sumdawng hlawhtling ber leh cheng vaibelchhia leh tluklehdingawn tel hleptu company hlawhtling tak pawh i ni thei a, i thiltihna kawng hrang hrangah hlawhtlinna nasa tak siamtu a ni thei ang. Mahse, Bible chuan hmangaihna nun tel lova thiltih chu a sawt lovin, a hlawklo a ni, a ti.

Bible chuan Pathian thusawi chu tihian a tarlang a - nun chu inlaichinna chanchin a ni a, a hlawhtlinna chungchang a ni ringawt lo a ni, a ti.

Thusawi thiam intihsiaknaah a thiam ber i ni thei, hriatna zau tha tak i nei thei a, rinna nena thilpek tithintu i ni thei a, mihringte tana thilpek ui lova pe thintu leh i thiltihna kawng hrang hranga mi hlawhtling leh mi ngaihsan rawn i ni thei. Mahse, i thinlung atanga hmangaihna nena thiltih i neih si loh chuan, engmah a ni lova, a hmutna chu 'zero' mai a ni. Chhiar tel a ni lovang. Pathian hnena awmze neia i tihtheih thil chauh chu hei hi a ni: Amah chu i hmangaih em, midangte chu i hmangaih em? tih hi a ni e.

Engtikniah emaw chuan i la thi ve ang a, Pathian hmaah i la ding dawn a ni. Chutih hunah chuan i nunin a thiltihte chu a la endikin chhuikir vek dawn a, i bank account a sum awm zat a en dawn lova, i hlawhtlinna leh tihthat (grade) ziak tlar put te chu a en dawn lova. Infiamna leh zai lama i lawmman i lak te chu a ngaihtuah dawn hek lo. I thiltih hlawhtlinte leh i lo nih tawhna (resume) te pawh a en hek lovang.

Pathian chuan i nun chu thil pakhat benchhanin a enfiah dawn a: midangte nena inlaichinna (relationships) chu a ni. Hetiang hian a zawt ang che, "Engang takin nge min hmangaih a, mihringte pawh i hmangaih le?" tiin. Chu chu Thupek Ropui a ni. Pathian chu i thinlung zawng zawngin i hmangaih em? I thenawm khawveng te pawh nangmah i inhmangaih angin i hmangaih em?

Eng thilte nge pawimawh ber a, tunah hian engte nge pawimawha tangkai ta ang le? Hei hi a ni : i rinna chu hmangaihna kaltlanga tih leh lantir ni rawh se.

Ngaihtuah zui atan

Mipuite chuan chhan hrang hrang tam tak vangin thil an pe a. Enge ni thilpek pe tura khawih che a tiphurtu che?

Pathianin hun tha remchang tam tak i hna atan emaw, nitin maiin i bul vela awmte tan i hmangaihna lantirna turin remchang tak a pek che chu enge ni?

Khawiah nge i chatuan hmun i hman ang?

I sualte chuan Pathian hnaih thei lovin, a then hrang che a. Amah nena inlaichinna dik nei leh turin Pathian khawngaihna chauh chu a pawimawh a, a khawngaihna cjauh chu amah nen inzawm lehna a pe thei che a ni.

Bible chuan, "Rinna vanga khawngaihnaa chhandam in ni, nangmahni thawh chhuah a ni lo va, chutilo chuan miin an chhuang dah ang e" (Eph. 2:8-9).

Nangmah Siamtu nen inremna neiin inzawmna leh inlaichinna nei tura i inpeih chuan, tihian tawngtai ang che:

"Aw Isu, ka sual vangin nangmah nena inthen hran a, i lak atanga hla taka awm ka duh tawh lo. I thutiamte chu ringin, nangmahah rinna ka nghat a. Ka thiltih sual leh diklote chu ngaidam ang che. Nun awmze neia hman dan zir ka duh a, engtikniah emaw chuan i chatuan in a awm turin min lo pawm ang che.

"Ka sualte ka puang a, ka Lal leh Chhandamtuah ringin ka pawm che a ni. I thutiam angin ka sualte puangin nangmahah rinna ka nghat a ni. Chhandam ka ni ang. Eng thiltih mah ni lovin, khawngaihna vanga chhandamna thu i sawi chu ka ring a ni.

" Ka Lalpa atan ka pawm che a. Vawiinah hian ka nuna thil awm zawng zawngte enkawla thunun turin ka hlan vek e.

" Keima tan ringawta nung tawh lovin, ka nun pumpui chu i tana hman ka duh a, ka nun chu i kutah ka kawl tir a, min lo chhandam la, i chhungkuaah min lo tel ve ang che. Isua hmingin ka dil e. Amen!"

Isua Krista pawma i tawngtai a nih chuan, khawngaih takin Rick@PastorRick.com ah i chanchin min lo hrilh la, Isua nena hun leh ni i lo chhiar chhoh theih nana thil tul leh mamawhte kan lo thawn dawn che a ni. 

(Lettu: CT Lalrinawma)

No comments:

Post a Comment

INREM LOH LAIA ZAHNA HLAWH DAN

_Hma Hun Eng Zawk Nei Turin_ - Rick Warren - November 22, 2026 _"Tangkarua leh rangkachak aiin hmingṭhatna leh zahna hi an ...